19साइ ङोंइती गे इन कली मप्रोंइब मुर आन कली कोंइतीक कोंइशा, लोव़ पाइतीनी। मिनु गे “गो लडाइ पाइब का कली सक्ति गेता। गो मुर आन दाते रे का कली ठेयब सेल्ता। १सामुएल १३:१४; १सामुएल १६:१३
20गो आं गेय पाइब, दाऊद कली थित्ता। गो मेको तारी तेल लुक्ताक्ङ।
21मिनु गो मेको कली कोव़नुङ। मिनु सक्ति गेनुङ।
22आ जोरी सत्रुमी मेको कली ग्राने मचाप्नीम। परमप्रभु आ अरेशो मटीबपुकीमी मेको कली दिप्ने मचाप्नीम।
23मेको आ जोरी सत्रु आन कली मेको आ ङोंइती खतम पोक्नुङ। मिनु मेको कली काइ मदाक्ब आन कली साइक्नुङमी।
24आं दाक्शा मप्रोंइतीके नु आं गेना हना यो दाक्तीके मेको नु बाक्ब। मिनु आं नेंमी मेकोमी आ पिया पोक्ने चाप्ब। आ सक्ति बारब।
25गो मेको कली समुन्द्र नु ठेयब खोला नेल्ल कली हुकुम पाइब सेल्नुङ। भजन संग्रह ७२:८
26मेकोमी आं कली ‘गे आं आफ बाक्नीनी। आं परमप्रभु, आं कली श्येत रे प्रोंइब सेरथे फुल्लु बाक्नीनी’ देंब। २सामुएल ७:१४
27गो मेको कली आं ङोंइती जरमेशो तौ सेल्नुङ। रागी ङा पिप नेल्ल आन पिप सेल्नुङ।
28गो मेको कली गेना हना यो दाक्नुङ। मिनु मेको नु पशो कबल खाप्नुङ।
29गो मेको आ चच युइ आन कली गेनायो मग्याम्चा ङा पा वोइक्नुङ। मिनु मेको आ सासन पतीके सरीङ लीम सम्म बाक्ब।
30तन्न मेको आ चच युइपुकीमी आं अरेशो लोव़ प्रोंइतेक्म हना, आं निसाफ पतीके लोव़ मटिम्तेक्म हना,
31आं पचा देंशो, आं फुल्लुम मुशा ब्रेक्शो लोव़ मपाम्तेक्म हना, आं शेंशो मटिम्तेक्म हना,
32गो मेको आन पाप आ पर्बम कोक्केमी सजाइ गेनुङमी। गो मेको आन ठीक मपशो आ पर्बम तुप्शा सजाइ गेनुङमी।
33तन्न गो मेको आन कली आं गेना हना यो दाक्तीकेम मप्रोंइनुङ। आं दाक्शा मप्रोंइतीके मेको नु लीब।
34गो आं कबल नेल्ल खाप्नुङ। आं ङोंइती देंशो लोव़ थमा पा पाइनुङ।
35गो आं नेंमी काले कसम जाता, गो दाऊद कली जोल मपाइनुङ।
36मेको आ चच युइ गेना हना यो लीनीम। मिनु मेको आ सासन पतीके आं ङोंइती नां बाक्म सम्म बाक्ब। भजन संग्रह ७२:१७
37तास्ला खोदेंशो पा मेको आ सासन पतीके गेना हना यो बाक्ब। सरीङ बाक्शो खोदेंशो पा गेना हना यो बाक्ब” देंतीनी। ठेयब सेंदा पाउत्पत्ती ९:१३
38तन्न गे इन तेल लुक्शो कली प्रोंइशो बाक्तीनी। गे इन तेल लुक्शो आ पर्बम शुश गाइक्ताक्नी।
39गे इन गेय पाइब नु पशो कबल प्रोंइशो बाक्तीनी। गे मेको आ सिरपेच खपीम ताइश्शा, ग्रांग्रा दिशो सेल्तीनी।
40आ गारो नेल्ल प्रेश्शा, आ दरवार नेल्ल खतम पोक्तीनी।
41मेको लां रे पा लाइब नेल्लेमी मेको आ मार मार रोइश्शा लाइक्तेक्म। मेको आ नेक्था ङा मुरपुकीमी मेको कली शुक्शी पाइक्तेक्म।
42गे मेको आ जोरी सत्रु आन कली बोल्यो सेल्तीनी। गे मेको आ जोरी सत्रु नेल्ल आन कली ग्येरपाइश्शो बाक्तीनी।
43गे मेको कली ब्रुपाइक्तीनी। मिनु लडाइमी वारच मपाइक्नी।
44गे मेको आ ठेयब दुम्तीके खतम पोक्तीनी। मिनु मेको आ सासन पतीके साम्शा गेतीनी।
45मेको आ ब्रोंइतीके नाक्त इच्का ला सेल्तीनी। गे मेको कली मुनेम सुम्पाइक्तीनी। ठेयब सेंदा पा।
46परमप्रभु यावे, गे गेना सम्म ख्रुइश्शा बाक्नीनी? इन गाइक्चा गेना सम्म मी खोदेंशो पा ब्राइबा?
47परमप्रभु, आं ब्रोंइशा बाक्तीक नाक्त इच्का ला बाक्ब। गे मुर नेल्ल आन कली जाम्शा लाइब सेल्शो बाक्नीनी।
48मार, मुर गेनायो मबेक्थु, ब्रोंइशा बाक्नीमी? सुम आंम कली बेक्तीक रे प्रोंइने चाप्बा ङा? ठेयब सेंदा पा।
49परमप्रभु यावे, इन साइ ङा गेना हना यो दाक्तीके ते लाक्गा? गे दाऊद कली कसम जशा, इन दाक्शा मप्रोंइतीकेमी लोव़ पाइतीनी।
50परमप्रभु यावे, दोपा इन गेय पाइब, गो शुक्शी पा रिश्शा कोव़चा पुंइसीङा, मेको मिम्तीन। गो मारदे जात जात ङा मुरपुकीमी शुक्शी पाइश्शो फाल्चा माल्ङा? मेको यो मिम्तीन। भजन संग्रह ४४:१-२५
भजन संग्रह 89
भजन संग्रह 89:19-50