4. Mojžišoskero 21:5-25

⁵a reptinenas pro Del the pro Mojžiš: “Soske amen iľan avri andral o Egipt? Hoj te meras pre pušťa? Se nane ade aňi maro, aňi paňi! A imar amenge nane mištes kale džungale chabenestar!”

⁶Akor o RAJ bičhaďa pro manuša jedovate sapen. On len danderenas a but le Izraelitendar mule.

⁷O manuša avenas ko Mojžiš a phenenas leske: “Kerďam binos, sar reptinahas pro RAJ the pre tu. Mang tut vaš amenge ko RAJ, hoj amendar te odlel kale sapen!” Avke pes o Mojžiš chudľa te mangel vaš o manuša.

⁸O RAJ phenďa le Mojžišoske: “Ker brondzune sapes a prichude les upre pro kaštuno drukos. Te vareko le manušendar, ko sas danderdo le sapendar, dikhela pre leste, ačhela te dživel.”

⁹Avke o Mojžiš kerďa brondzune sapes a prichudľa les upre pro drukos. Te oda, ko sas danderdo le sapendar, dikhelas pre oda sap, ačhelas te dživel.

¹⁰O Izraeliti džanas dureder a kerde peske taboris pašal o Obot.

¹¹Paľis odgele andral o Obot a kerde peske taboris paš o Ije-Abarim pre pušťa, so hiňi pro vichodos le Moabostar.

¹²Odarik odgele a kerde peske taboris andre dolina Zered.

¹³Paľis džanas dureder a kerde peske taboris pro severos le paňestar Arnon pre pušťa, so hin pre hraňica le Amorejenca. O Arnon hin e hraňica maškar o Moabčana the o Amoreja.

¹⁴Vašoda pes andre le RAJESKERE Maribnaskere Zvitki pisinel: “O Vaheb pre phuv Sufa, o dolini paš o Arnon,

¹⁵o dolinakero brehos, so ľidžal ko gavoro Ar a oprinel pes paš e hraňica le Moaboha.”

¹⁶Odarik džanas paš e chaňig Beer, kaj o RAJ phenďa le Mojžišoske: “Zvičin jekhetane le manušen a me len dava paňi.”

¹⁷Akor o Izraeliti giľavenas kadi giľi: “Tu chaňigije, de paňi! Giľaven pal late giľi,

¹⁸pal e chaňig, so kopaľinde avri o vodci! Kopaľinde la avri o kraľa le žezloha the peskere pacenca.” Pal e pušťa gele andro Mattana.

¹⁹Andral e Mattana gele andro Nahaliel, andral o Nahaliel andro Bamot.

²⁰Andral o Bamot gele andre dolina andro Moab, paš o verchos Pisga, khatar dičhol e pušťa Ješimon.

²¹Paľis o Izraeliti bičhade muršen ko Amorejiko kraľis Sichon, hoj leske te phenen:

²²“Domuk amenge te predžal prekal tiri phuv. Na džaha pre tire maľi, aňi andro viňici, aňi na pijaha o paňi andral tire chaňiga. Džaha le kraľiskere dromeha, medik na predžaha tiri phuv.”

²³Ale o Sichon na domukľa le Izraelitenge te predžal prekal leskeri phuv, ale zvičinďa peskera armada a geľa pre lende pro mariben. Doavľa paš o foros Jahac a marelas pes lenca.

²⁴Ale o Izraeliti gele pre lende le šabľenca a zaile lengeri phuv le paňestar Arnon dži paš o paňi Jabbok, ale ča dži paš o Ammončana, bo on zorales stražinenas peskeri hraňica.

²⁵Avke o Izraeliti zaile savore ola fori a bešenas andre savore Amorejengere fori, andro Chešbon the gavora.