1शेंतीक कुम्सो। आसाफ आ कुम्सो। परमप्रभु, गे मारदे आंइ कली मदाक्थु, गेना हना यो प्रोंइनीनी? इन भेडा आन कली तशा मारदे गाइक्नीनी?
2साइ इन ग्याप्शो मुर आन कली मिम्तीन। इन के सेल्चा कली श्येत रे प्रोंइशो मुर आन कली मिम्तीन। गे इन बाक्तीक सियोन डांडा कली मिम्तीन। भजन संग्रह ७६:३
3मिनु गे इन ब्रेश्शो खिं कली कोव़थ लने। इन जोरी सत्रुमी इन खिं मोदेंशो पा खतम पोक्तेक्म।
4इन जोरी सत्रुमी इन बाक्तीक नेल्ल खतम पोक्तेक्म। मेकोपुकीमी मेकेर आन छेदर ग्रुक्ताक्मे।
5मेकोपुकीमी रवा तिम्शा, नेल्ल श्येत्थ पोक्ब मुर खोदेंशो पा पाम्तेक्म।
6मेकोपुकीमी ग्येत्थ ङा लाप्चो ङा बुटा आप्शो गारो ङा शी नेल्ल आन खा नु घनमी खतम पोक्तेक्म।
7मेकोपुकीमी इन खिं कली मी सुइक्ताक्म। रागीमी इन ग्रुम्तीक खिं नेल्ल मी सुइश्शा खतम सेल्तेक्म। २राजा २५:९
8मेकोपुकीमी आन थुंमी “गो एको आन कली नेल्ल खतम पोक्नीकी” देंतेक्म। मेकोपुकीमी रागीम बाक्शो इन नेंम बुक्तीके खिं नेल्ले मी सुइक्ताक्म।
9गोपुकीमी मारेइ छक लाक्चा ङा गेय मतक। मुल परमप्रभु आ लोव़ पाइब सुइ मलीम। गेना सम्म एको ओदेंशो दुम्बा, गो सुइम मतुइक्नीकी।
10परमप्रभु, इन जोरी सत्रुमी इन कली गेना सम्म शाक्नीमी? मार, जोरी सत्रुमी इन नें आ पर्बम गेना हना यो शुक्शी पस ङा पस बाक्नीमी?
11गे मारदे इन सक्ति मकोंइनीनी? इन गुइ इन वा आगा रे ग्रुंइदीन। मिनु मेको आन कली खतम पोक्कीन।
12परमप्रभु, गे साइ नेसी रे ङा आं पिप बाक्नीनी। गे रागी रागी आन कली प्रोंइनीनी।
13गे इन सक्तिमी समुन्द्र कली फ्राताक्नी। गे समुन्द्रमी बाक्ब ठेयब जन्तु आन पिया प्रोल्तीनी। भजन संग्रह १०४:६-८; प्रस्थान १४:२१-२२; यसैया २७:१
14गे लेव्याथन आ पियापुकी प्रोल्तीनी। मिनु मेको कली गोरशो रागी ङा जन्तु आन कली ब्वचा गेतीनी। अय्युब ४०:२५
15ब्वाक्कु बुक्पाइक्ब नु खोल्सा सेल्ब गे बाक्नीनी। मिनु गे गेना हना यो यिस ङा यिस बाक्ब ठेयब खोला आन कली सोव़पाइक्तीनी।
16नाक्दो इन के बाक्ब। मिनु नाक्ती यो इन के बाक्ब। गे नां नु तास्ला सेल्तीनी। भजन संग्रह १०४:१९
17गे रागी रागी आन सांद वोइक्तीनी। गे हिंउद नु बर्खा सेल्तीनी।
18परमप्रभु यावे इन जोरी सत्रुमी इन कली दोपा शाक्ग्मे। मिनु इन कली मटीबपुकीमी दोपा इन नें आ पर्बम शुक्शी पामे? मेको मिम्तीन।
19गे इन ढुकुर ब्वाकी ङा जन्तु आन कली मगेने। गे इन श्येत जशो मुर आन कली गेना हना यो मिम्शा बाक्कीन।
20गे इन कबल खपीन। मारदे हना रागी ङा ख्रुइक्तीके नेल्ले हिंतीके नु हुश ख्राक्श पतीकेमी ब्रीशो बाक्नीम।
21दिप्चा पुंइसीब आन कली मुने दोक्चा मगेने। प्रुङग नु श्येत जाइबपुकीमी इन नें ठेयब सेल्मेक्ल।
22परमप्रभु, बोक्कीन। मिनु इन पर्बम लडाइ पने। मटीबपुकीमी नाक्त रे इन कली शाक्शो, मिम्तीन। भजन संग्रह १४:१-३
23इन पर्बम दूली लोव़ पाइब आन रेयके नु इन जोरी सत्रु आन लडाइ पस ङा पस पशो मप्रेंदीन।
भजन संग्रह 74
भजन संग्रह 74:1-23