Salmos 89:19-50

¹⁹Unayga acrashayqui runacunata ribilaypami tantiyachirayqui. Paycunatami nirayqui: «Israel runacunapitami jinyunninta acrashcä. Paytaga nogami yanapashcä mas allicho cananpaj.

²⁰Sirbimaj Davidtami acrashcä. Ray cananpämi rispitädu asëtita umanman wiñapashcä.

²¹Paytaga imaypis yanapäshämi. Munaynëwanmi sumaj callpayojyächishaj.

²²Chiquejcunapis manami magangachu. Fiyu runacunapis manami binsengachu.

²³Payta chiquejcunataga llapirishämi. Chay runacunataga ichic-ichicllami rurarishaj.

²⁴Paytaga yanapaycäshämi. Aunishätapis cumlishämi. Yanapaptëmi mas munayniyoj ricaconga.

²⁵Mediterráneo lamarpita Éufrates mayucama mandananpämi camacächishaj.

²⁶Paymi nimanga: ‹Gammi papänë canqui. Diosnë canqui, Salbamaj, imapitapis chapämaj canqui› nir.

²⁷Nogapapis payga guechpa wamrämi canga. Payga cay pachacho caj raycunapita mas munayniyojmi canga.

²⁸Paytaga imaypis chaynöllami cuyaycäshaj. Paywan parlacushätaga manami imaypis rucachishächu.

²⁹Syëlu manaraj ushacashancamaga paypita mirar aywajcuna imaypis mandaycangami.

³⁰«Yachachishäta paycuna gongaycuptin, imanöpis rurananpaj nishäno mana ruraptin,

³¹laynëta mana cumliptin, mandamintöcunata mana wiyacuptin

³²castigashaj gueruwan wiruypapis mana wiyacamashanpita, mana allicunata rurashanpita.

³³Chaypis Davidtaga mana cachariypami cuyaycäshaj. Paypaj imata aunishätapis manami cutiricushächu.

³⁴Paywan parlacushätaga manami rucachishächu. Palabrätaga cumlishämi.

³⁵Davidtaga aunishcä jutëcho jurarmi. Paytaga manami llullapäshächu.

³⁶Paypita mirar aywajcunaga imaypis mandaycangami. Inti caycashancamaga mandaycangami.

³⁷Mandaj cashanga canga quillano. Mana illgaypami mandaycanga syëlu manaraj ushacashanyäga.» Selah

³⁸Chayno aunisha caycashpayquipis manacajmanmi churashcanqui acrashayqui raytaga. Paypäga fiyupami rabyacurcushcanqui.

³⁹Umancho caycaj corönantapis pampamanmi jitarishcanqui. Sirbishojniquiwan alli parlacushayquitapis manami cumlishcanquichu.

⁴⁰Siudänincunapa curralnincunatapis gashargärishcanquimi.

⁴¹Pï-maypis chaypa päsajcunaga munashantami suwapan. Läduncho tiyajcunapis asipan.

⁴²Davidta chiquejcuna callpayoj cananpämi yanapashcanqui. Chaymi binsisha. Cananga chiquejcuna cushisha carcaycan.

⁴³Raypa fïnu sablin caycajcunatapis ronguyächishcanqui. Pillyachöpis mananami yanapashcanquichu.

⁴⁴Munayniyoj caynintami guechushcanqui. Sillunnintapis jitarishcanqui.

⁴⁵Mösu cashan timpupis manami alliga cawachishcanquichu. Pasaypami pengacachishcanquipis. Selah

⁴⁶Tayta Dios, ¿imaycamaraj pacaräcunqui? ¿Fiyupa rabyasha caycashayqui manachuraj päsanga?

⁴⁷Tayta Dios, yarpäriy ari noga päsacojlla cashäta. Runacunaga yupasha watallami cawä.

⁴⁸Manami pipis canchu mana wañöga. Sepultürapitaga manami pipis gueshpinchu. Selah

⁴⁹Tayta Dios, ¿maytaj ñaupata cuyacoj cashpayqui sirbishojniqui Davidta aunishayquega?

⁵⁰Tayta Dios, wiyaycuy ari. Sirbishojcunataga achcaj runami asiparcaycan. Imano gayapashancunatapis shongullächömi yarparaycä.