Aposotolo Adi Hewau 4:12-34

¹²Hinage taba nige mauri se abi tau esau arinai: galewa ubuna eai ta nige esau esana se moselaei tatao aridi eai, arinai abo ta mauriei.”

¹³Petero eo Ioane edi adidiri se ita, eo isi se nuatui taudi labui nige tauheatadi, eo isi tatao supusupudi, se nooedi; se nuatulobaiyao isi Iesu maedi se miamia.

¹⁴Wau tau wa se hemauri wa se ita, maedi se toroesega, arinai nige edi aba ribalau.

¹⁵Isi se duiedi se lau numa murimurina eai, abo isibom se oioiriba,

¹⁶si ene, “Tatao ta edoha eda abiabidi? Mamohoi tatao labui ta heiheinoi gigiborina se hemasarahayao Ierusalema taumiaina gamagaridi matadi eai, taba nige eda aba harereedi.

¹⁷Taudi labui ta ta ribahemahematausidi, ata wasa ta se helai, isi Iesu esana wa tabu se ataataiuioi tau esau arinai.”

¹⁸Se eogaidi, abo se heribadi Iesu esana tabu se ribaei, eo tabu se laulauheataei.

¹⁹Petero eo Ioane abo se ribalau isi aridi eai, si ene, “Aitea i dudurai ede Eaubada matana eai, emi riba me ai ataiei, e Eaubada ena riba ai ataiei, hage au ribama.

²⁰Ginauri ai itadi eo ai ataiedi taba ai ribaribaedi hinage.”

²¹Taudi labui se riba hemahematausiuioidi, abo se abigabaedi, bena se hemaisadi nige adi matapaana, paana ede tatao gamagaridi Eaubada se awamamohoiei wau laulau wa arinai.

²²Tau wa, laulau gigiborina arinai se hemauri wa, ena borimai tatao‐labuise mate eo hisa se lauo.

²³Isi se abigabaedi abo se lau ehadiyao aridi eai, kohena lailaidi, eo edi babada, edi riba gamagaridi se heribadi.

²⁴Isi nei ribana ne se ataiei, ma nuaesegadi se eogasae Eaubada arinai, si ene, “Guiau e, oa Eaubada ede, galewa tauginaurina, eo gabogabo hinage, eo ginauri gamagaridi boeadi eai,

²⁵em heaheari tauna Davida awana eai u ribaei Earua Tabuna debana eai, u ene, ‘Etene se saha se ouyalayalaei, tatao se saha se nuanuatu gaibu mo?

²⁶Tanoubu wasawasadi se totoro‐lele, Tanutanuagadi se oigogoesega, Guiau bena se laugudugudui, eo ena Keriso hinage:’

²⁷mamohoi, em heaheari tauna tabuna Iesu, ia u heyausiyao, ina eanua eai ta bena se laugudugudui; Heroda eo Ponotio Pilato, maedi Murimuri‐tataodi hinage, eo Isaraela tataodi gamagaridi, se oigogoesegaidi,

²⁸laulau gamagaridi bena se ginauridi, em nuatu eai eo em sonoga eai nabada wa se ribaedi abo se tubu.

²⁹Guiau e, edi riba matamatausidi u nuatuidi: em heaheari tataodi u headidiridi, isi abo em riba se ribaei ma nuapaipaidi.

³⁰Nimam u helelelaei u abihemauridi: em heaheari tauna tabuna Iesu esana eai heiheinoidi eo noo ginauridi abo se ginauridi.”

³¹Isi se lau‐uura lautom, abo edi aba oigogo wa i tabutabubu, isi gamagaridi Earua Tabuna se monau, Eaubada ribana abo se ribaei ma nuapaipaidi.

³²Tauataiena gamagamagari nuadi esega mo, eo edi nuatu esega: nige esau i ene egu gogo ta ea heseriedi; se heona gonogonoadi mo.

³³Aposotolo Guiau Iesu ena torouio ribana se riba hemasaraha ma gigiborina: ainauia lailai i ota isi gamagaridi potadi eai.

³⁴Aridi eai hinage nige tau esau ie deha; gamagaridi edi oea eo edi numa se abidi, se uneunedi, ginauri se uneunedi wa maisadi se laedi,