1I nɑ su Yinni Gusunɔ womu kuɑ. Su nùn nɔɔɡiru sue kɑ nuku dobu wi, wi u sɑ̃ɑ fɑɑbɑ kowo dɑmɡii nɡe kpee bɑkɑru.
2I de su dɑ win wuswɑɑɔ su nùn siɑrɑ. Su nùn bɛɛrɛ wɛ̃ kɑ siɑrɑbun womusu kɑ nuku dobu.
3Domi u kpɑ̃. U sɑ̃ɑ sinɑ boko wi u ye bɑ sɑ̃ɑmɔ kpuro kere.
4Win nɔmɑ yɑ kpuro nɛni ye yɑ wɑ̃ɑ tem sɔɔwɔ. Guunun wii kpiinu nu mɑɑ sɑ̃ɑ wiɡinu.
5Nim wɔ̃ku ɡɑ sɑ̃ɑwɑ wiɡuu. Wiyɑ u ɡu kuɑ. Win nɔmɑ yɑ mɑɑ tem kuɑ.
6I nɑ su kpunɑ su tii kɑwɑ. Su yiirɑ Yinni Gusunɔ bɛsɛn tɑkɑ kowon wuswɑɑɔ.
7Domi u sɑ̃ɑwɑ bɛsɛn Yinni. Sɑ mɑɑ sɑ̃ɑ win tɔmbu be u kpɑre nɡe nɑɑ ɡɔ̃ɔ. I de i win nɔɔ nɔ ɡisɔ.
8I ku de bɛɛn ɡɔ̃rusu su bɔbiɑ nɡe mɛ bɛɛn bɑɑbɑbɑ bɑ kuɑ Mɛribɑɔ kɑ mɑɑ dɔmɑ te bɑ wɑ̃ɑ Mɑsɑɔ ɡbɑburɔ,
9mi bɑ mɑn wɛ̃ɛrɑ, bɑ nɛn lɑɑkɑri mɛɛrɑ bɑɑ mɛ bɑ nɛn sɔmɑ wɑɑre.
10Wɔ̃ɔ weeruwɑ nɑ bwese te bwɛ̃rɑ yɑrɑ, mɑ nɑ nɛɛ, tɔn ben ɡɔ̃rusu kɑ mɑn tondɑ. Bɑ yinɑ bu nɛn woodɑbɑ swĩi.
11Yen sɔ̃nɑ nɑ mɔru kuɑ mɑ nɑ bɔ̃ruɑ nɑ nɛɛ, bɑ ǹ sisi bu kɑ mɑn wɛ̃rɑ mi nɑ wɛ̃re.
