Gaalu Sɛʋɛi 21:5-25

⁵Ti tɔɔzeini ga ɓɔɛa GALA daalɔɠɔma ta Moize, ti ɗa ɠɛ ma: «Lee vaa zu wo gi ɠulaai Ezipete yooi ʋa, wo ʋa ga giye, gi ʋa za teʋebai zu? Mazɔlɔɔ ɓulu la ná, ziɛ la ná, niima maanɔɠɔ laamianigi wɔinzeɠea gi ma!»

⁶Názu ɠa Ɠɔoɠɔ GALAGI kaali ɲɔiti teʋeni la nuɓusɛiti daalɔɠɔma, ti ɗa ti ɲi. Izelayɛle nuɓusɛi zaani ga gola.

⁷Nuɓusɛiti ti ʋaani, ti Moize ɠa, ti ɠɛ ma: «Gi kotoi ɠɛɛni, siɛgi zu gi ɓɔɛa la Ɠɔoɠɔ GALAGI laalɔɠɔma ta ɗa ɓɔɠɔi. Niizu, soma è Ɠɔoɠɔ GALAGI maanɛɛnɛ, é kaali tɛiti kula gi ma!» Moize maanɛɛnɛi woni nuɓusɛiti bɛ.

⁸Ɠɔoɠɔ GALAGI gooɠaaʋoteni, é ɠɛ ma: «Kaalii ɓɛtɛ ga kɔlui, è sɛlɛ gulu ɠoozagi ʋa. Zɔi nɔpɛ kaali a ɲiina, é ɠaazuwuzeɠe, é wɛlɛ kaalii tɔna ba, naa la zaa.»

⁹Moize kaalii ɓɛtɛni ga kɔlu ɓɔigi, é sɛlɛ gulu ɠoozagi ʋa. É zo názu ma, nu nɔpɛ kaalii a la ɲiina, é ɠaazuwuzeɠe, é wɛlɛ kaalii ʋa, é ga kɔlu ɓɔigi, naa la mɔ ɠɛni za.

¹⁰Naa ʋoluma, Izelayɛle nuiti ti zeɠeni ti-ʋuuzuʋɛ, ti li, ti ʋu Wɔɓɔte.

¹¹Ti zeɠeni miná, ti li Iye-Aɓalime, nii é teʋebai zu, gaaʋotegai Moaɓe yooi ma, folo ɠulazu ʋelei.

¹²Naa ʋoluma, ti liini, ti ʋu Zeelɛde nɛmɛi zu,

¹³naa ʋolu ti liini, ti ʋu ziɛ wolai Aalenɔn ʋolu ʋelei, ziɛi naa ɠa é yeizu teʋebai zu, é ɗa ɠula Amɔɔl nuiti ta-yooi zu, é ga kwɛpelegi Moaɓe yooi ta Amɔɔl nuiti ta-yooi yɔɠɔzu.

¹⁴Naa ɠa é ba, bogɛ é ɠole, Ɠɔoɠɔ GALAGI ná-kɔɔ vaiti ma zɛʋɛi zu ga: «Waɠɛɓe nii é Sufa, ta ma ɓekegiti, ta Aalenɔn,

¹⁵é ɓɔ ma ɓekegiti ba, ti yeizu Aal taai ʋɔ pelei, tiya ɠa ti ga Moaɓe ɠwɛpelegiti.»

¹⁶Ti zeɠeni miná, ti li Ɓeel. Kɔlɔyeɠei naa ná-fai ɠa é kɛɛni Ɠɔoɠɔ GALAGI ɠɛni Moize ma: «Nuɓusɛiti gaalɛ ba, nà ziɛi veezu ti ya.»

¹⁷Izelayɛle nuiti ti niima wuyei looni, ti ɠɛ ma: «Ziɛi ɠula kɔlɔyeɠei zu, é lɛ! À maamusɛi wo!

¹⁸À kɔlɔyeɠei ʋɛtɛ, nii kundiɠiiti ti bɔɔni, nii nu wolaiti ti bɔɔni ga ta-lukpɔi ta ta-ɓakɔiti.» Ti zeɠeni teʋebai zu, ti li Matana,

¹⁹ti li Naɠaliyɛle, ta Ɓamɔte.

²⁰Ti liini nɛmɛi zu, nii é Moaɓe yooi zu, gizei nii daaseigi ga Pizega, naa unmaʋɛ, ʋɛ ná zɛlɛgai teʋebai maazu.

²¹Izelayɛle nuiti ti keelaiti teʋeni Amɔɔl nuiti ta-masagi Siɠon ma, ti ɠɛ ma:

²²«Va bu, gi leʋe ɗa-yooi zu. Gi la ziɛzu kpalagaa zu, ɓaa kpelea, gi la wa-ɠɔlɔyeɠe ɗɛ ɓɔlezu. Gá ʋilɛsu nɔ pele wolai nɔ ma, eyɛsu gi ɗa-yooi maazuɓudɛ.»

²³Anɛɛ naa ʋe, Siɠon ɠɛlɛni, é la ɓeni ti ʋa, ti ʋa ziɛ ná-zooi zu. É ná-kɔɔɠɔ nuiti pɛ gaalɛɛni ba, é li Izelayɛle nuiti daalɔɠɔma teʋebai zu, é kɔɔi ʋɛɛ ti ʋa Yaɠase.

²⁴Kɛlɛ Izelayɛle nuiti ti vɔnini ma, ti ná-zooi pɛ seɠe, é zo ziɛ wolai Aalenɔn ma, nu yeezazu ʋelei, é li ziɛ wolai Yaɓɔke ʋɔ pelei, nu ɠɔʋɛzuʋɛ, eyɛsu é li Amɔn nuiti ta-ɠwɛpelemaʋɛ, folo ɠulazu ʋelei, ná makɛga ɠɛni de kpekpe.

²⁵Izelayɛle Amɔɔl nuiti ta-laaiti kpein soni, é zei ti zu, Ɠɛseɓon taai la ma mɛɛ, ta maaɠoolii zu geleiti pɛ.