Aposel 4:12-34

¹²Taha badeh, winiyan batakalahei ari seben bare ta ari lau ja bwe; tasah ari lau udu baha kandrah ja kada-ah atehei iy ki nyara seben tataha bwe.”

¹³Eme oro anyolom Pita uru Jon badeh, banoh se bwe, uru abadok handru. Ma oro atanan uru badeh, mene bakohok tanan tinan bwe, uru badeh lau badu kon laleyah. Eme ya mani oro atur, ma oro atanan, ta uru lau doh mene badu hawe Jises.

¹⁴Eme oro badeh, basehek randra sahou bala bada uru bwe. Tasah, iy ndramak mene uru mesekei iy amwenen badeh, ales ere hawe Pita uru Jon are mada oro mari.

¹⁵Eme oro badeh, tiye iri lau ta ndrokei katiyani Pita uru Jon ka len ta mada iri kansol, ya eme oro atilik nyala oro,

¹⁶“To kamekes sasah handru ki turu lau kede-eh bah? Iri lau mari manyah ado Jerusalem badeh, ndratanan kalem mwasin uru amekes. Ya eme to winiyan babisiniy bwai.

¹⁷Arile, san le doh badeh, to kabwidi lahou dah saseker badeh, to katiye uru badeh, ka-i ta asehek nyara iy ndramak doh.”

¹⁸Ano oro luhi uru ame bolon ja badeh, tiye i turu sasehek sahou ma saleheya boto-on ta nyara Jises ja, ndri-iy ai.

¹⁹Arile, Pita uru Jon anya, “Ado kanone kaseleya ki tado le se. Mwasin ta mada Kindrei ta aso kanuhun boho ado deh, bwe-em kanuhun boho Kindrei?

²⁰Ya aso kameh winiyan bandru-uk ta asehek lakou aso ndranyolom na mada aso, ma anuhun na ndranye aso amwenen bwai.”

²¹Eme oro kansol nohowa oro abadok le gwek, ma tiye uru au. Oro badeh, winiyan badeu maha-an bala turu bwe, tasah iri lau mari atudun le Kindrei ta lahou tinan mene uru amekes.

²²Jaha ta ndramak nane amwenen badeh, sakalawi hanoh (40).

²³Eme oro tiye uru ame len badeh, ala hawe oro lau turu amwenen, ma asehek nyala oro ta lakou mari, oro tinan tiri pris hawe oro lau-en tiye i turu.

²⁴Eme oro anuhun badeh, oro asore boho oro i le se i loken, asolom i ta Kindrei. Eme oro anya, “Laban Kindrei, ou le mesekei kandrah ma munyak hawe ndras ma hawe lakou mari udu bahandran ma udu bwele-en.

²⁵Ou mene asehek sahou na Malawin Ndrabun edek boho lohowam, tubu ahi Debit anya: ‘I buku sah iri lau badu leheleh abolosen le gwek? Ya i buku sah iri lau atilik budon labwe?

²⁶Iri kabin badu munyak lowosa iri, ma hawe iri lau ta atondrok atukum a se amekes bahun i ta Laban hawe ndramak ta seben tan iy suni iy eme.’

²⁷Idoh mene handru, Herot hawe Pontiyus Pailat atukum a hawe iri lau badu leheleh ma hawe iri lau badu Isra-el, badu bolo kon tinan dah amekes budon ta adai Jises. Iy badeh, lohowan tam ndrabun ou mene suni iy eme ta amekes gok tam.

²⁸Oro amekes doh badeh, in hamon le ta budon ma seken tam, ou ndrasehek.

²⁹Abo, Laban, na dah badeh, ou anuhun iri anya kanohowa aso, arile ou bwidi aso lohowam kabadok ta asehek sahou tam.

³⁰Talasei minem kamekes lau kamwenen ma kamekes kalem mwasin na boto-on ta nyara lohowam ndrabun, Jises.”

³¹Oro asolom ano, kon nane oro atukum are aliy dah, totoreh. Ma eme oro mari badeh, adah na boto-on ta Malawin Ndrabun ma oro abadok ta asehek sahou ta Kindrei.

³²Eme iri lau ta Kindrei, budon tiri hawe ndrine iri i le ari. Iri mari badeh, bamekes ndrakok bala ta sanuw tiri bwe. Arile, iri mari badeh, anyohan lakou tiri, i tiri ari ari.

³³Eme oro aposel asehek sahou ta nyala amak eme awas ja ta Laban Jises na boto-on ta Kindrei. Ya eme Kindrei apwai nyosowan badeh, i la-u iri mari.

³⁴Eme iri ari ari badeh, bandriliu ta lakou bwe. Ya len rayah, oro lau heh, munyak toro udu aliy hawe asiu toro udu aliy badeh, adeu i ta sisih.