Yaasu 19:20-50

²⁰Rabbiita, Qishiyoona, Abeexa,

²¹Remeeta, Engganiima, Enihaadanne Beeti-PHaxeexa.

²²He biittaa zawai Taaboora, SHahaxuumanne Beeti-SHemesha bochchiiddi biidi, Yorddaanoosa SHaafan zawatees. Eti muleera tammanne usuppuna; eta yuushuwan de7iya moottatikka etan gujettoosona.

²³Yisaakoora zareti bantta yaran yaran laattido biittaa giddon de7iya katamatinne eta yuushuwan de7iya moottati hageeta.

²⁴Ichchashantto saamai Aseera zareta eta yaran yaran gakkiis.

²⁵Eta biittaa katamati Helqqaata, Hala, Bexeena, Akishaafa,

²⁶Alaameleka, Ami7aadanne Mish77aala. Arggo baggaara Qarmmeloosaaninne SHihoori-Libinaatan zawatees.

²⁷Qassi arshsho baggi simmi Beeti-Daagoonakko mirqqettidi, Zaabiloona biittaanne Yifttaahi7eela Wombbaa bochchiiddi biidi, Beeti-Emeeqanne Na7i7eela gakkees. Qassi huuphessa baggaara Kaabula gakkees.

²⁸Hegaappe qassi Ebroona, Rahooba, Hammoonanne Qaana kanttidi, Sidoonan zawatees.

²⁹Hegaappe qassi biittaa zawai Raama simmidi, gimbbettida Xiiroosa katamaa gakkees. Hegaappe qassi Hoosakko mirqqettidi, Meediteraane Abban zawatees. Qassi Mahalaaba, Akiziiba,

³⁰Uuma, Afeeqanne Rahooba geetettiya katamatikka yan de7oosona. Eti muleera laatamanne naa77a; eta yuushuwan de7iya moottatikka etan gujettoosona.

³¹Aseera zareti bantta yaran yaran laattido biittan de7iya katamatinne eta yuushuwan de7iya moottati hageeta.

³²Usuppuntta saamai Nifttaaleema zareta eta yaran yaran gakkiis.

³³Eta zawai Heleefappenne Da7inaaniima wolaappe doommidi, Adaami-Neqeeba, Yaabini7eelanne Laaqquuma kanttidi biidi, wurssettai Yorddaanoosa SHaafaa gakkees.

³⁴Hegaappe qassi zawai arggo baggi Azinooti-Taaboorakko mirqqettees; hegaappe qassi Huqooqa simmidi, tohossa baggaara Zaabiloona biittaaninne arggo baggaara Aseera biittan zawatidi, arshsho baggaara Yorddaanoosa SHaafaa gakkees.

³⁵Gimbbettida katamati Xiddiima, Xeera, Haamata, Raaqata, Kinaareeta,

³⁶Adaama, Raama, Haxoora,

³⁷Qedeesha, Ediraa7a, Enihaxoora,

³⁸Yir77oona, Migidaali7eela, Horeema, Beeti-Anaatanne Beeti-SHemesha. Eti muleera tammanne uddufuna; eta yuushuwan de7iya moottatikka etan gujettoosona.

³⁹Nifttaaleema zareti bantta yaran yaran laattido biittan de7iya katamatinne eta yuushuwan de7iya moottati hageeta.

⁴⁰Laappuntta saamai Daana zareta eta yaran yaran gakkiis.

⁴¹Eti laattido biittaa katamati Xor77a, Eshttaa7oola, Irshshemeesha,

⁴²SHa7albbiima, Ayyaaloona, Yitaala,

⁴³Eloona, Timina, Eqiroona,

⁴⁴Elttaaqe, Gibbatoona, Baa7ilaata,

⁴⁵Yihuda, Banebaraaqa, Gaate-Rimmoona,

⁴⁶Meyarqqoona, Raaqoonanne qassi Yoophphe katamaa yuushuwan de7iya heerata.

⁴⁷Daana zareti biittaa laattanau injjetennaagaa be7ido wode, biidi Laayisha katamaa olidi xoonidosona; xoonidi he kataman de7iya asaa qara bisuwan wori wurssidi, katamaa banttau ekkidosona; ekkidi yan de7idosona. He katamaa sunttaakka laammidi, bantta aawaa Daana sunttan Daana giidi sunttidosona.

⁴⁸Daana zareti bantta yaran yaran laattido biittan de7iya katamatinne eta yuushuwan de7iya moottati hageeta.

⁴⁹Israa7eela asai biittaa shaakkidi wurssido wode, Nawe na7aa Yaasussi laattiyo biittaa bantta giddon immidosona.

⁵⁰GODAI azazidoogaadan, Yaasu oichchin, Efireema gezziyan de7iya Timinaati-Seraaha giyo katamaa ayyo immidosona. Immin katamaa wotti yeggi keexxidi, yan de7iis.