1दाऊद आ कुम्सो। परमप्रभु यावे, गो आं थुंमी इन नेक्था दुम्नुङ।
2आं परमप्रभु, गो इन कली मिम्शा, महिंथु बाक्शो बाक्नुङ। गो मुने मदोक्ङल। आं जोरी सत्रु आं क्येङा मग्रामल।
3इन लां कोव़ब नेल्ल मुने मदोक्मल। मोशान श्येत गेबपुकी चहिं मुने दोक्मल।
4परमप्रभु यावे, आं कली इन लां कोंइदीनी। इन गाक्तीक लां शेंदीनी।
5इन थमा पतीकेम आं कली गाक्चा, शेंदीनी। मारदे हना गे आं कली श्येत रे प्रोंइब परमप्रभु बाक्नीनी। गो नाक्त रे इन लां कोव़शा, बाक्नुङ।
6परमप्रभु यावे, इन शिशी नु गेना हना यो दाक्तीके कली मिम्तीन। मारदे हना मेको साइ ङोंइती रेन बाक्त।
7गो ठिटा बाक्ङा ना आं पशो पाप नु आं मरिम्शो पशो प्रेंदीन। परमप्रभु यावे, इन गेना हना यो दाक्तीके नु रिम्शो पतीकेम आं कली मिम्तीन।
8परमप्रभु यावे रिम्शो नु रिम्शो थुं पाइश्शो बाक्ब। मोपतीके मेकोमी पाप पाइब आन कली आ लां आ पर्बम शेंब।
9ब्रेम्शो आन कली ठीक लां कोंइशा, आ लां शेंब।
10परमप्रभु यावे आ कबल नु आ देंशो टीब नेल्ल परमप्रभु आ गेना हना यो दाक्तीके नु आ दाक्शा मप्रोंइतीकेमी ब्रीशो बाक्नीम।
11परमप्रभु यावे, आं पाप ठेयब बाक्त हना यो, इन नें आ पर्बम आं ठीक मपशो माफ गेयीनी। प्रस्थान ३४:६-७
12सु सुमी परमप्रभु यावे कली मान पा हिंनीमी, मेको आन कली तेको लां लचा माल्नीमी, मेको शेंब।
13मिनु मेको आन माल्शो नेल्ल तशा, आन थुं नाइक्नीम। मेको आन आलपुकीम मेको रागी ताइनीम। भजन संग्रह ३७:९
14परमप्रभु यावे आ कली मान पा हिंब आन वारच बाक्ब। मिनु मेको आन कली आ कबल शेंब।
15गो गेना हना यो परमप्रभु यावे गे ला कोव़नुङ। मारदे हना मेकोमी आं खोइली ब्वारद रे प्रोंइब।
16गे आं गे हिरसीने। मिनु आं कली शिशी पाइय्यीनी। मारदे हना गो आं का दुम्शा, श्येत जशो बाक्नुङ।
17आं थुं ङा श्येत बारशो बाक्नीम। मेको श्येत रे प्रोंइयीनी।
18आं श्येत जशो नु आ थुं खाइश्शो कोव़ङीन। मिनु आं पशो पाप नेल्ल क्याम्दीने।
19आं जोरी सत्रु आन कली कोव़ङीन, मारदे हना मेको शुश बाक्नीम। मिनु मेकोपुकीमी आं कली काइ मदाक्नीम। भजन संग्रह ३५:१९
20आं कली खाल पा प्रोंइयीनी। गो मुने मदोक्ङल। मारदे हना इन कली जिम्मा गेसाक्यी।
21रिम्शो पतीके नु रिम्शो थुं बाक्तीकेमी आं कली खाल पयील। मारदे हना गो इन लां कोव़शो बाक्नुङ।
भजन संग्रह 25
भजन संग्रह 25:1-21