2 Hadì 10:7-27

⁷Ne hein nekeuma is surat ni Jehu, migkuwa zutun he menge etew sikan is 70 he kevuwazan duen te hadì ne mibpenhimetayan dan. Intaǥù is menge ulu kayi he menge etew ziyà te menge baskit ne impeuwit dan diyà te ki Jehu ziyà te Jezreel.

⁸Ne hein nekeuma is mid-uwit dutun, migkeǥiyan din si Jehu te, “Impeuwit dan is menge ulu te menge kevuwazan duen te hadì.” Ne mibmandar si Jehu te, “Tepuka niw heini te zezuwa he tapuk diyà te pultahan te inged ne vey-ani niw en dutun taman te meselem.”

⁹Hein meselem, migawas si Jehu ne midhitindeg dutun te etuvangan te menge etew ne migkaǥi te, “Wazè niw salà. Iyan a mibpelanu te ebpekesuǥat te egalen ku ne minatey sikandin. Piru hentei is midhimatey kandan te langun?

¹⁰Pinaaǥi kayi egkesavut niw he is langun he migkaǥi te Nengazen he ebpekesuǥat te pemilya ni Ahab egketuman iyan. Midtuman te Nengazen is migkaǥi zin pinaaǥi ki Elias he suluǥuen din.”

¹¹Ne mibpenhimetayan ni Jehu is langun he kezumahan ni Ahab diyà te Jezreel, ragkes en is menge upisyal zin, menge emiǥu zin, wey is menge memumuhat din. Wazà nesamà kandan he uuyag.

¹²Ne midhipanew si Jehu pehendiyà te Samaria. Ne zutun te kedhipanew zin diyà te zalan he ziyà te egngezanan te Tiǥumà te menge Bantey te Kerehidu,

¹³neehè din is menge kezuzumahi ni Hadì Ahazia he hadì te Juda. Mid-insà sikandin te, “Hentei kew?” Midtavak dan te, “Menge kezumahan key ni Ahazia ne midhipanew key su ebpengemustahan dey is menge kevuwazan ni Hadì Ahab wey si Rayna Jezebel.”

¹⁴Ne midsuǥù ni Jehu is menge etew zin te, “Dekepa niw sikandan, iyan, kenè niw pa himetayi.” Umbe miduma zan sikandan diyà te teheb ne zutun dan geraa. 42 sikandan is langun, ne wazà nesamà kandan he uuyag.

¹⁵Ne ked-awà ni Jehu zutun, neehè din si Jehonadab he anak ni Recab is edhipanew su edsinuǥung kandin. Ne migkemusta sikandin ni Jehu ne mid-insaan din te, “Dumezapig ke ve kediey iring te kedapig ku ziyà te kenikew?” Midtavak si Jehonadab te, “Uya.” Migkaǥi si Jehu te, “Emun iyan heeyan, ne ikawè nu kayi te kediey is belad nu.” Ingkawà ni Jehonadab is belad din ne impepemenahik sikandin ni Jehu ziyà te kerwahi zin.

¹⁶Migkaǥi si Jehu te, “Duma ka kediey su wey nu maahà is kegkemepezumdumahan ku te Nengazen.” Umbe mid-untud si Jehonadab duma kandin.

¹⁷Kebpekeuma ni Jehu ziyà te Samaria mibpenhimetayan din is langun he nesamà te pemilya ni Ahab, he sungkad te nekaǥi te Nengazen pinaaǥi ki Elias.

¹⁸Midtiǥum ni Jehu is langun he menge etew ne migkeǥiyan din sikandan te, “Kenà utew meheǥet is kebpenilbi ni Ahab ki Baal. Piru siak mulà, ibpeehè ku he meheǥet is kediey he kebpenilbi ki Baal.

¹⁹Umbe, ipehengkayi niw te kediey is langun he ebpeneuven ni Baal, wey is menge memumuhat para kandin, wey is langun he ebpenilbi kandin. Kinahanglan he kayi sikandan is langun, su ebpemuhat a te zekelà he pemuhat para ki Baal. Is kenà edhengkayi ibpehimetayan ku.” Piru uvag-uvag dà haazà su para mehimetayi zin is ebpemenilbi ki Baal.

²⁰Migkaǥi si Jehu te, “Edhimu kiw te ispisyal he ketiǥuman su wey tew meveǥayi te zengeg si Baal.” Umbe impehibelu haazà diyà te menge etew.

²¹Impetawag ni Jehu is langun he ebpenilbi ki Baal seled te tivuuk he Israel, ne midhendutun is kada sevaha kandan. Midseled dan is langun diyà te simbahan he para ki Baal, ne nepenù haazà is simbahan.

²²Migkeǥiyan ni Jehu sikan is ed-atur te idsimba he menge visti, “Ibpevivisti is langun he ebpenilbi ki Baal.” Umbe mibeǥayan din sikandan.

²³Ne midseled si Jehu wey si Jehonadab he anak ni Recab dutun te simbahan he para ki Baal. Migkeǥiyan ni Jehu sikan is ebpemenilbi ki Baal te, “Sigureduwa niw he wazà ebpekesahug keniyu he menge etew he ebpenilbi te Nengazen. Kinahanglan he iyan kew zà nekeseled kayi is ebpenilbi ki Baal.”

²⁴Ne zutun te seled te simbahan nemuhat sikandan te menge pemuhat he edtutungen wey zuma pa he menge pemuhat. Daan en he zuen 80 he menge etew ziyà te gawas duen te simbahan ne migkeǥiyan din sikandan te, “Insarig ku keniyu is kebpenhimatey kandan. Edhimetayan ku emun duen keniyu ebpesagdan ne ebpekepelaǥuy is minsan sevaha zà kandan.”

²⁵Ne hein nekepasad si Jehu he ebpemuhat te menge pemuhat he edtutungen, mibmendaran din is menge vantey wey menge upisyal te, “Seled kew ne penhimetayi niw sikandan! Kenè kew pesagdan su para wazà ebpekepelaǥuy kandan!” Umbe mibpenhimetayan dan haazà is menge etew pinaaǥi te ispada ne impenimbag dan haazà is nemematey ziyà te gawas. Ne midseled dan diyà te kineselezan he vahin duen te simbahan he para ki Baal

²⁶ne migkuwa zan dutun is tedeman he vatu ne mid-uwit dan diyà te gawas, ne mibinsulan dan.

²⁷Ne hein nepasad dan te edrupet sikan is tedeman he vatu ki Baal, mibengkag dan sikan is simbahan he para ki Baal, ne midhimu heini te menge etew he indesà taman en guntaan.