Iosua 19:20-50

²⁰Rabit, Kision, Ebes,

²¹Remet, En-Ganim, En-Kada, Bet-Pases;

²²ma ra langun i tuk tar Tabor, Sakasuma, ma Bet-Semes, ma ra Iordan ia ra mutuai kadia langun; a vinun ma laptikai na pia na pal ma kadia lavur gunan ik.

²³Go ia ra tiniba kai ra vuna tarai Isakar varogop ma kadia lavur apik na tarai, a umana pia na pal ma kadia lavur gunan ik.

²⁴Ma di ga padapadailam pa ra vailimana tiniba ba kai ra vuna tarai Aser varogop ma kadia lavur apik na tarai.

²⁵Ma kadia langun Kelkat, Kali, Beten, Aksap,

²⁶Alamelek, Amad, ma Misal; ma i tadav Karmel ta ra matana taoai, ma Sikor-Libnat,

²⁷ma i vana likun ma i mur ra vanavana rikai kai ra keake tuk tar Bet-Dagon, ma i tadav Sebulun ma ra male Iptakel ta ra papar a labur, Bet-Emek ma Neiel; ma i vana rikai pire Kabul ta ra papar a maira,

²⁸Ebron, Rekob, Kamon, ma Kana, tuk tar Sidon ra ngala;

²⁹ma ra langun i vana likun tadav Rama, ma tadav ra pia na pal Tiro nina di ga liplip bat ia; ma i vana likun mulai tadav Kosa, ma i tuk tar ta ra ta maravai ra langun Aksib;

³⁰Uma bula, Apek, ma Rekob; a ura vinun ma a ura pia na pal ma kadia lavur gunan ik.

³¹Go ia ra tiniba kai ra vuna tarai Aser varogop ma kadia lavur apik na tarai, go ra umana pia na pal ma kadia lavur gunan ik.

³²Di ga padapadailam pa ra valaptikaina tiniba ba kai ra tarai Naptali, kai ra tarai Naptali varogop ma kadia lavur apik na tarai.

³³Ma kadia langun i ga tur pa ia aro Kelep ta ra iban i tur Sananim, ma Adami-Nekeb, ma Iabnel tuk tar Lakum; ma ra Iordan ia ra mutuaina;

³⁴ma ra langun i vana likun ma i mur ra matana taoai pi na tadav Asnot-Tabor, ma i vana Kukok; ma i tadav Sebulun ta ra papar a taubar, ma i tadav Aser ta ra papar a taoai, ma Iuda ta ra Iordan ta ra vanavana rikai kai ra keake.

³⁵Ma ra umana pia na pal nina di ga liplip bat diat, go diat: Sidim, Ser, Kamat, Rakat, Kineret,

³⁶Adama, Rama, Kasor,

³⁷Kedes, Edrei, En-Kasor,

³⁸Iron, Migdal-El, Korem, Bet-Anat, ma Bet-Semes; a vinun ma lavuvat na pia na pal ma kadia lavur gunan ik.

³⁹Go ia ra tiniba kai ra vuna tarai Naptali varogop ma kadia lavur apik na tarai, a umana pia na pal ma kadia lavur gunan ik.

⁴⁰Di ga padapadailam pa ra valavuruana tiniba ba kai ra vuna tarai Dan varogop ma kadia lavur apik na tarai.

⁴¹Ma ra langun ta kadia tiniba i ga dari: Sora, Estaol, Ir-Semes,

⁴²Salabin, Aialon, Itla,

⁴³Elon, Timna, Ekron,

⁴⁴Elteke, Gibeton, Balat,

⁴⁵Ieud, Bene-Berak, Gat-Rimon,

⁴⁶ma Me-Iarkon, ma Rakon, ma ra langun maravai Iopa.

⁴⁷Ma ra langun kai ra tarai Dan i ga vana uro iat; tago ra tarai Dan dia ga vana urama ma dia ga varubu ma Lesem, ma dia ga uvia pa ia, ma dia ga ub ia ma ra mangi na pakat na vinarubu, ma dia ga vatur vake ma dia ga ki tana, ma dia ga vaiang tar ra iangina ba Dan, varogop ma ra iang i kadia ngala Dan.

⁴⁸Go ia ra tiniba kai ra vuna tarai Dan varogop ma kadia lavur apik na tarai, go ra umana pia na pal ma kadia lavur gunan ik.

⁴⁹Damana dia ga tibe vapar ra gunan ta kana lavur langlangun; ma ra tarai Israel dia ga tul tar ra tiniba tai Iosua natu i Nun livuan ta diat;

⁵⁰varogop ma ra vartuluai kai ra Luluai dia ga tul tar nam ra pia na pal tana i ga lul upi ia: Timna-Sera ta ra gunan i lualuana Epraim; ma i ga pait ra pia na pal, ma i ga ki tana.