Kölfel 74:1-23

¹Echö än Asaf kölün kait. Ai Samol mi Lapalap, pwota ka pöütikeemila tori feilfeilachök? Pwota ka chök sosong ngeni noum kewe aramas?

²Kopwe chechemeni noum we mwichen aramas, ka filiir me lomlom, chokewe ka angaseer pwe repwe chon om ainang. Kopwe pwal chechemeni ewe chuk Sion, ia ka nonom ie me lom.

³Kopwe fetal ngeni ekewe lemol imw mi tala seni me lomlom. Ekewe chon oputom ra ataela meinisin mine a nom lon ewe imwenfel.

⁴Chon palüenuk ra akürang lon leniom mi pin. Ra aürätä ar filäik pwe asisilen ar win.

⁵Ra wewe ngeni chon pöküpök irä mi pökü irä lein wöllap ren ar kouk.

⁶Ra äsätätiu ellingen won ekewe ettip mi rup meinisin ren kouk mi watte me kükün.

⁷Ra ataela imwom imwenfel o kenala, ra apiningaua ewe leni ia aramas ra fel ngonuk ie.

⁸Ra kapasfengen lefiler, “Sipwe aroserela meinisin.” Iwe, ra kenala ekewe leni meinisin ia aramas ra fel ngeni Kot ie me lon ewe fanü.

⁹Ach kewe asisil mi pin meinisin rese chüen nom, ese chüen wor eman soufos, nge esap wor eman me leich a silei inet epwe ükütiu ei lapalap.

¹⁰Ai Kot, ifa ükükün fansoun än ekewe chon oputakem repwe esitok? Ifa usun, repwe turunufasei itom tori feilfeilachök?

¹¹Pwota kosap mochen alisikem? Pwota ka uwala poum lükisökürum?

¹²Nge ai Kot, en ai king seni me lomlom, ka amanaua aramas won unusen fanüfan.

¹³En ka kinifeseni ewe matau ren om manaman, ka amökkü möküren ekewe trakon mi nom lematau.

¹⁴Ka atatakisi ekewe möküren ewe man itan Lefiatan , ka pwal aochocha fitukan ngeni ekewe mönün lon fanüapö.

¹⁵Ka amichätä puächen koluk me öüwö. Nge ka apwasatä ekewe chanpupu mi pufochofoch.

¹⁶En ka föri rän me pwin. Ka anomu lon lenier maram me akkar.

¹⁷Ka föri kiännin fanüfan, ka pwal föri fansoun pwichikar me fansoun patapat.

¹⁸Ai Samol mi Lapalap, kopwe chechemeni usun ekewe chon oputom ra esitok, usun ekewe aramas mi umwes ra turunufasei itom.

¹⁹Kosap likitala noum kewe aramas mi apwangapwang ngeni ekewe chon oputer mi fokun ingau, kosap pwal manlükala noum aramas mi nom lon riaföü tori feilfeilachök.

²⁰Kopwe chechemeni om we pwon ka eäni ngenikem. Pun föförün mwäneson a chök fifis lon ekewe leni mi kiroch me lon ewe fanü.

²¹Kosap mwütätä pwe ekewe mi riaföü repwe säw. Nge ekewe mi wöüngau me osupwang repwe mwareituk.

²²Ai Kot, kopwe ütä, kopwe püsin kapas fän itom, kopwe chechemeni än ekewe aramas mi umwes esitok iteiten rän.

²³Kosap manlükala pupuchörün ekewe chon oputom me akürangen ekewe chon ü ngonuk mi chök fifis ngonuk.