عِسِرَيِلَ مَنفّيٍ ٢ 10:7-27

⁷عٍ تٌ نَ بَتَاشّ مَسْتْ، عٍ نَشَ مَنفّ شَ دِ مِشِ تٌنفٌ سٌلٌقٍرٍ بِرِن شُنيِ بٌلٌن عٍ دّ عِ، عٍ عٍ سَ سَفَيٍ كُي، عٍ عَ رَ سَنبَ يٍهُ مَ يِسِرٍيلِ.

⁸شّيرَ نَشَ سَ عَ قَلَ يٍهُ بّ، «عٍ بَرَ قَ مَنفّ يٌرَ مِ شَ دِيٍ شُنيِيٍ رَ.» يٍهُ نَشَ عَ يَمَرِ، «عٍ مَلَن دْشْ قِرِن تَا نَادّ رَ هَن فّيسّفّ.»

⁹نَ كُيٍ عِبَ، يٍهُ نَشَ مِنِ، عَ تِ حَمَ يَ عِ، عَ قَ عَ قَلَ عٍ بّ، «يُنُبِ مُ وٌ مَ. ﭑ تَن نَن ﭑ مَ مَنفّ يَنقَشِ، ﭑ عَ قَشَ. كْنْ ندٍ يِ مِشِيٍ تَن قَشَشِ؟

¹⁰وٌ شَ عَ كٌلٌن، عَلَتَلَ شَ مَسٍنيِ بِرِن بَرَ كَمَلِ عَكَبُ بْنسْي شِلِ مَ. عَلَتَلَ نَشَن مَسٍن عَننَبِ عٍلِيَ سَابُي رَ، نَ بَرَ كَمَلِ.»

¹¹يٍهُ نَشَ عَكَبُ بْنسْي بِرِن قَشَ نَشٍيٍ نُ نَ يِسِرٍيلِ، عَ شَ كُنتِفِيٍ، عَ بٌورٍيٍ، نُن عَ شَ سّرّشّدُبّيٍ. عَكَبُ شَ مِشِ كٍرٍن مُ كِسِ.

¹²نَ دَنفِ شَنبِ، يٍهُ نَشَ سِفَ سَمَرِ. عَ نُ نَ بٍتِ عٍكٍدَ شُرُ سٍيٍ كِرَ شْن مَ تّمُي نَشّ،

¹³يٍهُ نَشَ يُدَيَ مَنفّ عَشَسِيَ نفَشَكٍرٍنيِ ندٍيٍ تٌ. عَ نَشَ عٍ مَشْرِن، «ندٍ نَ وٌ تَن نَ؟» عٍ نَشَ عَ يَابِ، «عَشَسِيَ نفَشَكٍرٍنيِيٍ نَن مُشُ رَ. مُشُ نَ سِفَقٍ مَنفّ نُن مَنفّ نفَ شَ دِ شّمّيٍ نَن شّيبُدٍ.»

¹⁴يٍهُ نَشَ يَامَرِ قِ، «وٌ عٍ سُشُ عٍ حِحّ رَ.» عٍ نَشَ عٍ سُشُ، عٍ عٍ بِرِن شَنِن بٍتِ عٍكٍدَ، عٍ عٍ كْن نَشَبَ مّننِ، عٍ عٍ وْلِ يٍ رَفَتَدٍ كُي. عٍ كْنتِ نُ لَنشِ مِشِ تٌنفٌ نَانِ نُن قِرِن نَن مَ. مِشِ كٍرٍن مُ كِسِ.

¹⁵عَ تٌ كٍلِ مّننِ، عَ نَشَ رٍكَبُ شَ دِ يٍهٌنَدَبٌ لِ كِرَ شْن مَ، نَ نُ قَقٍ عَ رَلَندٍ. يٍهُ نَشَ عَ شّيبُ، عَ عَ مَشْرِن، «عِ حَنِفٍ قِيشّشِ ﭑ بّ، عَلْ ﭑ فبٍ قِيشّشِ عِ بّ كِ نَشّ؟» يٍهٌنَدَبٌ نَشَ عَ يَابِ، «عِيٌ.» يٍهُ نَشَ عَ قَلَ عَ بّ، «شَ عَ نَ نَ كِ نّ، تٍ بٍ ﭑ سّيتِ مَ ﭑ مَ فِسٍ كُي.» يٍهُ نَشَ عَ بّلّشّ عِتَلَ يٍهٌنَدَبٌ بّ، عَ عَ رَتٍ عَ شَ فِسٍ كُي.

¹⁶يٍهُ نَشَ عَ قَلَ عَ بّ، «وٌن شّي، عِ شَ عَ مَتٌ ﭑ نَ وَلِقٍ عَلَتَلَ بّ سّنبّ نَشَن نَ.» عَ نَشَ عَ شَنِن عَ شُن مَ عَ شَ فِسٍ كُي.

¹⁷عٍ تٌ سٌ سَمَرِ، يٍهُ نَشَ عَكَبُ شَ مِشِ دْنشْي بِرِن سْنتْ قٍوٌ، عَلْ عَلَتَلَ نُ بَرَ عَ مَسٍن كِ نَشّ عَننَبِ عٍلِيَ سَابُي رَ.

¹⁸نَ شَنبِ، يٍهُ نَشَ حَمَ بِرِن مَلَن، عَ عَ قَلَ عٍ بّ، «وٌ شَ عَ كٌلٌن، ﭑ قَمَ بَلِ كُيٍ بَتُدٍ دَنفِقٍ عَكَبُ رَ.

¹⁹يَكْسِ قَ وٌ بَلِ كُيٍ شَ نَمِحْنمّيٍ بِرِن مَشِلِ، عَ شَ سّرّشّدُبّيٍ بِرِن نُن عَ بَتُمَ بِرِن، كٍرٍن نَشَ لُ. عٍ بِرِن شَ قَ ﭑ يِرٍ، بَرِ مَ ﭑ وَ مَ سّرّشّ فبٍفبٍ بَقٍ بَلِ كُيٍ بّ. شَ نَشَن يٌ مُ لَن نَ سّرّشّ، ﭑ نَ كَنيِ قَشَمَ نّ.» كْنْ نَ مَسٍنيِ كُي، يٍهُ نُ وَ مَ عٍ مَدَشُقٍ نّ، عَلَكٌ عَ شَ بَلِ كُيٍ بَتُي بِرِن سْنتْ.

²⁰يٍهُ نَشَ يَامَرِ قِ، «وٌ شُلُنيِ بٍلٍبٍلٍ تِ بَلِ كُيٍ بّ.» عٍ نَشَ نَ مَسٍنيِ تِ حَمَ بّ.

²¹يٍهُ نَشَ شّيرَيٍ رَ سَنبَ عِسِرَيِلَ بْشِ يِرٍ بِرِن مَ. بَلِ كُيٍ بَتُي بِرِن نَشَ قَ. كٍرٍن مُ لُ، نَشَن مُ قَ. عٍ بِرِن نَشَ سٌ بَلِ شَ سَلِدٍ كُي، عَ رَقٍ تَثُ.

²²يٍهُ نَشَ يَامَرِ قِ، فُبَ شَ رَفٌرٌ بَلِ كُيٍ بَتُي بِرِن مَ. عٍ نَشَ نَ رَبَ.

²³يٍهُ نُن رٍكَبُ شَ دِ يٍهٌنَدَبٌ نَشَ سِفَ بَلِ شَ سَلِدٍ كُي، يٍهُ قَ عَ قَلَ عٍ بّ، «وٌ عَ مَتٌ، عَلَتَلَ شَ مِشِ يٌ نَشَ لُ وٌ يَ مَ. بَلِ كُيٍ بَتُي نَن فبَنسَن شَ لُ بٍ.»

²⁴يٍهُ نُن مِشِيٍ نَشَ سٌ، عٍ شَ شُرُ سٍيٍ بَ سّرّشّ رَ بَلِ كُيٍ بّ. يٍهُ نُ بَرَ سْورِ تٌنفٌ سٌلٌمَسَشَن تِ تَندٍ، عَ عَ قَلَ عٍ بّ، «شَ يِ كُيٍ بَتُي مِشِ كٍرٍن عَ بَ وٌ يِ رَ، ﭑ وٌ نِي نَن قِندِ مَ عَ حْشْي رَ.»

²⁵عٍ تٌ فّ سّرّشّ بَدٍ، عَ نَشَ عَ قَلَ عَ شَ سْورِ فبَنفبَلَنيِيٍ بّ، «وٌ سٌ، وٌ عٍ بِرِن قَشَ، مِشِ يٌ نَشَ كِسِ.» سْورِيٍ نَشَ عٍ قَشَ عٍ شَ سَنتِدّفّمَيٍ رَ، عٍ عٍ قُرٍ لُ نَا. نَ دَنفِ شَنبِ، عٍ نَشَ سٌ يِرٍ بَلِ كُيٍ نُ رَفَتَشِ دّننَشّ.

²⁶عٍ نَشَ نَ كُيٍ مَسٌلِشِ رَ مِنِ، عٍ عَ فَن.

²⁷عٍ بَلِ كُيٍ نُن عَ شَ سَلِدٍ كَنَ، عٍ نَا قِندِ سُتُرَدٍيٍ رَ. هَن تٌ سُتُرَدٍيٍ نَن نَ مّننِ رَ.