Te Israel me Juda Hani Sigo Tuni Bidigo Po Elalubo Buku Si 10:7-27

⁷Tialima, te genuai bidi dabe augwaligo te Jehugo te pas sali, tama augwaligo te Ahapgo hani ogomani te bidi sese sela olama, te nogo si bidi, te 70, te augwaligo elama, isilali. Tama augwaligo te bage tobolu togolama, tama augwaligo te basket wa dabeba bulama, te Jehubolo tolali, te Jesril hanuba.

⁸Te sogo Jehugo te po odali, te bidi dabego te Ahapgo ogomani tobolu togolama, augwaligo teba muagasali po odali, tama agai te bidi dabebolo e tama po wali, “Augwaligo te bage tobolu pesage te taun tomoba pabo tų sesegede te pąde tobolu pesage si sisinao, tama augwaligo te tobolu dabe munalubadi, te doba tama usu nigi pomainao,” wali.

⁹Do kigamu te giliga asai badi, tama te Jehu hodasa pelama, te taun tomoba asobo tų sesegeba pelama, te tobolu dabe munalubo sugi pai. Umabo we bidi sisinama bidibo sulama, tama Jehu aga doligulama, tama agai augwalibolo e tama po wali, “Ena digi ena homugo te Joram aga eno aiyaba elaluai dao. Tama tialima, eno aga elama, isilai dao. Tama eno koneanio, dagego bidi me ela mubo menio. Tiali goli, te dego mu te hani ela muaniwe? Dago konebeo.

¹⁰Tiali goli, tego da e tama ola mawai, tigidali po te Genuai Bidigo te Ahapgo hani dali polobadu wai po naga dao, te mu te pedalobo sę naga ebao. Te Godigo sę ebo profet bidi Elaijago pedauwalidu wali te dąų wali poba te megi Genuai Bidi usu na silibao,” wali.

¹¹Tama tialima, nosali Jehugo te Ahapgo hani te Jesril taunde bidali deli hani te Jehugo ela silali. Me te aga sę ebo gavman bidi me, me aga dwagi yai hai namu me, tama me te pris bidi dabe me, tama te bage augwali tigidali te Jehugo augwali me deli me bidibo sula tagalobe. Mu meni.

¹²Tialima, te Jehu dali, te aga ami soldia bidi dabe dali, augwaligo te Jesril hanu tagalama, te augwaligo homugo te Samaria hanuba painu homu yali. Tama augwali te tųdu wali pelama, tama augwali te bulu me deliba sabaligi pai, te bulu nogi da Te Kibu Sipsip Tonalubo Bidi Dabego Sisinibo Pesage da.

¹³Tama augwaligo te me badu bidi dabe sulama sisinibo si, tama augwaligo e tama po hanalu wali, “Dage mena pedai badu asaiwe?” Tama augwaligo te po wei ponoyu, e tama po wai, “Da da, te king Ahasiago hani dao,” wali. “Dago homugo te Jesril hanuba sobao, te king Joramgo hani ebadi, te kwin Jesebelgo hani dabe ebadi elama, te augwali dago suainu sobao,” wali.

¹⁴Jehugo te po odali, tama aga hanibolo e tama po augwalibolo wali, “Te bidi dabe augwali polo tuao.” Tama augwaligo te bidi dabe tigidali tulama, tama augwaligo te bidi dabe te moni maguludawe elalubo madigi te bidi dabe odasa pai. Tama augwaligo te king Ahasiago hani tigidali ela silali, me deli me munu me bidibe. Te augwaligo namba te bidi sese si olama, te ugwadu si tama usu, bidi 42 isali.

¹⁵Te Jehu dali, te aga ami soldia bidi dabe dali, augwaligo te bulu tagalama, tama augwali pobadi yaide, tama augwaligo te bidi me suali, te bidi nogi Jonadap, te bidi te Rekapgo ogwa da. Tama te Jehugo te bidibolo te giligade dao po wali, tama agai agabolo e tama po wali, “Eno homugo te nago ebo homu kolesaga te godolo mu ebo. Tama tialima, nage magi yaliwe, eno e ebo sęde nago bugai homu pemene ebawe, ma meniwe?” Tama te Jonadapgo te Jehubolo e tama po wai, “Awe, eno nage dali eno deli haliga ebao,” wali. Tialima, Jehugo te po wai, “Dwagi yai dao. Tama tibaso da, tea nago nogo enaba mao. Dadi si nogo mainao.” Tialima, te Jehugo te Jonadapgo nogo tulama, tama aga te karis daiba agai nogo kegali.

¹⁶Tama Jehugo agabolo e tama po ola mani, “Nage ena dali asu da, teda nago koneaibao, eno te Genuai Bidi naga wali painu, bomo mu ebao.” Jonadapgo te po usu da homu yali, tama augwali te karisdu augwali te Samariaba pali.

¹⁷Augwali te Samaria buluba sabolali, tama te Jehugo te bulude te Ahapgo hani gasa me badu te bulude bidali bidi dabe tigidali elama, isilali. Agai te bidi dabe elama, mu silali, tama te tialigo te Genuai Bidigo polobadu te profet Elaijabolo mani te poba usu na silali.

¹⁸Tama nosali te Jehugo te Samaria we bidi dabe tigidali i olama, tama “Eba sisinagasiąo,” wali, tama agai augwalibolo e tama po wali, “Polobadu te king Ahapgo te Balba lotu po weyu yai. Tiali goli, eno te Balba lotu po bomo mu yaibao.

¹⁹Tama tialima, eno homugo dagego te profet bage me, me pris bage me, tama te tigidali we bidi augwaligo te Balba lotu po wabo we bidi me, tama augwali asama, eba sisinagasao,” wali. “Te bede me deli me bidigio,” wali. “Magi baso meni, eno homugo Balba moni denami yai ofa nai ula mawaio. Tialima, bidi me deli asisąbaso da, teda te bidi isaibao,” wali. Jehugo te po wali, te tibo god Bal lotu po wabo we bidi mumua siyu, agai homugo agai te we bidi tigidali ela silainu te po wali.

²⁰Tama Jehugo e tama po ma wali, “Dago te me sogo te genuai bodolu deli dąį ilama, tama te Bal lotu po waguo,” wali. Tialima, augwaligo te bodolu deli dąį ilali.

²¹Tama te Jehugo te Israel bidi dabe bidibo buluba te agai po ola todolo pali, tama te Balba lotu po wabo we bidi dabe, augwali asama, sisinagasao wali. “Bidi me deli me te naga bede bidigio,” wali. Tama tialima, te we bidi dabe te Bal lotu po wabo moni lotu beba te tigidali we bidi te be tomoba pelama, te mu pągąna sai.

²²Augwali te lotu be tomoba bula sela silama bidaluali, tama tialima, te Jehu aga te pelama, te lotu weyu te bulubo ugwa tonalubo bidi pageba pai. Tama agai e tama po agabolo wali, “Tama te bulubo ugwa selama, te Balba lotu po wabo we bidi dabebolo mena mena pao,” wali. Tama te bidigo te Jehugo wali po selama, te ugwa selama, mena mena pali.

²³Tama nosali te Jehu dali, te Jonadap dali si, Jonadap aga aya te Rekapgo ogwa da, augwali si te lotu be tomoba pali. Tama te Jehugo te we bidibolo e tama po wali, “Dagego te duga hasi bugagia tononu bilama, tama duga digi dagaliąo, magu menio, bidi me deli me, we me deli me, te Genuai Bidi God dolo mu lotu po wabo we bidi me deli da dali bidamuo,” wali. “Te eno homugo da te Bal dolo lotu po wabo we bidi naga da e be tomode bidinao,” wali.

²⁴Agai te po tama olama sia sali, tama aga dali, te Jonadap dali si, augwali si te denami yai ofa nai ula mabo madigi te habuba pai. Tama augwaligo te habu badu denami yai ofa nai me, me te gasa ofa nai me, te augwaligo te tibo god Balba te tigidali ofa nai selama, te siaba ula palama, te siago sese tama dela pelama, silibo da. Tama te tigidali we bidi asisąbo sogo Jehu aga te bidi sese te me si me si nama, 80 ami soldia bidi dąį ilama, tama agai augwalibolo e tama po wai, “Dage te lotu be togobe badu bidiyu, te bulu badu tonalu bidao.” Tama agai augwalibolo e tama po wali, “Dagego te tama tiao, te tibo god Balba lotu po wabo we bidi dabe tigidali te hani elama, silao,” wali. “Tialima, te soldia bidi me deligo te hani augwali me deli wi pabo sula tagalobaso da, tea te soldia bidi aga me elama, isilaibao,” wali.

²⁵Jehugo te siaba te ulama, te siago sese dela pabo denami yai ofa nai ulubo sę ela silali, tama tilama, te lotu be tomode taga solama, tama aga te ami soldia bidi dali, te aga sę ebo gavman ofisa bidi dabe dalibolo e tama po wali, “Dage te lotu be tomoba pelama, te we bidi dabe tigidali ela muna silao,” wali. “Dagego augwali me badu te wi pabo sula tagaligio,” wali. Te po obaso, te ami soldia bidi dabe augwali te be tomoba pelama, te we bidi dabe tigidali te bainat hwą gego te we bidi dabe elama, silali. Tama nosali tama te we bidi augwaligo tigi selasa pelama, te taun sesege bulu badu pubaligi pai. Tama tilama, augwali ma begasa peyu, te taun tomode te tibo god Bal lotu po wabo beba ma pai.

²⁶Tama augwali te lotu po wabo be tomoba pelama, tama augwaligo te bidi dabego lotu po wabo te noma ni dabe sali, tama augwaligo te ni dabe selasa buluba pelama, tama augwaligo te bulude te noma ni dabe isiba ulali.

²⁷Tama augwaligo te tibo god Bal noma nigali piksa me, te lotu po wabo be me, te augwaligo mu dolali, tama augwaligo te lotu be te di be mu nigilali, tama te be me tama elalu, bidada asama, megi e po asębo bidi dabe bidali sogoba usu nagasalio.