ሃዋሬታ ኦሶ 24:15-26

¹⁵ኢስቲካ ኡፋይስ ኦꬂዛ ማላ ታካ ናጋራንቻቲኔ ፂሎቲ ሃይቆፔ ዴንዳናይሳ ፆሳን ኣማኔታይስ።

¹⁶ሄሳ ጊሽ ፆሳ ሲንꬃኒኔ ኣሳ ሲንꬃን ሲꬌይ ባይንዳ ሃኖይ ታስ ዳና ማላ ኡባ ዎዴ ሚናይስ።

¹⁷“ታ ዬሩሳላሜፔ ኬዚን ታስ ዳሮ ላይꬅ ጊዲዳፔ ጉዬ ታ ዴሬ ኣሳስ ማዶ ሚሼኔ ፆሳስ ኢሜቲዛ ሚሼ ኤካ ያዲስ።

¹⁸ታና ኢስቲ ፆሳ ኬꬃን ዴሚዳይ ታ ሄሳ ጋꬂሺና፤ ሄ ዎዴ ታ ጌይዛ ዎጋ ፖሊሺን ታናራ ዳሮ ኣሲ ዴና፤ ኦሺኔ ሺሮይካ ዴና።

¹⁹ጊዶ ኣቲን ኢሲያፔ ዪዳ ኢሲ ኢሲ ኣይሁዳ ኣሳቲ ዴቴስ፤ ኢስታሲካ ታና ሞቶስ ጋꬂዛዚ ዲዛ ጊዲኮ ኔ ሲንꬃን ታና ሞቴቶ።

²⁰ሄሳፌ ጉዬ ታ ዱላታ ሲንꬅ ሺቂኮ ታ ኦꬂዳ ቆሆይ ዲኮ ሄ ኣሳቲ ዮቴቶ።

²¹ታና ሃይሳስ ጋꬂዳ ጋሶይ ታ ኢስታ ጊዶን ኤቃዳ ‘ሃይቂዳይታስ ዴንꬂ ዴስ ጋ ዮቲዳ ጊሽ ሃች ፒርዳስ ኢንቴ ሲንꬅ ሺቃዲስ’ ታ ጋዳ ቃላ ꬎቁ ሂስታ ዮታዲስ ኣቲን ሃራ ታ ኦꬂዳ ሚሺ ዴና” ጊዴስ።

²²ፊልኪሴይ ጎዳ ኦጌ ሎዔꬂ ኤሪዛ ጊሽ “ዎታዴሬታ ሃላቃታ ኣዛዚዛይሳ ሉሲዮሲ ዪዛ ዎዴ ታ ኢንቴ ዮዖዛ ጊሽ ቃሾ ጊዲዛ ዮዖ ኢማና” ጊዲ ኢስታ ዬዲዴስ።

²³ጳዉሎሳ ናጊዛ ማቶ ሃላቃይ “ኢዛ ዳሮ ዋይሶንታ ሎዔꬃ ናጋ፤ ኢዛ ላጌቲ ኢዛስ ኮሺዛ ሚሺ ኤኪ ዪኮ ዲጎፋ” ጊዴስ።

²⁴ጉꬃ ዎዴፔ ካሊዲ ፊልኪሴይ ኣይሁዳ ኣስ ጊዲዳ ባ ማቼዮ ዱሪሲላራ ዪዴስ፤ ጳዉሎሳካ ፄይጊዲ ዬሱስ ኪርስቶሳን ኣማኖ ጊሽ ኢዚ ዮቲሺን ሲይዴስ።

²⁵ጳዉሎሲ ፂሎቴꬃ ጊሽ፥ ኣሲ ባርካ ባና ሃሮ ጊሺኔ ቡሮፔ ያና ፒርዳ ጊሽ ዮቲን ፊልኪሴይ ባቢዲ “ሃዒ ኔ ባ፤ ሃራ ዎዴ ታስ ጊጊሺን ታ ኔና ፄይጋ ኤካና” ጊዴስ።

²⁶ፊልኪሴይ ጳዉሎሳፔ ጉቦ ኤካናስ ኡፋይሲ ኦꬂ ናጊዳ ጊሽ ዳሮ ዎዴ ጋካናስ ፄይጊ ፄይጊ ሃሳይሲዴስ።