AMOS 7

1

2

3

4

5

6

7

8

9

¹Bena Ḡaubada Iehova ese e haheitalaigu, ia ese kwadi e haboudia heḡaeḡaeva, rei matamatana e tubu louva negana ai; una na rei ena tubu iharuana, pavapava ena rei vada e utua murinai.

²Unu kwadi ese tano reina vada e ania ore murinai, lau na hereva, nato: Ḡaubada Iehova e, lau na noimumu, ba heboga hisi. Iakob ede baine gini toma? Ia na maraḡi herea.

³Bena Iehova ese e helalolaia kerehai; Iehova eto “Ina na basine hekara”.

⁴Taunabunai Ḡaubada Iehova ese e haheitalaigu, na itaia, Ḡaubada Iehova ese hahemaoro e boilaia, lahi ḡauna; bena una lahi ese gadobada e hakaukauava bona tano e araiava.

⁵Bena lau nato: Ḡaubada Iehova e, lau na noimumu, a doko. Iakob ede baine gini toma? Ia na maraḡi herea.

⁶Bena Iehova ese e helalolaia kerehai; Ḡaubada Iehova eto “Ina danu basine hekara”.

⁷Ma e haheitalaigu, na itaia, Ḡaubada na gini-maoro varona amo e haginia habana badibadinai e gini, mai gini-maoro varona ta imana ai.

⁸Bena Iehova ese e hereva henigu, eto, Amos e, dahaka o itaiamu? Lau nato, Gini-maoro varona ta. Bena Ḡaubada eto: A itaia, gini-maoro varona ta egu bese Israel bogaragidiai na atoamu; nega ta ai basina lagaudia hanai lou.

⁹Isaak ena atai gabudia bae ḡaḡae, Israel ena gabu helaḡadia bae vahu; bona Ieroboam ena iduhu na dare amo baina tuari henidia.

¹⁰Bena Amasia, hahelaḡa tauna Betele ai, ese gwaukau e siaia, Ieroboam, Israel pavapavana, dekenai, eto, Amos ese oi ihadikamu dalana e karaia hatamu, Israel besena bogaraginai; tano taudia lalodia na asie heḡereḡere iena hereva iboudiai ihaheaukalaidia ai.

¹¹Badina be Amos na ini e gwau toma: Ieroboam na dare amo do baine mase, bona Israel taudia na edia tano amo bae abidia oho, dauhai bae hanohodia.

¹²Bena Amasia ese Amos e hamaoroa, eto, Mata-hanai taumu e, aola, Iuda tanona ba heau lao, unuseni ai bavaniani bona ba peroveta;

¹³a nega ta ai Betele ai basio peroveta lou, badina be ina na hanua pavapavana ena gabu helaḡana bona basileia ena dubu.

¹⁴Bena Amos ese Amasia e haere henia, eto, Lau na dia peroveta tauna, bona dia peroveta tauna natuna. Lau na mamoe bona sukamore audia ireḡudia tauna;

¹⁵bena Iehova ese manoe serina iḡavana amo e abigu. Bena Iehova ese e hamaorogu, eto, Aola, egu bese Israel ediai ba peroveta.

¹⁶Taunabunai, Iehova ena hereva a kamonai. Oi na o tomu “Israel taudia latadiai basio peroveta bona Isaak iduhuna taudia latadiai basio haroro”.

¹⁷Taunabunai Iehova ini e gwau tomamu: Adavamu na ariara hahinena ai bainela, hanua lalonai; natumu mamaruanedia bona hahinedia na dare ai bae mase, bona emu tano na haida ese bae heharilaia; oi na tano dia ḡoeva ai ba mase, bona Israel na momokani edia tano amo bae abidia oho, dauhai bae hanohodia.