1ﭑ نَشَ لَامَتُنيِ ندٍ تٌ، مَرِفِ نُ نَ سّرّشّبَدٍ قَرِ. عَ نَشَ عَ يَمَرِ، «سَلِدٍ شُنيِ رَبِرَ، سَلِدٍ سَنيِ عِتَلَ. عَ بِرِن شَ بِرَ مِشِيٍ شُن مَ. ﭑ عٍ شَ دِيٍ هَلَكِمَ نّ سَنتِدّفّمَ رَ. مِشِ كٍرٍن مُ كِسِمَ. مِشِ كٍرٍن مُ عَ نْشُنمَ ﭑ مَ.
2هَلِ عٍ فٌرٌ عَلِفِيَمَ، ﭑ نٍيٍ سُشُمَ نّ. شَ عٍ تٍ كٌورٍ مَ، ﭑ نٍيٍ رَفٌرٌ مَ نّ.
3شَ عٍ عٍ نْشُن ﭑ مَ كَرٍ مٍلٍ فٍيَ قَرِ، ﭑ عٍ قٍنمَ نّ، ﭑ عٍ سُشُ. شَ عٍ عٍ نْشُن ﭑ مَ بَا بُن مَ، ﭑ بْشِمَسٍيٍ يَمَرِ مَ نّ عَ شَ عٍ شِن.
4شَ عٍ يَشُييٍ عٍ شَنِن كٌنيِيَ كُي، ﭑ يَامَرِ قِمَ نّ عٍ شَ عٍ قَشَ سَنتِدّفّمَ رَ. ﭑ نَن ﭑ يَ تِمَ نّ عٍ رَ، كْنْ نَ مُ قِندِ مَ مُنَقَنيِ رَ عٍ بّ، عَ قِندِ مَ حَشَنكَتّ نَن نَ عٍ بّ.»
5مَرِفِ عَلَتَلَ، نَشَن نَ مَنفّ رَ، شَ عَ عَ حَنِفٍ عَ شَ دِن بْشِ رَ، بْشِ سّرّنمَ نّ، مِشِ بِرِن لُ سُننُنيِ كُي، عَ عِتٍمَ نّ، عَ مَن عَ عِفٌرٌ عَلْ مِسِرَ شُرٍ نِلِ نَ بَنبَرَن حّ.
6عَ بَرَ عَ شَ لِنفِرَ تِ كٌورٍ مَ. عَ بَرَ كٌورٍ وَلَشّ لُ بْشِ شُن مَ. عَ يٍ رَكٍلِمَ بَا مَ، عَ رَدِن بْشِ مَ. عَ شِلِ نّ عَلَتَلَ.
7عَلَتَلَ شَ مَسٍنيِ نَن يَ؛ «عِسِرَيِلَكَيٍ، وٌ تِدٍ مُ فبٌ ﭑ بّ عَلْ عٍتِيٌثِكَيٍ؟ ﭑ مُ وٌ رَ مِنِ شّ مِسِرَ بْشِ رَ، عَلْ ﭑ قِلِسِتَكَيٍ رَ مِنِ كَقَتٌرٌ كِ نَشّ؟ ﭑ مُ وٌ رَ مِنِ شّ مِسِرَ بْشِ رَ، عَلْ ﭑ سِرِيَكَيٍ رَ مِنِ كِرٌ كِ نَشّ؟
8وٌ وٌ يَيٍ رَبِ؛ مَرِفِ عَلَتَلَ بَرَ يُنُبِتْييٍ شَ مَنفّيَ تٌ، عَ قَمَ نّ نَ هَلَكِدٍ يِ دُنِحّ بّندّ قُحِ قَرِ.»
9عَلَتَلَ شَ مَسٍنيِ نَن يَ؛ «كْنْ ﭑ مُ يَشُبَ بْنسْي بِرِن هَلَكِمَ. ﭑ يَامَرِ قِمَ نّ عَلَكٌ عِسِرَيِلَ بْنسْي شَ مَيٍفٍتِ. ﭑ عَ عِقٍمَ نّ عَلْ مَالٍ عِقٍمَ كِ نَشّ، عَلَكٌ شْرِ قَنيِ كٍرٍن نَشَ بِرَ.
10كْنْ يُنُبِتْييٍ نَشٍيٍ بِرِن نَ ﭑ مَ حَمَ يَ مَ، ﭑ عٍ قَشَمَ نّ سَنتِدّفّمَ رَ، عٍ تَن نَشٍيٍ عَ قَلَمَ، ‹عِ مُ قَمَ مُشُ حَشَنكَتَدٍ، نَ حَشَنكَتّ مُ مُشُ لِمَ.›»
11«نَ لْشْي ﭑ دَوُدَ شَ مَنفّيَ كَنَشِ عِتٍمَ نّ. ﭑ قَمَ نّ نَ يَءِلَندٍ، ﭑ قَمَ نّ عَ رَكٍلِدٍ عَلْ عَ سِنفٍ.
12عٍ مَن عٍدٌن مَسْتْمَ نّ، عَ نُن سِ بِرِن ﭑ شِلِ سَشِ نَشٍيٍ شُن مَ.» عَلَتَلَ شَ مَسٍنيِ نَن نَ كِ، عَ قَمَ نّ نَ بِرِن نَكَمَلِدٍ.
13عَلَتَلَ شَ مَسٍنيِ نَن يَ؛ «وٌ وٌ يَيٍ رَبِ؛ لْشْييٍ قَمَ عَ لِدٍ، شّ سَيٍ نُن شّ شَبَيٍ وَلِمَ وَشَتِ كٍرٍن نّ. وّنِ بَيٍ نُن شّ سَيٍ، قَن وَلِمَ وَشَتِ كٍرٍن نّ. وّنِ فبٌمَ نّ فٍيَيٍ قَرِ، هَن فٍيَيٍ بِرِن بُندَ.
14ﭑ نَن ﭑ مَ حَمَ رَفبِلٍنمَ نّ عَ شْنيِ كٍلِقٍ رَ كٌنيِيَ كُي. عٍ قَمَ نّ تَا كَنَشِيٍ تِدٍ، عٍ سَبَتِمَ دّننَشّ. عٍ وّنِ بِلِيٍ سِمَ نّ، عٍ عَ وّنِ مِن. عٍ لَاكْي سَمَ نّ، عٍ عَ بٌفِ دٌن.
15ﭑ مَن عٍ رَ سَبَتِمَ نّ عٍ شَ بْشِ مَ. عٍ مُ كٍلِمَ بْشِ مَ سْنْن ﭑ دّننَشّ قِشِ عٍ مَ.» وٌ مَرِفِ عَلَتَلَ شَ مَسٍنيِ نَن نَ كِ.
