13मेकोपुकी रोइ पामेनु, गो अरन्डी फेक्शा, माइजा बाक्शा, सुर्ता पाता। गो बाप्शा मेको आन पर्बम परमप्रभु कली पुंइता। अय्युब ३१:२९
14आं वारच नु आं लोक्ब आन पर्बम खोदेंशो पा, मेको आन पर्बम रोंका पाता। आं ममा आ पर्बम खोदेंशो पा आं पिया खुक्शा, रोंका पाता। रोमी १२:१५
15तन्न गो दाइल पांइसीङानु, मेकोपुकी रिश्शा, आं पर्बम शुक्शी पचा कली बुक्तेक्म। आं मतुइश्शो शुक्शी पाइबपुकी आं कली मरिम्शो पचा कली बुक्तेक्म। मिनु मेकोपुकीम आं कली शुक्शी पस ङा पस पतीमी।
16मेकोपुकी नेल्ल क्येङा मरिम्शो दुम्शा, शुक्शी पा, आन ख्रुइ शेप्नीम।
17परमप्रभु, गे गेना सम्म मेको आन कली कोव़शा बाक्नीनी? परमप्रभु मरिम्शो पाइबपुकी रे आं कली प्रोंइयीनी। आं कली नेल्ल क्येङा बोल्यो मुर रे प्रोंइयीनी?
18मिनु गो शुश मुर आन ङोंइती इन कली “गे ठेयब बाक्नीनी” देंनुङ। ठेयब हुल आन दातेमी इन कली कुम्सो पा ठेयब सेल्नुङ।
19मेकोपुकी मोशान आं जोरी सत्रु दुम्शा, आं पर्बम ग्येरचा मतामेक्ल। मोशान खेदा पाइबपुकी आं पर्बम आन मिक्च रिक्चा मतामेक्ल। भजन संग्रह २५:१९; भजन संग्रह ६९:५
20मारदे हना मेकोपुकी थुं नाइश्शा बाक्तीक आ पर्बम लोव़ मपाइनीम। रागीम थुं नाइश्शा बाक्ब आन कली जोल पा दोस गेचा कली मिम्नीम।
21मेकोपुकीमी ठेयब शोव़ सेल्शा, आं पर्बम “आहा आहा, आंइ मिक्चीम तचा ताइतक” देंनीम।
22परमप्रभु यावे, गे एको ताइतीनी। मिनु सिक्सी पा मबाक्कीन। परमप्रभु यावे आं क्येङा ङोन मदुमीन।
23बोक्कीने। मिनु आं कली वारच पाइय्यीनी। परमप्रभु, आं परमप्रभु यावे, आं पोन बोक्कीन।
भजन संग्रह 35
भजन संग्रह 35:13-23