Amos 5:7-15

⁷O amac, taŋ ajam lêŋ biŋgêdêŋŋa ôkwi kêtu gêŋ ŋamakic sec ma akôniŋ biŋgêdêŋ tôŋ gêc nom.

⁸Ŋac taŋ kêkêŋ dam to i totili ma gêjam ŋakesec ôkwi kêtu geleŋŋa to gêgôm geleŋŋa ŋakesec kêsa, ŋac taŋ kêkalem gwêc ma kêsêwa kêsêp nom naŋ, ênê ŋaê gebe Apômtau.

⁹Eŋ geseŋ lau ŋajaŋa su eb tageŋ ma gêgôm malac ŋajaŋa kêtu gasaŋ.

¹⁰Êsêac têntac gedec ŋac, taŋ kêpuc biŋgêdêŋ tôŋ gêmoa sêmêtôc biŋ ŋamala to sê kanôŋ ŋac, taŋ kêsôm biŋŋanô naŋ.

¹¹Amac akwê andu ŋa poc, taŋ apa e ŋatip kêsa naŋ, mago oc aŋgôŋ andu tau ŋalêlôm atom. Amac asê kôm wainŋa ŋajam, mago oc anôm wain tau atom, gebe amac aka ŋac ŋalêlôm sawa tôŋ to akac eŋ, gebe êkêŋ polom êndêŋ amac.

¹²Aê kajala gebe agôm gêŋ alôb-alôb taêsam ma nêm sec kapôêŋanô. Amac taŋ alêsu ŋac gêdêŋ to akôc awa ŋalêsiŋa ma akô ŋac ŋalêlôm sawa auc aŋga amêtôc biŋ ŋamala naŋ.

¹³Kêtu tonaŋŋa tec ŋac tokauc oc ênam tau tôŋ êndêŋ têm tonec, gebe têm tau têm sec.

¹⁴Ansom gêŋ ŋajam, ansom gêŋ sec atom, gebe amoa matem jali. Go Apômtau, lausiŋ undambêŋa nêŋ Anôtô, êmoa êwiŋ amac amboac asôm su.

¹⁵Têmtac endec sec ma têmtac êwiŋ ŋajam to amansaŋ biŋgêdêŋ aŋga mêtôc ŋamala, ec Apômtau, lausiŋ undambêŋa nêŋ Anôtô, taê walô Josepnê gôlôac ŋapopoc.