1Sayile ɓɔɛni ná-doun zunui Zonatan ʋɔ, ta ná-botiɠɛ nu wolaiti, ga ti Davide ʋa. Kɛlɛ Sayile ná-doun zunui Zonatan Davide nɛɛni ʋɛ ga gola.
2É Davide ɠoba vaa woni, é ɠɛ ma: «Kɛ̀ɛ Sayile ɠa pɔ ga é è ʋa. Naa ɠa é ba, wɛlɛ ɓɔɠɔ ma, lina sobu, mina ɠula kɛlɛma, lɔɔɠu.
3Gá kɛ̀ɛ, gá ʋaazu ɠulazu, gi ziɛziɛ kpalagi naazu, ʋɛ è lɔɔɠuai ná. Nà ɓɔɛzu kɛ̀ɛ ʋɔ ga ɗa-vai, gè kisu vai ɠwɛɛ, é ʋilɛ è ʋa, gè ʋa, gè bo è ma.»
4Zonatan ɠɛni Davide maamusɛ ɓɔɛiti bosu kɛɛɠɛ Sayile ɠoba, é ɠɛ ma: «Masagi mina ɓɔɠɔ ɠɛ ga sɔba nu ná-botiɠɛ nui Davide ná-faa zu, mazɔlɔɔ é la faa ɠaazani è ma. Kɛlɛ ná-botii pɛ kɛɛʋɛ ga undaanɛ è ʋɛ.
5É ɠikulani zɛnvui zu, é li, é Filiseti nui ʋa, naa ɠɛni ga unmɔɔ faa wola, nii Ɠɔoɠɔ GALAGI kɛɛni Izelayɛle pɛ bɛ. Ɗa ɓɔɠɔi è miná ɠaani, è ɠoozunɛ naama vai zu. Lee vaa zu mu ɗa li ɓɔɠɔ lɔɔzu kotoi naama zii zu, ga è sɔbalala nui ma ɲamai ʋu, lee vaa zu ɗa Davide ʋa nɔ fuun?»
6Sayile woiloni Zonatan ná-kpɔɛiti ma, é ɠɛ ma: «Gè ɠonaa Ɠɔoɠɔ GALAGI ma, nii é vulua, ga Davide la zaa.»
7Zonatan Davide lolini, é naama ɓɔɛiti pɛ bo ma, é lo Davide luɠɔ, é lii la Sayile ʋɔ bɛ. Davide ná-botii lɔɔzeini Sayile ʋɔ bɛ ga mɔungi ɠɛʋele.
8Tɛi kɔɔi lɔɔzeini ʋolu, Davide liini, é kɔɔi ʋɛɛ Filiseti nuiti ba, é vɔni ti ma ga gola, naati ti ʋela ba.
9Zɛnvu ɲɔi nii Ɠɔoɠɔ GALAGI teʋeni, naa lɔɔni Sayile zu, é ɠɛni zeini ná-pɛlɛi wu, ná-kpɛɛin zoni zea. Davide ɠɛni zeini, é ɗa kɔnigi ɠɛin.
10Sayile ɠɛni pɔ ga é Davide zɔ, é kpadɔ pɛlɛi ʋa ga ná-kpɛɛin. Kɛlɛ Davide lɛkpɛni kpɛɛin luɠɔ, kpɛɛin ɓadɔ pɛlɛi ʋa. Davide ɓizɛni, é ʋela. Ma ɓidii nɔ,
11Sayile keelaiti teʋeni Davide ná-pɛlɛlaʋɛ, ga ti ná makɛ, ti ʋa paa sobui. Kɛlɛ Davide anzai Mikale boni ma, é ɠɛ ma: «Ni è la ʋelani za ɓidii, lina, è zaa.»
12É kulani fenɛtɛlɛi laaʋɛ, é zei. Davide ʋelani, é li. Pele ɠana é ɠulani la.
13Naa ʋoluma, Mikale pɛlɛ wu zalei zeɠeni, é da betei zu. É boli ɠɔlɔi zeɠe, é dɔ unba, é seɠei ʋɛɛ ma.
14Siɛgi zu Sayile keelaiti teʋeni da, ga ti Davide zo, é ɠɛni ti ma: «É la ɠɛdɛni.»
15Sayile ti ɠaaɠaleni ma, ga ti Davide ʋɛtɛ. É ɠɛni ti ma: «À zɛ ná-betei zu, wo ʋaa la pɔ̀, nii a kɛ gè paa.»
16Keelaiti ti ɠaleni ma ʋolu, wɛlɛ, pɛlɛ wu zalei ɠa é ɠɛni laani betei zu, boli ɠɔlɔi laani unbu.
17Sayile ɠɛni Mikale ma: «Lee vaa zu è yàavaai ɠani, è ɓe sìli nui ʋa, é ʋela?» Mikale gooɠaaʋoteni, é ɠɛ ma: «Tɔ ɠa kɛai mà: ‹Zɛ̀na, gè li. Ni naa laade, nà è ʋaazu.› »
18Davide ʋela ʋelei ɠana, é li Samiyɛle ʋɔ bɛ Lama. Nii pɛ Sayile kɛɛni, é naati pɛ boni Samiyɛle ma. Naa ʋoluma, ti felegɔ ti liini, ti zei Nayɔte.
19Nuiti ti liini ti ɠɛ Sayile ma: «Wɛlɛ, Davide ɠa Nayɔte, Lama ɠobaʋɛ.»
20Sayile nuiti teʋeni ga ti Davide zo. Kɛlɛ ti liai ma, ti GALA goo wo nu ɓulugi ɠaani, ti ɗa kulakɛlɛma vaiti bo, Samiyɛle loni ti luɠɔ, GALA Zɛnvui yeini ti ma, tiya ɓalaa, ti ɗa kulakɛlɛma vaiti bo.
21Sayile mɛnigai ma, é taɠiligaa leʋeni mɔnɔ, naati ɓalaa, ti ɗa kulakɛlɛma vaiti bo. Sayile taɠiligaa leʋeni ná zeizu zaʋasiɛi, naati ɓalaa, ti ɗa kulakɛlɛma vaiti bo.
22Sayile ɓɔɠɔi liini Lama. Seeliai ma ziɛyeɠe wolai ma, nii é Seeku taazuʋɛ, é gaazaɠagi woni, é ɠɛ ma: «Mini ɠa Samiyɛle ta Davide ti ná?» Ti gooɠaaʋoteni, ti ɠɛ ma: «Ta Nayɔte, Lama ɠobaʋɛ.»
23Diizuʋɛ miná, GALA Zɛnvui yeini ma, tɔ ɓalaa pelei zu, é ɠɛni kulakɛlɛma vaiti bosu, é ɗa li, eyɛsu é zeeli Nayɔte, Lama ɠobaʋɛ.
24Seeliai ma, é seɠei ɠulani ɠɔba tɔ ɓalaa, é ɗa kulakɛlɛma vaiti bo, tɔ ɓalaa Samiyɛle ɠaazu. É looni suɠili, maaɲakai yɛni laani zooi ma, naama voloi, ta ma ɓidii. Naa ɠa é kɛa, ti ɠɛni ma: «Sayile ɓalaa kana GALA goo wo nuiti saama ɓaa?»
