Aposel 25:12-27

¹²Pestus ili asehek ma anuhun sahou hawe iri lau ta gabman tan, ta akohok rayah tanan mwasin tiri. Ano, Pestus eme hamon asehek ili ta Pol i buku doh, “Ou badeh, aso-ok ta ala Rom, ta Sisa kanuhun sahou tam dah. Ya, ou are bahandra tondrok ta Rom, jo kameh tiyani ou ala hawe Sisa.”

¹³Len sabe iu, ano kabin Agripa hawe udun Banis, uru ame Sesariya anya kaselesen Pestus.

¹⁴Uru are loboho doh len sabe iu, ano Pestus asehek ta nyala Pol i ta kabin. Iy anya, “Ndramak ari ere bolo asiu lulik kede-eh, nyaran Pol. Peliks badeh, banuhun sahou tan bano bwe, iy ere ndra bolo asiu lulik kede-eh kahis.

¹⁵Jo mene ili Jerusalem badeh, tinan tiri pris hawe tinan ta bwena ta kandriyen tiri Juwis atukum ta atilik nyala iri ta adeu iy ndramak doh, anya kili ta mada sahou. Eme iri tiye tek i buku doh, ‘Ou anuhun sahou ta iy ndramak kede-eh suwi, ma iri lau ta bahun kadai iy ki-iu.’

¹⁶Eme ma jo anya, ‘Kandriyen ta gapman badu Rom edeu ndramak ili ta sahou i buku doh: Buku rayah lau anya kadeu ari ndramak ki ta sahou, iy ndramak doh badeh, katiye len tan ta asehek sahou hawe oro bwena, op. Gabman winiyan bati-i sahou tan iu laleyah bwe, buku i ndramak nane basehek saba lakou iy amekes bado mada sahou bwe.’

¹⁷Iri asahan hawek le badeh, jo batondrok ja bwai, na len ari ja badeh, jo ndramanyah ndrado bolo asiu ta anuhun sahou, ma jo atehei sahou ili tiri, katiyani Pol keme ta sahou.

¹⁸Arile, iri Juwis ame loken ta adeu iy i ta sahou badeh, jo abudon iri kameh asehek ta nyala iri kandriyen ndra-in iy ndramekes, arile bwai.

¹⁹Iri atehei iy i ta mada sahou badeh, ta budon ma kandriyen tiri in ta bada kei nane nyaran Jises, Pol asehek ta iy amak ndrame awas ja.

²⁰Jo badeh, winiyan basilahei ari san ta anuhun sahou doh, bwai; eme, jo lelen buku iy kaso-ok ta ili hamon kili Jerusalem, kales ta sahou tan ja.

²¹Arile, Pol bwalen, ma iy ndremenya jo katiyani iy kili kon tinan Rom kandremenya Sisa kanuhun sahou doh ja. Jo eme tiye i tan, ta iy kili hamon kili bolo asiu lulik ja, iri lau ta bahun katondrokei iy, winiya le len ta anya katiye iy kili Rom katou Sisa.”

²²Kabin Agripa tiye Pestus, “Jo le amwenen kameh anuhun boho iy ndramak badeh.” Eme Pestus anya, “Mwasin, ou kameh anuhun bohon na bi-i.”

²³Udu, na len ari ja badeh, Agripa uru Banis nyosowani uru na awin turu moroyan, ano uru adek ala bolo asiu tinan tiri ta atukum. Uru ala bolon hawe iri lau tinan ta bahun, ma iri kabin badu kon doh. Eme ma Pestus atehei sahou, ma iri lau ta bahun tiyani Pol eme.

²⁴Pestus anya, “Kabin Agripa, ma hawe aha lau marakon ame ta tukum dah, aha kanyolom iy ndramak dah se, len marakon iri lau badu Juwis arah eme tek ta adai iy ki-iu. Iri amekes udu kon tinan Jerusalem, ma udu dah ale.

²⁵Arile, jo silahei amwenen badeh, iy bamekes ari kandriyen ndra-in ta adai iy imek bwe. Eme ma iy amwenen ndremenya jo katiyani iy kili Rom, ma Sisa kanuhun sahou tan doh ja. Eme ma jo anya katiyani iy kili.

²⁶Arile, jo ari lakou ta atorou ta nyalan ili ta tinan tataha Sisa bwe. Eme, kabin Agripa, jo andrei iy eme ales ere madam, ma aha marakon are kede-eh ale. Taha marakon kanuhun sahou tan op. Ano jo baratou saba sahou tan handru barala ta ramen la-ukei barala ta Sisa.

²⁷Buku jo kandrei ari ndramak badu bolo asiu lulik kili, ano jo batorowenei ramen la-ukei ta tiye tanan ta saba lakou iri atehei iy ili ta mada sahou bwe, jo amwenen anyolom buku kandriyen doh bamwenen bwe.”