1Zunui ta ɠɛni Ɓɛnzamɛn mavofodai zu, nii daa ɠɛni ga Kise, Aɓiyɛle ná-doun zunui ɠɛni de, Aɓiyɛle kɛɛɠɛ ɠɛni ga Selɔɔl, Selɔɔl kɛɛɠɛ ɠɛ ga Ɓekɔlate, Ɓekɔlate kɛɛɠɛ ɠɛ ga Afia, Afia ɓalaa ɠɛni ga Ɓɛnzamɛn mavofodai zu nui ta ná-doun zunu. Kise ɠɛni ga zɛbɛsu nu.
2Zunu loun ɠila ge ɠɛni Kise nii ya, nii daaseigi ɠɛni ga Sayile, zunu loungo ʋapa ge ɠɛni de. Izelayɛle nuiti saama, tanɔpɛ ge la ɠɛni zeelini su pagi zu, é ɠoozani é leʋe ti pɛ ba.
3Yeeta, Kise ná-soovale saaiti ti looni ya, é ɗa ɠɛ ná-doin Sayile ma: «Botiɠɛ nui gila seɠe, wo li, wo soovale saaiti gaiziɛ.»
4Sayile ta ná-botiɠɛ nui ti Efelayime ɠize yooi zuɓizɛni, ti leʋe miná ʋa, ti li ga Salisa yooi zu ʋele, ti la soovale saaiti kaani. Ti liini mɔnɔ ga Saalime yooi zu ʋele, ta Ɓɛnzamɛn yooi zu ʋele, kɛlɛ ti la ti ɠaani pɛ.
5Ti zeeliai ma Sufe yooi zu, Sayile ɠɛni ná-botiɠɛ nui ma: «De ɠale ma taazu, ni naa laade, kɛ̀ɛ ɠa ʋaazu yeemazu soovale saaiti fai ma, é yiizoolɛ ga deye.»
6Ná-botiɠɛ nui ɠɛni ma: «GALA goo wo nui ta ɠa taai nii zu é de luɠɔ, tɔɠɔi wola ɠulaʋɛ, nii nɔpɛ é bosu, naa ɠa ɗa ʋilɛsu. De li, de gaazaɠa, ɓafɔ toɠa de lii ʋele lɛ da-ziɛi niizu.»
7Sayile ɠɛni ná-botiɠɛ nui ma: «Ungo, kɛlɛ leeni ɠa de liizu la zunui tɔna pɔ? Daamianigi ɓega da-ɓɔlɔiti su, vebɛani ɠili ge la de ya, nii da fe GALA goo wo nui ya. Leeni ɠa é de ya?»
8Ná-botiɠɛ nui ɠɛni ma: «Wali ɠila ka dɛ zèa, nà naa ve GALA goo wo nui ya, é pelei lɛ ga deye, nii da ziɛ la.»
9(Mɔungi, Izelayɛle nuiti pɔ bɛ, ta la ɠɛna lia GALA gaazaɠasu, ti ɓena ɠɛ ɓɔɠɔ ma: «À ʋa, ade li wozaɠaa nui ʋɔ bɛ.» Mazɔlɔɔ nii daaseigi ga «GALA goo wo nui» za, naa laa ɠɛni ga «wozaɠaa nui.»)
10Sayile ɠɛni ná-botiɠɛ nui ma: «Gaama ɠa è ya, de liina.» Ti liini ga taai naa zu ʋele, ʋɛ GALA goo wo nui ɠɛni ná.
11Ti ɠɛai ma taa ɠizei lɛɛzu, ti ɠomini ga anzalopoiti, ti ɗa gizei yei ziɛ zaɠazuʋɛ, ti naati gaazaɠani, ti ɠɛ ma: «Wozaɠaa nui ɠa nɛi taazuʋɛ?»
12Anzalopoiti ti ti wooɠaaʋoteni, ti ɠɛ ma: «Ungo, paa ɠa feya wo luɠɔ, paaʋɛ za gá-laazuʋɛ, tɔɔzei taai kpein ka za zalaɠa ɠulazu, zalaɠa ɠula adaʋɛ ma. À li fala.
13Wa ʋaazu kaazu, wa lɛɛna nɔ feya taazuʋɛ, é ʋa ɠɛ é li zalaɠa ɠula adaʋɛ daamii vai ma. À liina fala, wa ka, tɔɔzei nuɓusɛiti ti la daami woga tɔun polu, mazɔlɔɔ toɠa tuyai loo zalaɠai ma pɛ, niiti ti loligai, naati ti ʋa daami wo.»
14Ti liini taazuʋɛ, nu lɛɛzuʋɛ taai zu, Samiyɛle ɗa ɠula ga ti ʋɔ pelei, é ʋa li zalaɠa ɠula adaʋɛ.
15Tama Sayile ʋa ɠɛ é ʋa, folo ɠila ge yɛni naa luɠɔ, Ɠɔoɠɔ GALAGI niima vai lɛ ga Samiyɛle.
16É ɠɛ ma: «Lina, niima yeeɠɛɠalai nɔ zu, nà zunui ta leʋesu è ma, é ɠula Ɓɛnzamɛn yooi zu. Ɗa gulɔi ziɛ ma, è kɛ ga masagi nà-nuɓusɛiti unda, Izelayɛle nuiti. Toɠa ti unmɔɔ, é ti ɠula Filiseti nuiti zea. Mazɔlɔɔ gè nà-nuiti ta-ɓɔlɔi ɠaa, gè ti ɓain gooi mɛniga.»
17Samiyɛle Sayile ɠaai ma, Ɠɔoɠɔ GALAGI ɠɛni ma: «Zunui nii ɠa gè ɠɛni ná-fai wosu è ma, nii ɠa é masadai ɠɛɛzu nà-nuɓusɛiti unda.»
18Sayile maaɓuɠani Samiyɛle ʋa, nu lɛɛzuʋɛ taazuʋɛ, é ɠɛ ma: «Wozaɠaa nui ná-pɛlɛi lɛ ga ze.»
19Samiyɛle gooɠaaʋoteni, é ɠɛ ma: «Nà ɠa gè ga wozaɠaa nui, lo tùɠɔ, de li zalaɠa ɠula adaʋɛ. Ada laamiizu ʋɔɔma za, lina sobu, nà ɓena ga ɗa-ɠidaaʋili faiti kpein suɠula è ma, nà ɓe niina è ʋa, è ɗa li.
20Nii é ga soovale saaiti, ti loai ya ma volo zaʋasiɛ ɠa, mina mɔ yiizoolɛ ga naati, mazɔlɔɔ ti naati kaaʋɛ na. Kɛlɛ é ɓudɛ naa maazu, ani ʋagɔi niiti kpein ti Izelayɛle yooi zu, naati ta ga ɓɛ nɔnɔ? Ɗa laade ɓaa? Ɗa-o, è-ɠɛɛ ná-pɛlɛyeɠei-yo?»
21Sayile gooɠaaʋoteni, é ɠɛ ma: «Lee vaa zu è naa wosu mà? Nɛ̀i gè ga Ɓɛnzamɛn mavofodai zu nui ta nɔ, nii gaalɔiɗai Izelayɛle wolodai kpein su. Kɛ̀ɛ ná-pɛlɛi lɛi é ʋa lɔi Ɓɛnzamɛn wolodamai kpein saama ɓaa?»
22Samiyɛle lɛɛni ga Sayile, ta ná-botiɠɛ nui, daamii wo pɛlɛi wu, é seizu ʋagɔ ve ti ya ʋelelaʋɛ, naama nu ʋuusaʋagɔiti (30) saama, niiti ti lolini daamii wo fai ma.
23Samiyɛle ɠɛni daaɠoli wo nui ma: «Ʋa ga suai gè ɠɛa feeni è ya, ga è makɛ ba yɛ.»
24Daaɠoli wo nui sua ɓalai zeɠeni, é ʋɛɛ baalobai pɛ ba, é ʋaa la, é da Sayile ɠakala. Samiyɛle ɠɛni Sayile ma naazu: «Nii ɠa gè ɠɛa makɛni è ʋɛ, siɛgi zu gè nuiti toligai ma la daamii vai ma, toɠa ná, miina.» Zekana é ɠɛɛni la Sayile ta Samiyɛle ti daamii woni ʋɔɔma naama voloi.
25Naa ʋoluma, ti zeɠeni zalaɠa ɠula adaʋɛ, ti yei ga taazu ʋele. Samiyɛle ta Sayile ti liini, ti zei dooɠo bosuʋɛ, pɛlɛi maazuʋɛ, ti ɗa yɛpɛ.
26Poluma zobui, Sayileni ta ná-botiɠɛ nui ti wuzeɠeai ma, Samiyɛle Sayile lolini dooɠo bosuʋɛ pɛlɛi maazuʋɛ, é ɠɛ ma: «De liina, gè è ʋu ga pele.» Sayileni ti ʋilɛni pelei ma ta Samiyɛle, ti ɗa li.
27Ti zeeliai ma taai ɠwɛmaʋɛ, Samiyɛle ɠɛni Sayile ma: «Bo ɗa-wotiɠɛ nui ma, é leʋe ʋelelaʋɛ.» Naa liini ga ʋelela ʋelei. Samiyɛle ɠɛni Sayile ma: «Lo dɛɛ, nii Ɠɔoɠɔ GALAGI bogai, gè naa lɛ ga ɗe.»
