1Sa zinama te Zihova si kamo mae koa rau:
2“La mamu tozi vura nia pa taliṉa dia ri pa Zerusalema: ‘Arau va nonoga ia Qua sapu vea tata gua si agoi koa Rau totoso vaquramu, vea tataru guni Nau agoi guana barikaleqe vaquramu si agoi meke luli Au agoi pa korapana sa soloso qegana, koasa pepeso sapu loke linetelete boka toa ia.
3Izireli si tava madina koe Zihova, guana vua kekenu koari Nana linetelete pa inuma; doduru pu la raza ia si tavete va sea beto meke va kamo betoni tinasuna Arau si arini,’ ”
4Mi avosia sa zinama te Zihova, gamu pa tutina e Zekopi, gamu doduru koa rina puku butubutu tie Izireli.
5Hiera gua si zama nia e Zihova: “Na sa sa sinea sapu dogoria ri na tiatamamia koa Rau, ke rizu va seu si arini koa Rau? Luli rini sari na beku sapu loke laedi meke sapu ta evaṉae loke laedi tugo teledia si arini.
6Lopu hite nanasa nia arini sapu, ‘Avei se Zihova, Asa pu vagi vura ni gita pa Izipi meke turaṉa karovo ni gita Sa koasa soloso popana, karovia sa popoa qegana meke onone mo koa ia, na popoa popana, loke kolona meke koa ia minate, na popoa sapu loke tie ene ia meke loke tie koa ia?’
7Arau turaṉa nuquruni gamu koasa popoa masuruna pude henai sari vuvua meke pakepakete va soku vasina. Ba mae si gamu meke va bonia sa pepeso meke vata evaṉa nia gamu sa Qua tinago pude variva maledere koa Rau.
8Sari na hiama si lopu hite nanasa, ‘Avei se Zihova?’ gua. Arini pu va bakali sari tinarae si lopu hite gilana Au; sari koimata si va karikari mae koa Rau. Sari poropita si korokorotae pa pozana Beolo, luli rini sari na beku sapu loke laedi.
9Gua ke turaṉa pule lani gamu Arau si gamu pa vinaripitui,” zama vura gua se Zihova. Zama pule si Asa, “Meke kote va vura atuni Arau sari tinazutudi ri na koburu tadi na mia koburu.
10Mi la pa kali lodu rimata, mamu dogoria sa nusa Saeparasi, la pa kali gasa rimata, mamu doṉo hata pa popoa pa Kedara. Mamu dogoria be ele ta evaṉa si keke gugua hie pukerane.
11Vea, ele hite ta evaṉa sapu keke butubutu si hobe i sa sari nana tamasa? Ba lopu na tamasa tugo sarini. Sari Qua tinoni si ele vari hobe nia sa dia Tamasa Tolavaena, hobe la koari na beku sapu loke laedi.
12Agoi na maṉauru, mu hodahodaka na magasa, mu neneqara na matagutu,”
13Zama pule si Asa, “Ura karua sari sinea pu taveti ri na Qua tinoni: Arini si ele veko pani Au si Arau, Arau, sa bukahana sa kolo tinoa, meke geli pou tu pude va naqiti dia kolo pa ruku, na pou sapu lopu boka tuqe kolo.
14Vea, na nabulu se Izireli, na pinausu sia pa nana podo? Na vea ke guana ta zau vagi tu pa vinaripera sia?
15Sari laione si kurumu; kurumu la ia rini si asa. La arini meke huara va kaleana pania sa nana popoa; sari nana vasileana si ta sulu meke ta veko palae.
16Uve, sari na tie Izipi pa Memipisi meke Tapanesi si kote mae koto pani sari kalu pa batuna.
17Izireli, vea lopu telemu tu hatai sari tinasuna hire? Na veko pania goi bisa se Zihova mua Tamasa sipu korapa turaṉa igo Sa pa Nana siraṉa.
18Ego, na vea ke kote la tu pa Izipi pude kote la napo tu koasa Ovuku Naelo? Meke vea ke kote la tu pa Asiria pude kote la napo tu koasa kolo pa Iuparetisi?
19Sari mua kinaleana mo kote va kilasa igo si agoi; sa tinaliri taloa tamugoi koa sa Tamasa kote gegesemu si agoi. Ke mamu gilania meke dogoria sapu vea kaleana gua meke vea vari sigiti gua koa goi sia pana veko pania goi se Zihova sa mua Tamasa meke pana loke mua pinamaṉa si agoi koa Rau,”
20Zama pule se Zihova, “Ura pukerane tu moku pania goi sa ioki d meke huara pania goi sa mua vina tabe koa Rau; zama si agoi, ‘Arau koroqu va nabulu atu koa Goi!’ gua. Hinokaramu, sina pa doduru toqere ululudi meke pa kaurudi ri doduru huda aqaqoro si eko si goi pa hahanana maqota pa vinahesi beku.
21Arau lete igo, na Qua vaeni ta vizatamu, ta vagi si goi koasa vaeni sapu arilaena hola. Na vea meke boka va karikari mae Au pule tu agoi, meke boka ta iliri pude na tinoni kaleamia guana vaeni pinomona?
22Be ṉuzapa pule nigo pa sopu ṉiṉirana babe soku sari sopu si huhuve ni goi ba sa boni koari na mua sinea si kote koa eko mo pa Kenuqu Rau,”
23“Vegua meke kote boka zama si agoi, ‘Arau si korapa viaqu; lopu hite la vahesi i rau sari beku Beolo,’ gua? Mu doṉo la mo koasa mua hahanana koasa lolomo toqere; mu tumae nia sa si tavetia goi vasina. Agoi si guana kameli mamaqota reregena sapu haqala hoboro lamae,
24guana doṉ'ki pinomona sapu manavasa koa pa qega, sapu humahumaṉa sage nia isuna pa givusu pana hiva papa si asa. Totoso neneke sa si esei kote boka va nosoa? Sari doṉ'ki kokoreo si lopu kote mabo hata vagina.
25Mu lopu va gulata i sari ola nenemu pa hinaqala lamae meke lopu va popa ia leomu pana hinata vahesi beku tadi na tie pa popoa seudi. Ba zama tu si goi, ‘Lopu boka kekere pule si rau! Ele tataru ni rau sari tamasa karovodi, meke kaqu vahesi na va lavati arau si arini.’
26Guana tie hikohiko sapu kurekure totoso ta poho, si kurekure gua tugo asa sa butubutu Izireli, arini, sari dia baṉara, dia koimata, dia hiama meke dia poropita.
27Zama la ia rini sa huda, ‘Agoi sa tamamami,’ meke koasa patu si, ‘Agoi na podo gami,’ gua. Mudi mae Au rini si Arau meke lopu hiva tia mae Au; ba pana kamo i na tinasuna, si zama tu, ‘Mae Mamu harupu gami!’ gua tu.
28Ke avei mo sari tamasa pu telemia na taveti? Mi tioko mae ni, be boka harupu gamu rini totoso kamo gamu na tinasuna! Ura soku hola sari mia tamasa soku gua ri na mia vasileana pa Ziuda.
29Na vea ke zutu Au tu gamu sapu Arau si sea, gua? Nake gamu tu si va karikari mae koa Rau,”
30“Va lipulipu i Rau sari mua tinoni ba lopu avoso tu, ta va kilasa ba lopu boka gilae si arini. Mia vedara telemia va matei sari mia poropita guana laione oviana.
31Gamu kasa koasa sinage hie, mi va avosi sari na Qua zinama. Vea, hokara guana qega si Rau koari pa Izireli babe na popoa huporo dudukurumuna? Na vea ke zama sari Qua tinoni, ‘Gami si ta rupaha mami pude ene la mae; lopu kote pule mae si gami koa Goi?’ gua.
32Vea boka muliṉi nia sa vineki vaqura sa nana pakupaku arilaena, babe sa vineki ta pinirovetuna sa nana poko varihaba? Ba sari Qua tinoni si muliṉi Nau si Arau pa soku ṉavulu rane, sapu lopu boka ta nae.
33Boka mia hola pude hata vagi tie pude puta turaṉi! Sari barikaleqe sapu kaleanadi hola gua ba boka tava tumatumae koa gamu.
34Ta dogoro koari mia poko sari eharadi ri na tie malaṉa meke saripu loke dia ginugua sea; lopu na eharadi ri na tie hikohiko. Ta evaṉa tugo si hire,
35ba zama si agoi, ‘Arau si loke qua sinea; lopu arau si bugoro nau Sa.’ Ba kote vilasa igo Arau pa vinari pitui sina zama si agoi, ‘Arau si lopu hite tavete va sea,’
36Na vea ke hobehobe lamo si agoi, hobe lamo sari mua binaere? Kote va talotaṉa igo Izipi si agoi, gua mo sapu tavete atu nia Asiria.
37Kote ta luarae tugo si goi pa Izipi na tie kurekuremu meke nunala, sina kilui e Zihova sarini pu ronui agoi; na lopu kote ta tokae si agoi koa rini.
