Amos 5:7-15

⁷Gafgow gimed, gimed e pi’in ni gimed be dalibnag e tin nib mat’aw gimed be sasalpiy matwon e girdi!

⁸I SOMOL e ngongliy e pi t’uf, ni fa gal ulung i t’uf ni Pleiades nge Orion fithingan. Ir e be pingeg e nep’ nge rran me pingeg e rran nge nep’. Ma pining e day u maday nge pu’og nga daken e fayleng. I SOMOL fithingan.

⁹Ma thirif u but’ e pi’in nib yargal nge pi naun rorad ni kan yororiy ni fan ko mael.

¹⁰Gimed e girdi’ ni gimed be fanenikay e en be togopluw ko tin de mat’aw ma be weliy e tin rriyul’ u tafen e puf oloboch.

¹¹Gimed be gafgownag e pi’in gafgow gimed be fek e grain rorad u yargal. Ere bay dab kum pired u lan e pi naun ni bfel’ ni malang e mu ngongliyed ngay, ara mu unumed e wayin ko yungi milay’ ko grapes ni bfel’ ya’an nim yunged.

¹²Gu manang feni kireb e denen ni gimed be rin’, nge urngin e yupa’ i oloboch ni kam ngongliyed. Gimed be gafgownag e girdi’ ni bfel’, ma gimed be fek puluwon e sasalap, ma gimed be taleg mat’won e pi’in gafgow u tafen e puf oloboch.

¹³Ere, bin ni bfel’ ni ngan rin’ e ngan th’ab gulngay ko ngiyal’ney nike gel e kireb.

¹⁴Mu nameged ni ngam rin’ed e n’en ni bfel’, ma gathi tin nib kireb, ya ngam fosgad. Ma aram e rriyul’ nra par SOMOL ni Got ni Gubin ma Rayag Rok romed, ni bod ni gimed be yog ni bay romed.

¹⁵Mu fanenikayed e tin nib kireb, me t’uf romed e tin ni bfel’, ma ngam guyed ni tin nib mat’aw e ngan rin’ u tafen e puf oloboch. Ma SOMOL e sana ra runguy e girdi’ ko re nam ney ni pi’in kar mageygad ndar m’ad.