Amos 5:7-15

⁷E huaidu adu gi goodou ala e huli nia haganoho, ga haga hala nia donu o nia daangada!

⁸Ma go Dimaadua dela ne hai nia heduu, nia heduu ala e haga ingoo bolo Madaligi mo Waga dogodolu. Ma go Mee dela e huli di bouli gi di maalama mo di aa gi di boo. Ma go Mee dela e gahigahi mai nia wai o di moana, ga haga doo gi hongo henuailala. Dono ingoo dela go Yihowah.

⁹Mee e daaligi digau ala e maaloo, gei e oho nadau abaaba ala e mau dangihi.

¹⁰Goodou go digau Israel, goodou e de hiihai gi tangada dela e haga gila aga di tonu ge e helekai i di tonu i lodo di gowaa hai gabunga.

¹¹Goodou gu haga haingadaa digau ala e hagaloale, guu kae nia meegai digaula. Malaa, dela ga hidi ai goodou ga hagalee noho i lodo godou hale humalia ala ne hau go goodou gi nia hadu, be e inu nia waini mai i lodo godou hadagee waini humalia ala nogo ngalua ginai goodou.

¹²Au gu iloo eau di hai o godou huaidu ala ne hai mo di logowaahee o godou mee hala ala ne hai. Goodou e hagahuaidu nia daangada humalia, goodou e kae nia hui halahalau o godou gau hagadootonu tilikai, gei goodou e dugu nia donu o digau hagaloale i lodo di gowaa hai gabunga.

¹³Deenei laa, gii noho dee muu i lodo di madagoaa huaidu beenei, deenei di mee dela e kaedahi e humalia belee hai go tangada kabemee!

¹⁴Goodou gi hagamahi heia nia mee humalia, hagalee go nia mee huaidu, bolo gi mouli ai goodou. Deenei laa, Yihowah go di God Koia e Aamua ga madalia goodou i di tonu, be di godou hagamaanadu.

¹⁵Ginagina i nia mee ala e huaidu, aloho i nia mee ala e humalia. Goodou gi daudali hua di tonu i lodo nia gowaa hai gabunga. Holongo, gei Dimaadua ga dumaalia anga gi digau o di guongo deenei ala e mouli hua igolo.