Amos 5:7-15

⁷Feiengauen chokewe mi sorei mine a pwüngüöch o purätiu mine a pwüng.

⁸Ewe Samol mi Lapalap a föri ekewe fü iter mweriker me öniön. A siwili rochokichin rochopwak ngeni saram o awili rän ngeni pwin. A angei kolukun lematau o ninätiu won fanüfan. Itan ewe Samol mi Lapalap.

⁹A awarato feiengau won ekewe mi pwora, pwe ar kewe imwen maun mi pöchökül ra tala.

¹⁰Ämi oua oput ätewe mi pälüeni mine a pwüngingau lon kapwüng, oua pwal oput ätewe mi eäni kapas mi let.

¹¹Oua ariaföüü ekewe chon wöüngau o eriani seniir ar kewe wiich. Iei mine, inamwo ika oua aüetä imw seni fau mi fal, nge ousap nonom lor. Inamwo ika oua fotuki tanipin wain mi fokun mürina, nge ousap ün wain seni.

¹²Pun üa silei pwe ämi kewe föföringau ra chomong, nge ämi kewe tipis ra watte. Ämi oua ariaföüü ekewe chon pwüng o angei lifangen amichimich, oua pwal epeti ekewe chon mwelele pwe resap angei ar pwüng me lon kapwüng.

¹³Iei mine ekewe mi mirit repwe fanafanala lon ena fansoun, pun ena fansoun a ngau.

¹⁴Oupwe föri mine a pwüng nge sap mine a ngau, pwe oupwe manau. Mürin, Kot ewe Samol mi Unusen Manaman epwe etikemi, usun oua apasa.

¹⁵Oupwe oput mine a ngau o efich mine a pwüng. Oupwe eäni wenechar me lon kapwüng. Eli Kot ewe Samol mi Unusen Manaman epwe ümöümöch ngeni chokewe mi chüen manau me lein chon Israel.