Text copied!
CopyCompare
GALA Sɛʋɛi - 1 Samiyɛle

1 Samiyɛle 7

Help us?
Click on verse(s) to share them!
1Kiliyate-Yeyalime nuiti ti ʋaani, ti Ɠɔoɠɔ GALAGI ná-minazeɠe kesui zeɠe, ti lii la, ti tɛ Aɓinadaɓe ná-pɛlɛi wu, gizei ma. Ti yiimazeɠeni ga ná-doun zunui Eleazaal, ga é ɗa makɛ Ɠɔoɠɔ GALAGI ná-minazeɠe kesui ʋa.
2É lɔɔzei minazeɠe kesui ʋa voloi ma Kiliyate-Yeyalime, suɠoozani gola, kona ʋuufelegɔ (20) leʋeni niina. Naazu Izelayɛle nuiti kpein ti ɠɛni ɓalakpalasu, mazɔlɔɔ wɔin ɠɛni ti ma, ga ti ʋa ʋolu Ɠɔoɠɔ GALAGI ʋɔ.
3Samiyɛle ɠɛni Izelayɛle ʋɛlɛyeɠei pɛ ma: «Ni wa ɠalesu ma Ɠɔoɠɔ GALAGI ma ga wo-yii pɛ, à gala kiligiti kula ɓɔɠɔ zaama, ta saleiti ti-laa ga Asetaatee, wo ɠili Ɠɔoɠɔ GALAGI ʋa ga wo-yii pɛ, wo tɔ ɠila kpe dɛbi, naazu toɠa wo ɠizo, é wo ɠula Filiseti nuiti zea.»
4Izelayɛle nuiti ti Ɓaaleni ta Asetaateiti kpein kulani ɓɔɠɔ zaama, ti la mɔ ɠɛni ani ɠili nɔpɛ dɛbini, kɛni Ɠɔoɠɔ GALAGI ɠila kpe nɔ.
5Samiyɛle ɠɛni ti ma: «À Izelayɛle nuiti kpein gaalɛ ba Misepa, gè Ɠɔoɠɔ GALAGI maanɛɛnɛ wa-vaa zu.»
6Ti ɠaalɛɛni ba Misepa, ti ɗa ziɛi zaɠa, ti ɗa pu ya zooi ma, Ɠɔoɠɔ GALAGI ɠaazu. Ti zugi zoni naama voloi, ti laani zɔ ga ga ta-ɠotoiti, ti ɠɛ ma: «Gi kotoi ɠɛa Ɠɔoɠɔ GALAGI laalɔɠɔma.» Misepa ɠa Samiyɛle ɠɛni ná ga Izelayɛle ná-tukpɔɠaaleʋe nui.
7Siɛgi zu Filiseti nuiti ti mɛnini da ga Izelayɛle ɠaalɛɛʋɛ ba Misepa, ta-ɠundiɠi lɔɔlugɔiti ti deveni ga ti ʋa ti kɔɔi ʋɛɛ Izelayɛle ʋa. Izelayɛle nuiti ti ma wooi mɛnigai ma, ti luani ga gola Filiseti nuiti ba.
8Ti ɠɛni Samiyɛle ma: «Mina maaɠɛ kpɔ, è ɗa wooɠula ade ʋɛ Ɠɔoɠɔ GALAGI ma, ada-ƓALAGI, nii a kɛ é ade ɠizo Filiseti nuiti ma.»
9Samiyɛle baala ziʋoi zeɠeni, nii é ɠɛni dɛ ɲiimii ɓɔlezu, é kula ga gala zalaɠai Ɠɔoɠɔ GALAGI ʋɛ. Naa ʋoluma, é Ɠɔoɠɔ GALAGI maanɛɛnɛni Izelayɛle ʋɛ, Ɠɔoɠɔ GALAGI gooɠaaʋoteni.
10Siɛgi zu Samiyɛle ɠɛni gala zalaɠai ɠulazu la, Filiseti nuiti ti maaɓuɠani Izelayɛle ʋa, ga ti kɔɔi ʋɛɛ ba. Kɛlɛ naama volo ná, Ɠɔoɠɔ GALAGI geeɓadɛ lu golai ʋilini ti zaama, é ti ɓɛ, ti ʋoluazo. Izelayɛle nuiti ti vɔnini ti ma.
11Izelayɛle nuiti ti ɠulani Misepa ʋa, ti ʋilɛ Filiseti nuiti polu, ti ɗa ti ɓɛ, ti ɗa ti ʋaa, ti yɛni Filiseti nuiti polu, eyɛsu ti zeeli Ɓɛte-Kaal taa ɠɔɠɔwuʋɛ.
12Samiyɛle wooɠulani, é ɠɛ ma: «Ɠɔoɠɔ GALAGI ɓɔgɛ ade ʋa, eyɛsu ade zeeli ʋɛ.» É kɔtu wola ɠila seɠeni, naazu é kpadɔ Misepani zɔɠɔzuʋɛ, ta Seen, é daaseigi ʋɛɛ ga Eɓɛn-Ezɛɛl (nii poluʋɛ ga «kpɔba ɠɔtui»).
13Filiseti nuiti gaazu unfegi zeɠeni naazu pa, ti la mɔ ɠɛni ɓudɛni ta-ɠwɛpelemaʋɛ maazu, ti ʋa ʋili Izelayɛle yooi zu ʋele. Mazɔlɔɔ Ɠɔoɠɔ GALAGI yeewuzeɠeni ti laalɔɠɔma Samiyɛle zii ma voloi pɛ daawu.
14Izelayɛle laa wolaiti kpein, niiti ti ɠɛni Filiseti nuiti zea, naati kpein, ti ɠaaɠaleni ma ʋolu, ti zeeli Izelayɛle ya, é zo Ekelɔn, é li Gate, é ʋɛɛ naa maaɠoolii ma yooi pɛ ba, ti ɠulani ti ya. Ziilɛigi ɠɛni Izelayɛle nuiti zɔɠɔzu ta Amɔɔl nuiti.
15Samiyɛle ɠɛni ga tukpɔɠaaleʋe nui, sii ma voloi pɛ daawu, Izelayɛle yooi zu.
16Kona-o-kona, Samiyɛle ɓena leʋe zooi zu, é tɔɔzei Ɓeetɛle, é li Gilegale, é zeeli Misepa, é ɗa Izelayɛle nuiti tukpɔɠaaleʋe, naama laaiti su.
17Naa pɛ poluma, é ɓena ɠale ma Lama, ʋɛ ná-pɛlɛi ɠɛni ná, miná ɠa é ɓena Izelayɛle nuiti tukpɔɠaaleʋe ná. Ná nɔ ɠa é zalaɠa ɠulazuʋɛ ɓɛtɛni ná Ɠɔoɠɔ GALAGI ʋɛ.