Josua 19:20-50

²⁰Rapit, Kision me Epes,

²¹Remet, En-kanim, En-hata me Pet-pases.

²²Ewe kiä a pwal akkü Tapor, Sahasuma me Pet-semes o müchütiu me arun ewe chanpupu Jortan. A wor ükükün engol me wonu telinimw fiti wisoposopur.

²³Iei fanüen chon ewe ainangen Isakar, ar kewe telinimw fiti wisoposopur, a aükük ngeni ükükün ar kewe famili.

²⁴Iwe, alimuen kinikinin ewe fanü a ainet ngeni chon ewe ainangen Aser a aükük ngeni ükükün ar kewe famili.

²⁵Iwe, a pachelong lon kiännin fanüer ekei telinimw: Helkat, Hali, Peten me Aksaf,

²⁶Alamelek, Amat me Misal. Nge me pelilotou ewe kiä a akkü Karmel me Sihor-lipnat.

²⁷Mürin, ewe kiä a pwelila ngeni ötiu, a pwerela tori Pet-takon o akkü Sepulon pwal ewe lemolun Iftahel, a pwerela efeng tori Pet-emek me Neier. Mürin a sopwela le pwerela efeng tori Kapul,

²⁸Epron, Rehop, Hamon me Kana tori Sitonlap.

²⁹Mürin ewe kiä a pwelila tori Rama pwal tori ewe telinimw mi pöchökül tittin itan Tirus. Mürin, ewe kiä a pwelila tori Hosa o müchütiu me arun ewe mataulap. Iwe, a pwal pachelong ekei telinimw iter: Mahalap me Aksip,

³⁰Uma, Afek me Rehop, ükükün rüe me ruu telinimw fiti wisoposopur.

³¹Iei fanüen chon ewe ainangen Aser, ar kewe telinimw fiti wisoposopur, a aükük ngeni ükükün ar kewe famili.

³²Iwe, awonuen kinikinin ewe fanü a ainet ngeni chon ewe ainangen Naftali a aükük ngeni ükükün ar kewe famili.

³³Kiännin a pwerela seni Helef tori ewe irä ook lon Saananim, a pwal pwerela tori Atami-nekep me Japneel tori Lakum, nge a müchütiu me arun ewe chanpupu Jortan.

³⁴Mürin ewe kiä a pwelila ngeni lotou tori Asnot-tapor. Nge seni ikenan a pwerela tori Hukok, a akkü Sepulon me peliör o Aser me pelilotou, pwal ewe chanpupu Jortan me peliötiu.

³⁵Iwe, ar kewe telinimw mi pöchökül tittir iter: Sitim, Ser, Hamat, Rakat me Kineret,

³⁶Atama, Rama me Hasor,

³⁷Ketes, Etrei me En-hasor,

³⁸Jiron, Miktalel, Horem, Pet-anat me Pet-semes, ükükün engol me tiu telinimw fiti wisoposopur.

³⁹Iei fanüen chon ewe ainangen Naftali, ar kewe telinimw fiti wisoposopur, a aükük ngeni ükükün ar kewe famili.

⁴⁰Iwe, afisuen kinikinin ewe fanü a ainet ngeni chon ewe ainangen Tan a aükük ngeni ükükün ar kewe famili.

⁴¹Ikkei iten ekewe telinimw mi nom lon kiännin fanüer: Sora, Estaol me Ir-semes,

⁴²Sa-alapin, Aijalon me Itla,

⁴³Elon, Timna me Ekron,

⁴⁴Elteke, Kipeton me Paalat,

⁴⁵Jehut, Pene-perak me Kat-rimon,

⁴⁶Me-jarkon me Rakon, pwal ewe fanü mi sasape ngeni Jopa.

⁴⁷Nge lupwen ekewe chon Tan resap tongeni färelong lon ewe fanü, ra feitä o maun ngeni Lesem. Mürin ar liapeni ewe telinimw o niela chon, ra tolong o imweimw lon. Nge ra aita ngeni Lesem iten semelaper we Tan.

⁴⁸Iei fanüen chon ewe ainangen Tan, ar kewe telinimw fiti wisoposopur, a aükük ngeni ükükün ar kewe famili.

⁴⁹Iwe, lupwen ra wes le aineti ekewe kinikinin fanü ngeni ekewe aramasen Israel pwe fanüer, ekewe aramasen Israel ra ngeni Josua nöün Nun we mwän eu fanü me lein fanüer pwe fanüan.

⁵⁰Iwe, fän än ewe Samol mi Lapalap allük ra ngeni Josua ewe telinimw a tüngor seniir. Ra ngeni ewe telinimw Timnat-sera mi nom won chukuchukutän ewe fanü Efraim. Iwe, a aüsefälietä ewe telinimw o imweimw lon.