Aposel 4:12-34

¹²Bel tik masik ir alaun dala, pa bel ta risana tik otleng te na rakrakan hanua, ning e God i saran tari tetek a taraila sur dir alaun dala onoi.”

¹³La tasmani mang e Pita pa e Jon naur a barsan oros ka, bel dia asasaer pas on ta tnan asasaer. Pa la kulkulan kol on diau ning dia warwara pa bel dia matmataut. Pa la tasmani mang nating ditol ararmuri taum ma e Iesu.

¹⁴Ika ning la oroi a barsan ning di alangolango pasi, i tur taum on diau, belal warainla ma sur lar keles diau onoi.

¹⁵La sune maskan sen ditol kaba kusun a kiwung, pa la warwara taum pas mange,

¹⁶“Dalar tol asa ana naur a barsan ne? Anasa dia ka tol tar ning a tnan utna na kulkulan, pa ka talapor tetek la rop ning la kes te e Jerusalem. Pa dalar puai mangmangasa?

¹⁷Dalar sairas rakrakai diau, sur gong ulak ma dia warwara tetek tik ana risana e Iesu, sakana a warwara ne ir han sarara tetek a taraila rop.”

¹⁸Lamur la kabah ulak pas diau, pa la sairas diau sur gong ma dia warwara pa dia asaer halala ana risana e Iesu.

¹⁹Ika e Pita pa e Jon dia keles la mang, “Mangasa, i tostos ana matana e God ning miar longor tetek mulo, pa tetek e God gong? Mulo ot mulor oroi sursuri.

²⁰Ika miau, bel miar sairas lar pas miau ana warwara ona ututnala ning mila ka oroi tari, pa mila ka longor tari.”

²¹Ning la ka sairas rakrakai tar diau, la pak sen diau. Bel la pastek ta utna ning lar um diau onoi, anasa a tarai la rakan aleklek pas e God ana utna na kulkulan ning dia ka tol tari.

²²Anasa a barsan ning di tol tar a utna na kulkulan onoi pa i langolango, anuna rau a lalaun i ka bolos tar diat a bonot a rau.

²³Ning di ka pak sen e Pita pa e Jon, dia ulak tetek na halalindiau, pa dia atai la ana warwarala rop ning a leklek a tena artabarla tetek e God taum ana ningnigola la ka atong tari tan diau.

²⁴Ning la longori, la nunung taum tetek e God mange, “Leklek, u akes a langit, a rakrakan hanua, a puka tasi, taum a ututnala rop tingui onditol.

²⁵Pa ana Talngan Tabu u warwara tetek a tubumila e Dewit anuma tena titol mange, ‘Asa kamkamna ning a taraila ning bel a tarai Israel la balakut kol, pa la pinpindaiwol na tol a toltol laulau? Ika anunla pinpindaiwol i utna oros ka.

²⁶A kingla miting na rakrakan hanua la tur na harum, pa a ningnigola la han taum, sur lar alaulau a Leklek pa anuna Mesaia, ning i aslang pasi.’

²⁷A momolna, e Herot pa e Pontius Pailat la han taum ana taraila ning bel a tarai Israel, pa a tarai Israel otleng, te na hanua ne, sur lar alaulau anuma Totoh na Tena Titol e Iesu, ning u ka aslang pasi.

²⁸Ning la toli manglarning, la tolsot pas a ututnala ning nating u ka sang tari ana rakrakaim pa ana nuknukim sur ir hanot.

²⁹Onone, Leklek ur nuk pas anunla na rakrakai a warwarala, pa ur arakrakai mila, anuma tena titol orosla, sur gong mila matmataut ning milar warwara talapor ana numa warwara.

³⁰Pa ur nangan mila ana rakrakaim sur a tinsamanla lar langolango, a ututna na kulkulan pa a akinalang lar hanot ana risana e Iesu anuma Tohtoh a Tena Titol.”

³¹Ning la ka nunung pas, a rumai ning la kes onoi, i gulgule, pa la rop la bukus ana Talngan Tabu, pa la warwara ana warwara ane God, pa bel la matmataut.

³²A tena tortorotla rop, takai ka a nuknukinla pa a balanla, pa bel tik ta halinla i atong tar ta utna mang anunai ka. La suah taum a ututnala sur anunla rop.

³³A aposella la warwara talapor taum ona tnan rakrakai, ana lalaun ulak ana Leklek e Iesu kusun a minat ning la ka oroi tari. Pa a tnan marmaris ane God i kes onla rop.

³⁴Bel tik ta halinla i kapan sur ta utna, anasa la ning anunla na puka kaba lapiula pa la otleng ning anunla na rumaila, la siuran la, pa mani ono,