1Womu ɡe Koren bibu bɑ kuɑ. Ge wee.
2Yinni Gusunɔ, ɑ kpɑ̃, yen sɔ̃nɑ n weenɛ bu nun tɔmɑ bɑɑmɑ, wunɛn wuuɔ kɑ wunɛn ɡuu dɛɛrɑ ten wɔllɔ te bɑ mɔ̀ Siɔni.
3Tɑ yɔ̃ burɑm burɑm tɔnɑ. Wi u tu mɛɛrɑ kpɑ u n nuku dobu mɔ̀ ten burɑm sɔ̃. Guu ten sɔ̃ɔ yɛ̃sɑn nɔm ɡeu ɡiɑ, sinɑ bokon sinɑ kpɑɑrɑ mi.
4Yinni Gusunɔ, wunɛn sinɑ kpɑɑru sɔɔ, ɑ rɑ sun sɔ̃ɔsiwɑ mɑ ɑ sɑ̃ɑ bɛsɛn kuku yeru kɑ ɡem.
5Domi wee, sinɑmbu bɑ mɛnnɑ, bɑ nɔɔ tiɑ kuɑ bu kɑ Siɔni wɔri.
6Adɑmɑ ye bɑ nun wɑ, miyɑ bɛrum bu mwɑ, bɑ wururɑ nɡe tɔn kurɔ wi mɑrubun wɑhɑlɑ yɑ nɛnuɑ sɑnɑm mɛ u yiire. Yerɑ bɑ nɑndɑ bɑ duki suɑ.
8Bɑ fukurɑ bɑ wɔrukɑ nɡe ɡoo nimkuu ɡe sɔ̃ɔ yɑri yerun woo ɡɑ fukɑ.
9Ye sɑ nɔɔmɔ bɑ ɡerumɔ, sɑ ye wɑ Gusunɔ, wɔllu kɑ tem Yinnin wuuɔ. Sɑ ye wɑ Gusunɔ bɛsɛn Yinnin wuuɔ. Wiyɑ u koo de wuu ɡe, ɡɑ n wɑ̃ɑ sere kɑ bɑɑdommɑɔ.
10Gusunɔ, sɑ wunɛn durom bwisikunu mɔ̀ wunɛn sɑ̃ɑ yee ten mi.
11Nɡe mɛ ɑ yĩsiru yɑrɑ, nɡe mɛyɑ bɑ koo nun tɔmɑ hɑnduniɑn ɡoonu nnɛ sɔɔ. Domi ɑ rɑ tɔmbu kpɑre ɡem sɔɔ.
12Be bɑ wɑ̃ɑ Siɔnin ɡuurɔ, bɑ nuku dobu mɔ̀. Yudɑn tɔmbu bɑ yɛ̃ɛrimɔ wunɛn siri bi ɑ kuɑn sɔ̃.
13I sĩiyɔ i kɑ Siɔni sikerenɑ. I yen kɔ̃su yenu ɡɑrio.
14I yen ɡbɑ̃rɑ te mɛɛrio, kpɑ i yen sinɑ kpɑɑnu mɛɛri i rɑ kɑ bɛɛn bibu yen fɑɑɡi kuɑ,
15i nɛɛ, Yinni Gusunɔwɑ u sɑ̃ɑ bɛsɛn Yinni sere kɑ bɑɑdommɑɔ. Wiyɑ u koo mɑɑ sun kpɑrɑ sere kɑ bɛsɛn ɡɔɔn tɔ̃rɔ.
