Hechos 25:12-27

¹²Tsenam gobernador Festoqa consijaqnincunawan parlarïcur queno nerqan: —Rey cesar jusgashunequipaq mañaconqequirecurmi, cesarman ewanqui —nir.

¹³Tsepita unetanam rey Agripapa warmin Bereniciwan gobernador Festuta watucayänäpaq chäriyarqan Cesarea marcaman.

¹⁴Atsca junaqcuna Cesarea marcacho quedacuyaptinnam, gobernador Festoqa willarqan Pablu presurëcashqanta queno nishpa: —Quechomi juc nuna presu quecan gobernador Felix llawirëcaqta jaqirenqan.

¹⁵Jerusalencho quecaptimi, saserdoticunapa mandacoqnincuna, y israel nunacunapa autoridanincuna pepa contran juc denunsiata churayämorqan, wanunanpaq condenanäta munar.

¹⁶Tsenam queno nerqä: Romanu autoridacunaqa manam llutallatsu nunata wanutsiyä nopäcunacho manaraq contrariuncunawan shimpinacayämuptenqa.

¹⁷Tsemi tse denunsiaqnincuna chäyämonqan warenin, mana tiemputa perdishpa, justisia ruranä despachuman tse nunata qayatserqä.

¹⁸Peru denunsiaqnincunaqa manam pensanqänotsu pepa contran shimpiyämorqan.

¹⁹Unicoqa quiquincunapa creyensiancunallapaqmi y wanushqa Jesusllapaqmi comparienducho parlacäyamorqan. Y tse Jesuspaqmi ‘Cawanmi’ nerqan tse presu Pablu.

²⁰Y tse asuntuta noqa mana cäyirninmi, peta taporqä: ‘¿Jerusalenman eweta munanquicu que asuntiquita tsecho areglanapaq?’ nishpa.

²¹Peru pemi pasita mañacorqan Romacho rey cesar asuntunta areglananpaq. Tsemi Romaman apatsenqäyaq presurananpaq llawicorqö.

²²Tsenam rey Agripa Festuta queno nerqan: —Noqapis tse nuna parlaqta wiyetam munecü —nishpa. Y Festunam nerqan: —Waretämi wiyanqui —nishpa.

²³Waränin junaqnam rey Agripa y warmin Bereniceqa allapa nicachar, justisia rurayänan despachuman yecurerqan soldaducunapa mayornincunawan y tse marcacho alli autoridacunawan. Tsenam Festupa ordenninwan Pabluta aparayämorqan.

²⁴Tsenam Festu nerqan: —Rey Agripa y noqacunawan quecho llapequi juntacashqa quecaq tëtacuna: Canan nopequicunacho quecaq nunapaqmi Jerusalen marcacho y que Cesarea marcacho israel nunacuna denunsiata churayämushqa. Qayaripa qaparipam wanutsiyänanpaq ordenta mañacuyan.

²⁵Peru noqapaqqa que nuna manam ni ima mana allita wanunanpaqnoqa rurashqatsu. Imano captinpis, Romacho rey cesar jusgananpaq quiquin mañaconqanrecurmi pasin qoycorqö.

²⁶Peru manam musyätsu reynintsic cesarman que nunapaq ima nishpa cartacho escribita. Tsemi que juntacashqantsicman qayatsimorqö. Mä canan rey Agripa que nunata shumaq tapupëcur cäyicatsimë cartacho ima nishpa reyninsticman escribinäpaq.

²⁷Porqui noqapaqqa manachi allitsu canman imapeq acusayashqantapis mana willashpa juc presuta Roma autoridaman apecatsiptï.