Amosi 5:7-15

⁷Ɛ tan bata sariyan maxɛtɛ xɔlɛn na, ɛ bata yo tinxinyaan ma.

⁸A tan nan Dii Tɛmɛ Solofere sare kurun nun Donso sare kurun yɛbaxi kore xɔnna ma, a dimini yalan kuyebaan na, a sogen nagodo kɔɛɛn na, a igen nakeli baani, a na ragodo bɔxɔni tulen na. A tan xili nɛn “Alatala.”

⁹A muxu gbeene halagima nɛn, a e yire makantanxine kala.

¹⁰Ɛ muxun xɔnnantenyama naxan na ɛ makiti, bayo ɲɔndi falan mi rafan ɛ ma.

¹¹Ɛ sɛnbɛtarene yigbɛtɛnma, ɛ balon nasuxuma e ra mudun na. Ɛ bata banxi faɲine ti gɛmɛne ra, koni ɛ mi fama dɔxɔdeni ne kui. Ɛ bata manpa bili nakɔ faɲine si, koni ɛ mi na dɔlɔ minɲɛ.

¹²Amasɔtɔ, n na a kolon ɛ hakɛn nun yulubin gbo. Ɛ tinxin muxune yigbɛtɛnma. Ɛ dimi yi seene rasuxu alogo tɔrɔ muxune nama makiti ɲɔndin na.

¹³Na na a toxi xaxilimaan dunduma, bayo waxatini ito mi fan.

¹⁴Ɛ fanna fen, ɛ xɛtɛ fe ɲaxin fɔxɔ ra, alogo ɛ xa kisi. Nayi, Alatala, Ala Sɛnbɛn Birin Kanna na luma nɛn ɛ xɔn, alo ɛ a fala kii naxan yi.

¹⁵Ɛ xa fe ɲaxin naɲaxu. Fe faɲin xa rafan ɛ ma. Ɛ xa kiti tinxinxin sa. Xa ɛ na liga, yanyina nde, Alatala, Ala Sɛnbɛn Birin Kanna diɲama ɛ tan Yusufu bɔnsɔn dɔnxɛn ma nɛn.