Amos 5:7-15

⁷Wóoy yeen ñiy walbati àtteb yoon, mu mel ni xay, tey jalax dëgg fi pëndub suuf!

⁸Kee sàkk biddiiwi lolli ak biddiiwi cooroon, mooy walbati lëndëm bët set, def bëccëg di guddi. Keey woo walum géej, walal fi kaw suuf. Kookoo di Aji Sax ji.

⁹Moo naan musiba jàyy ci kaw boroom doole, musiba wàccal am tata.

¹⁰Yeena bañ kuy yedde ci pénc, te sib boroom làmmiñ wu maandu.

¹¹Gannaaw yeenay not néew-ji-doole, di foqati ŋëbu peppam, tabax ngeen këri boroom barke, waaye dungeen ko dëkke. Jëmbat ngeen tóokëri reseñ juy tem-temi, waaye dungeen naan ca biiñ ba.

¹²Ràññee naa seen bàkkaar yu bare ak seen moy yu dul jeex. Yeenay tooñ aji jub, di geru, di xañ néew-ji-doole dëgg ci pénc.

¹³Moo tax ku xelu ci jii jamono ne cell. Céy jii jamono ju bon!

¹⁴Sàkkuleen lu baax, ba lu bon, ba dund, Aji Sax ji Boroom gàngoor yi ànd ak yeen, muy li ngeen wax.

¹⁵Bañleen lu bon, bëgg lu baax, di doxal yoon ci pénc. Jombul Aji Sax ji Boroom gàngoor yi baaxe ndesu askanu Yuusufa.