Yesu Tɔ̃rɛ̀ 4:12-34

¹²Bɑntɛ́nɛ̀ kɛ dò nkutenkù kumɔu miɛkɛ òmɔù tɔù bɑ́ɑ́ nɑ kɛ́dɛɛtɛ́, Kuyie nti duɔ́ nYesu nwe, weè ti dɛɛrí.

¹³Kɛ̀ bɛbeémbɛ̀ɛ yɑ̀ Piɛri nɛ̀ Isɑ̃ɑ̃ bɛ mɔ̀kɛ dìì kɔ̃m̀bùɔ̀ kɛ̀ dɛ̀ɛ bɛ̀ di mɛdiɛ̀, nkɛ yɛ̃́ bɛ̀ do yɛ̃́mɛ̀ kɛ dò mbɛ̀ í bɛbíí yɛpɑ́tɛ mɛdiɛ̀, bɛ̀ do yɛ̃́ bɛ̀ nɛitinɛ̀mɛ̀ mmɛ Yesu.

¹⁴Bɛ̀ nɛ́ mɛ nwúómmɛ̀ wèè miɛtɛ́ kòò còḿmú bɛ borɛ̀ bɛ̀ í nyɑ̀ bɛ̀ bo tɛ̃́nnɛ́ tì.

¹⁵Kɛ̀ bɛ̀ɛ bɛ̀ dènnɛ kɛ nɑ́kɛ́ bɛmɑ́ɑ̀ kɛ dɔ̀: Ti bo yĩ́mɛ bɛnìtìbɛ̀ biɛ?

¹⁶Sedisɑdɛmmu kɔbɛ bɛmɔu yɛ̃́mu bɛɛ̀ dɔ̀ɔ̀mɛ̀ tidiɛtì tii, ti bɑ́ɑ́ nɑ kɛ́ tì nɛ̀nni.

¹⁷Kɛ̀ ti nɛ́ dɔ́ kɛ̀ dɛ kó tinɑ́ɑǹtì dɔkɛ bɑ́ɑ́ pitɛ́, ti bɛ̀ kpɑ̀nnɛ, kɛ́ bɛ̀ bɑ̀ɑ kɛ̀ bɛ̀ tɛ̃́nkɛ bɑ́ɑ́ bɛ́innɛ̀ òmɔù Yesu kó diyètìrì.

¹⁸Kɛ̀ bɛ̀ɛ wɛ̃tɛ kɛ́ bɛ̀ yùní kɛ́ mbɛ̀ kpɑ̀nnɛ̀ kɛ tú: Di yɔ bɑ́ɑ́ kú kɛ̀ di wɛ̃tɛ kɛ́yú Yesu yètìrì òmɔù borɛ̀ yoo dí ò nɑ̀kɛ́ o nɑ́ɑǹtì.

¹⁹Piɛri nɛ̀ Isɑ̃ɑ̃ kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Wéntɛ́nɛ̀ di mɔ́mmɔmbɛ Kuyie nyììkɛ̀ nsɑ kɛ̀ dɛ̀ wenni, ti bo yiemmɛ̀ díì kpɛti kɛ́yetɛ Kuyie nkpɛti.

²⁰Tínti bɑ́ɑ́ nɑ kɛ í mbɛ́i ti yɑ̀ dɛ̀ nɛ̀ ti kèè tì.

²¹Kɛ̀ bɛbeémbɛ̀ɛ wɛ̃tɛ kɛ́ bɛ̀ yùní bɛ̀ í nyɑ̀ bɛ̀ bo yĩ́mɛ̀ kɛ́ bɛ̀ puotí, kɛ yóu, kɛ́ bɛ̀ kpɑnnɛ̀, kɛ́ bɛ̀ fĩ́ĩnko, kɛ yɛ̃́ bɛnìtìbɛ̀ bɛmɔu do sɑ̃ntímɛ̀ Kuyie nnɛ̀ dɛ̀ɛ̀ dɔ̀ɔ̀ dɛ kpɛ́í.

²²Kɛ yɛ̃́ kuhɔ̀ùkù bɛ̀ miɛkùnnɛ kù bie do pɛ̃ɛ̃tɛ́mɛ̀ sipísìnɑ̀ɑ̀.

²³Bɛ̀ fĩ́ĩ ndìì mɔ̀nnì Piɛri nɛ̀ Isɑ̃ɑ̃ kɛ̀ bɛ̀ pɑ̃̀nkɛɛ kɔtɛ bɛ kɔbɛ borɛ̀, kɛ́ bɛ̀ nɑ̀kɛ́ ikuɔ́ nìùbɛ̀ kó bɛkótíbɛ̀ nɛ̀ bɛkótíbɛ̀ bɛ̀ bɛ̀ nɑ̀kɛ́ tì.

²⁴Bɛ̀ tì kèè dìì mɔ̀nnì kɛ́wɛ̃nnɛ́ kɛ́bɑ́ntɛ̀ Kuyie nkɛ dɔ̀: Ti Yiɛ̀ nfɔ̃́ nwèè dɔ̀ɔ̀ kɛtenkɛ̀ nɛ̀ kɛĩ́nkɛ̀ nɛ̀ dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ.

²⁵Fɔ̃́ɔ̃̀ do duɔ́ Muyɑɑ́nsɑ̀ɑ̀mù ti yɑ̀ɑ̀rì Dɑfiti ɑ kóo tɔ̃ntì kòo bɛ́i nkɛ dɔ̀: Bɑ nte kɛ̀ ibotí miɛkɛ cɔ́u? Bɑ nte kɛ̀ yɛbotɛ̀ dɑ̀kii mɛyɛi nkpɛ́í ndɛtetìrɛ̀?

²⁶Kɛ̀ kutenkù yɛmbɛ̀ bɑɑti dikpɑ̀nnì, kɛ̀ sikpɑ̀ɑ̀tìbìí wɛ̃nnɛ́ kɛ kpɑnnɛ̀ Kuyie nnɛ̀ kù tɑ̃ɑ̃tɛ́ wè.

²⁷Mɔ́mmuɔ Edɔti nɛ̀ Pɔ̃nsi Pidɑti bɛ̀ wɛ̃nnɛ́mu dihɛì miɛkɛ nɛ̀ bɛpɔ̀ɔ̀bɛ̀ nɛ̀ Isidɑyɛɛribɛ kɛ bo dɔɔ̀ mɛyɛi nhɑ kóo tɔ̃ntì Yesu ɑ tɑ̃ɑ̃tɛ́ wè wèè dò mpɑ́íí.

²⁸Dɛ̀ dɔ̀ɔ̀ ɑ dɔ́ tìnti nɛ̀ dimɔ̀nnì kɛ tì tɑ̃ɑ̃tɛ́.

²⁹Ti Yiɛ̀ nwéntɛ́ bɛ̀ ti kpɑnnɛ̀mɛ̀, kɛ́duɔ́ nhɑ kó bɛtɔ̃mbɛ̀ dikɔ̃m̀bùɔ̀ kɛ̀ bɛ̀ nnɑ́ɑ́ nhɑ nɑ́ɑǹtì.

³⁰Bɛnkɛ ɑ wɛ̃rímú kɛ́mmiɛkùnko bɛmuɔmbɛ, kɛ́ndɔɔ̀ri tidiɛtì nɛ̀ mɛbɛnkùmɛ̀ nɛ̀ ɑ kóo tɔ̃ntì Yesu yètìrì wèè dò mpɑ́íí.

³¹Bɛ̀ bɑ́ntɛ̀ dìì mɔ̀nnì Kuyie nkɛ́deè, kɛ̀ kɛtenkɛ̀ɛ sɑ̃ntɛ̀ bɛ̀ tìkú dɛ̀ kɛ̀ Muyɑɑ́nsɑ̀ɑ̀mù bɛ̀ píɛ nkɛ̀ bɛ̀ nnɑ́ɑ́ Kuyie nnɑ́ɑǹtì nɛ̀ dikɔ̃m̀bùɔ̀.

³²Bɛ̀ɛ̀ kó dimɑ̀ɑ̀ do tɑ̃́ Yesu kɛ̀ bɛ̀ nwɛ̃ mmɛyɛ̀mmɛ̀ mɛ̀mɑ́ɑ̀, òmɔù í ntú ò te o kpɛrɛ omɑ́ɑ̀, bɛ̀ do dɛ̀ wɛ̃ḿmu bɛmɔu.

³³Kɛ̀ Yesu tɔ̃rɛ̀ nnɑ́ɑ́ mbɛnìtìbɛ̀ nɛ̀ muwɛ̃rímú Yesu yɑ̃̀ńtɛ́mɛ̀, kɛ̀ Kuyie mbɛ̀ bonɛ̀ kɛ bɛ̀ dɔ̀ɔ̀ri mɛsɑ̀ɑ̀.

³⁴Òmɔù í mmɔ́nnì dɛ̀mɑrɛ̀ bɛ miɛkɛ, bɛ̀ɛ̀ mɔ̀kɛ dɛpɑɑ nyoo sicɛ̃́ĩ kɛ̀ bɛ̀ ndɛ̀ fiiti kɛ tɔuní idíítí