Salmos 89:19-50

¹⁹Ibagwengine, be-dula-gwage-swilidikmaladga be negburgan oyosad, aba ega be sunmaksad. Be-dulamar-bega-nued-nanadimaladga be sogsagusad: “An dule-wargwen-buled bendaksad. Dulemar-abargi dule-bur-emargi-obindiid-e-nug an odummosad.

²⁰An-mai-David an sunonikid, reyga-guega an-gwallu-wawad, an e-nonogi eosad.

²¹An bendakdii guoed. An-ganguedgine ogannodii an imakoed.

²²E-isdarmalad egi nakosulid, dule-isganamar sabsur-imakosulid.

²³An e-isdarmalad obelogoed, dule-e-isdardakdimaladi an osulogoed.

²⁴An degisadegu David-sabgudii guoed. An-nuggine e-gangued dungumai guoed.

²⁵David, demar-Mediterráneoʼye-nugad-naid-akar, Éufrates-diwar-maidse neg-gani guoed.

²⁶Anga sogoed: ‘Be an-baba, be an-Bab-Dummad-an-abonogedid, be an-edarbedid.’

²⁷Machi-sailaginedga an imakoed, bela reymar-baiganba bur dummadga-megega an imakoed.

²⁸An degisadegu sabgudii guoed, an-ebo-igar-mesisadi degisadegu-mai guoed.

²⁹E-wagan e-sorba negsemamai gumaloed, Igi nibneg degisadegu nai, deyobi e-wagan degisadegu negsemamai gumaloed.

³⁰”Ar e-wagan an-igar-maidgi bangudmalale, an-igar-maidba nanasurmalale,

³¹An-igar-maidgi annadmalale, an-igar-uksadba ibsasurmalale,

³²e-uayasulidaed-ulale, an sabsur-odurdakoed, e-isgusad-ulale, an bibyogoed.

³³Degi-inigwele, an David-sabguosuli bipisaale guosulid, an egi innikidaedi oberguosurbalid.

³⁴An Davidʼbo-igar-mesisadi an bisgosulid, an-ibmar-sogsadi an osulogosurbalid.

³⁵An-nug-islidikid-ular, an unnila irgwennaa ise-sogar imaksad, an Davidʼga gakansaosulid:

³⁶David-sorba, e-wagan degisadegu negsemamai gumaloed. An-asabin, igi dad-ibeler degisadegu-nai, deyobi, e-wagan degisadegu negsemai gumaloed.

³⁷Igi nii nibneggi degisadegu-nai, deyobi, David-e-wagan degisadegu negsemai gumaloed.”

³⁸Degi-inigwele, Bab-Dummad, be Reyga-guega-dule-susadi, be meted, be obachad, a-dulegi bela-bela be uluded.

³⁹Be-maibo be igar-mesisadi be bichisad, e-wagan-degisadegu-negsemai-guoed e-ibe be obelosad.

⁴⁰Bela e-galu-dikar-matusulid e-ibe be omukusad, e-neg-gandikbukmalad e-ibe be obelosad.

⁴¹Bela dulemar-a-igargi-nasdamaladi, e-ibe ibmar atursadamalad. Neggweburmar-e-dikarba-bukmalad egi dodomalad.

⁴²David-e-isdarmalad-e-gangued be ogannosad, e-isdarmalad weligwar-itogega be imaksad.

⁴³David-e-es-suid-nugar sate be imaksad, bila-onogedgine gwen be bendaksasulid.

⁴⁴E-gangued-yeerdakleged e-ibe be osulosad, e-ologana napase e-ibe be meted.

⁴⁵E-birga-dulagudigued e-ibe be osikirmaksad, binged-dummad ega be uksad.

⁴⁶Bab-Jehová, ¿wede degisadegu be dukumai guoe? ¿Wede sooyobi be-urwed degisadegu guoe?

⁴⁷Bab-Jehová, be insao, an-dula-gudiguedi unnila sikwas gued. Degisoggu, ¿ibiga be dule-obinnisa?

⁴⁸¿Ar doa burgosuli degisadegu dula gudiguoe? ¿Ar doa burgwedgine wakinnoe?

⁴⁹Bab-Jehová, be sabguedsailagined, be Davidʼga be-innikidaedba ise-sogar-sogsa-gusadi, ¿bia nade?

⁵⁰Bab-Jehová, be-maimargi-dodolediid, be ebinsao, dulemar-bukidar-angi-dodogedi an ulubgi sediid.