Hechos 4:12-34

¹²Wetsa jawékira yamake janmeax kishpinti; nato mainra wetsa jane yamake, noa jan kishpinmati Diossen jonibo menia. Jesussenresa noa kishpinmati atipanke —akin jato aká iki.

¹³Jatianra jatíbi joni koshibo ratékana iki, rakétanma ja Juan betan Pedro kirika onanshamanma ikaxbi, jaskati yoyo ikanaitian ninkatax, jainxonra onankana iki, Jesussenmea onannaibo riki natobo ixon.

¹⁴Jatian ja benxoaa joni jato pataxbi niketian oinnax, moa jakonmai jatoki yoyo iti atipanyamakana iki.

¹⁵Jatian jainxon joi benxoati chité ikainoa jato pikoax, jatobiresbiribi neskati yoyo ikana iki:

¹⁶—¿Nonki nato jonibo jaweatiki? Moara jatíbi Jerusalénhainoa jonibaon, ja westíora ratéti jawéki akana onankanke, jaskara ikenra ikonma riki akin non jato ati atipanyamake.

¹⁷Ikaxbi nato joi jatíbiain pextinhakin jato yoibokanamatianbi jato rakéati riki, ja Jesús kiriti iká joibo moa tsoabi jato yoiamakanon ixon —iki ikana iki.

¹⁸Jaskáaxonra, kenamaxon jato yoikana iki, ja Jesús kiriti iká joibo moa jato onanmatima itan jawebi ja winota joibo moa jato yoitima.

¹⁹Ikaxbi Pedro betan Juanman jato yoia iki: —Oinnon shinankanta, Diossen oinnamein jakon iki matopari non joi senenhaxonti, Diospari senenhaxonamabi.

²⁰Nonra ja non oinna itan non onanna jawékibo jato yoikin jeneti atipanyamake —akin.

²¹Jatianra joni koshibaon jato rakéaribaa iki, ikaxbi jato jenekana iki, jaskáshamanxon jato ramiatikoma iká iki, ja benxoa joni oinxon jatíbi jonibaon Dios rabiaitian.

²²Ja shinanmanres benxoa joni iká iki, chosko chonka winoa baritiaya.

²³Jatian ja Pedro betan Juan moa pikókana, jato betan joi akaiboiba kabékona iki; kaxon ja judíobaon koshibo betan ja *sacerdotebaon koshibaon jaskáakin jato akana joibo jato yoikana iki.

²⁴Moa ninkata pekáo, tsinkíxon jatíxonbi, neskáakin orankana iki: “Ibó, minra aká iki nai, mai, aniparo itan jatíbi jain jaa jawékibo.

²⁵Ja min Shinan meranoax, itan min yonoti David meranoax mia yoyo ika iki: ‘¿Jawekopiki jonibo jakonmaibires yoyo iki saa ikanai? ¿Jawekopiki jonibaon yankabires shinanbo akanai?

²⁶Nato netemea apobo itan joni koshibora kikini yoitimai, jainbicho tsinkíkanke ja non Ibo itan ja *Cristo ramiati shinanyanix’, iki.

²⁷Jaskatira ja Herodes, Poncio Pilato, jainoax ja wetsankoniax bea jonibo betan, Israel jonibo nato jeman tsinkíkana iki, ja *Cristo, ja min jakon yonoti Jesúski jakonmaati.

²⁸Jaskáxonra moatianbi min shinanni keskáakin senenhakana iki.

²⁹Jaskara iketian, rama noa jakonmaakinbo akáskanaitian noa oinwe Ibó; noara min yonotibo iki koshi shinan noa meniwe, rakéyamakin min joi non jato yoinon.

³⁰Ja min atipana koshi jato oinmawe, ja isinaibo benxoai meranxon, itan ja min jakon yonoti Jesussen janenko ja oinxon onantibo, itan ratéti jawékibo akai meranxon”, akin akana iki.

³¹Moa orankin senenhakanketianra, jain tsinkíkanainko shakota iki, jaskáketian jatíbi jain ikanabo Diossen Shinan bochoya banékana iki; jaskara ixonra, rakéyamakin Diossen joi yoikana iki.

³²Jatianra moa icha joi akaibo jakana iká iki, jabora jaskara shinanyabires ikax, jatobi keskáakin shinannaiboribi ikana iki; tsoabira natora nokonabicho ikibo iamakana iki, jaton jawékibo iká iki jatíxonbi akinanankin ati.

³³Jatian ja raanabaonra, bebonbires koshi shinanyaxon, ja non Ibo Jesús jiria joi yoikin jeneyamakana iki. Jaskákanaitian Diossen jatíbi jato jakon imaa iki.

³⁴Tsoabi jato xaran maxkákanabo yamaa iki; jaton mai itan jaton xobobo marokana iki.