1Womu ɡe Dɑfidi u wom kowobun wiruɡii kuɑ. Bɑ ɡu kuɑwɑ kɑ ɡɔ̃ru yɑ̃kɑ. Ge wee.
2Yinni Gusunɔ, kon nun siɑrɑ kɑ nɛn ɡɔ̃ru kpuro. Kon wunɛn sɔm mɑɑmɑɑkiɡiɑn ɡɑri kpɑrɑ. Kon womu ko kɑ nuku dobu. Yinni Wɔrukoo, kon nun tɔmɑ.
4Nɛn yibɛrɛbɑ bɑ nun wɑ, bɑ biruku yirɑ wurɑ. Nɛn yibɛrɛbɑ bɑ nun wɑ, bɑ wɔrukɑ bɑ ɡbisukɑ.
5Yinni Gusunɔ, wunɛ wi ɑ sɔ̃ wunɛn sinɑ ɡɔnɑɔ, ɑ rɑ siri dee dee. Wunɛ wi ɑ sɔ̃ wunɛn sinɑ ɡɔnɑɔ, ɑ mɑn ɡem wɛ̃.
6Yinni Gusunɔ, ɑ bwese ni nu ǹ nun yɛ̃ ɡerusi. A tɔn kɔ̃sobu kpeerɑsiɑ. A ben yĩsɑ ɡo sere kɑ bɑɑdommɑɔ.
7Yinni Gusunɔ, ɑ nɛn yibɛrɛbɑn wusu kɔsukɑ. A ben tii kpeerɑsiɑ mɑm mɑm. Bɑ ǹ mɑɑ bu yɑɑyɑmɔ sere kɑ bɑɑdommɑɔ.
8Yinni Gusunɔ, ɑ sɔ̃ wunɛn sinɑ ɡɔnɑɔ. Kɑɑ n sɑ̃ɑwɑ sunɔ sere kɑ bɑɑdommɑɔ. Wunɑ ɑ hɑnduniɑ kpɑre ɡem sɔɔ. Wunɑ ɑ tɔmbu sirimɔ dee dee.
10Yinni Gusunɔ, ɑ sɑ̃ɑwɑ be bɑ dɑm dɔremɔn kɔ̃so. A sɑ̃ɑwɑ be bɑ kpikiru suɑn kuku yeru.
11Yinni Gusunɔ, be bɑ wunɛn yĩsirun bɛɛrɛ yɛ̃, bɑ rɑ n nun nɑɑnɛ sɑ̃ɑ. Be bɑ nun kɑsu, ɑ ku rɑ bu biru kisi.
12Yinni Gusunɔ u win sinɑ ɡɔnɑ tɛriɑ Siɔniɔ. I nùn siɑro kɑ womusu. I win sɔmɑn ɡɑri kpɑro. I de bwesenu kpuro nu yi nɔ.
13U rɑ be bɑ wuri mɔ̀ yɑɑye. U rɑ be bɑ nɔni sɔ̃ɔren kɑnɑru nɔ. U rɑ be bɑ bu dɑm dɔremɔ sɛɛyɑsie.
14Yinni Gusunɔ, ɑ mɑn durom kuo. A mɛɛrio wɑhɑlɑ ye nɑ mɔ̀ be bɑ mɑn tusɑn sɔ̃. A mɑn wɔro ɡɔɔn nɔmɑn di,
15kpɑ n kpĩ nɑ n wɑ̃ɑ Siɔnin tɔmbun suunu sɔɔ, nɑ n tɑkɑru mɔ̀ ye ɑ mɑn kuɑn sɔ̃, nɑ n nuku dobu mɔ̀ fɑɑbɑ ye ɑ mɑn kuɑn sɔ̃.
16Wee bwese tukunu nu suurɑ ɡbɑ ɡɑbun sɔ̃, mɑ nin tii nu wɔri ye sɔɔ. Nu ɡɑbu yinɑ bɛriɑ, mɑ nin tiin nɑɑsu wɔri ye sɔɔ. Tɔn kɔ̃sobɑ sɔm kɔ̃sunu kuɑ. Mɑ ben tii bɑ nin ɑre wɑ. Yinni Gusunɔ u sɔ̃ɔsi mɑ u rɑ siri dee dee.
18Wee ye u koo de n koorɑ. Tɔn kɔ̃sobɑ koo ɡbiwɑ. Be bɑ nùn yinɑ bɑ koo kɑm ko.
19Adɑmɑ u ku rɑ yɑ̃ɑrobu duɑri. U rɑ de wɔnwɔndobu bɑ n yĩiyɔbu mɔ wi sɔɔ.
20Yinni Gusunɔ, ɑ seewo. A ku de bu nɛɛ, tɔnuwɑ u kɑ nun kinɛnu mɔ̀. A ku de bwese tukunu nu nun ɑtɑfiiru ko. A bu sɛɛyɑsio nɡe mɛ n weenɛ,
21kpɑ nu bɛrum soorɑ, nu ɡiɑ mɑ nu sɑ̃ɑwɑ tɔn dirobu. Yinni Gusunɔ, ɑ seewo.
