Text copied!
CopyCompare
Bibeli Gusunɔn Gari - Womusu

Womusu 132

Help us?
Click on verse(s) to share them!
1Sɑ̃ɑ dɑɑrun womu. Ge wee. Yinni Gusunɔ, ɑ Dɑfidi yɑɑyo win wɑhɑlɑ ye u kuɑ kpuron sɔ̃.
2Domi u wunɛ Yɑkɔbun Yinni dɑmɡii nɔɔ mwɛɛru kuɑ u nɛɛ,
3u ǹ duɔ win kuu bekuruɡirɔ u sere nɛɛ, u koo kpunɑ win kpin yerɔ mi u rɑ wɛ̃re.
4U ǹ dom yĩbirimɔ, u ǹ mɑɑ doyɑmɔ
5mɑ n kun mɔ u wunɛ Yɑkɔbun Yinni dɑmɡii wɑ̃ɑ yeru kuɑ.
6Wee sɑ nuɑ mɑ woodɑn kpɑkororu tɑ wɑ̃ɑ Efɑrɑtɑɔ, mɑ sɑ tu deemɑ Yɑɑrin ɡberɔ.
7Su du Yinni Gusunɔn sɑ̃ɑ yerɔ, kpɑ su nùn kpunɑ.
8Yinni Gusunɔ, ɑ seewo kpɑ ɑ nɑ mi ɑ rɑ wɛ̃re wunɛ kɑ wunɛn woodɑn kpɑkororu tèn wɔllɔ ɑ rɑ wunɛn yiiko sɔ̃ɔsi.
9A de wunɛn yɑ̃ku kowobu bɑ n ɡem swĩi, kpɑ be bɑ nun nɑɑnɛ sɑ̃ɑ bɑ n nuku dobun kuuki mɔ̀.
10A ku wi ɑ ɡɔsɑ yinɑ Dɑfidi wunɛn sɔm kowon sɔ̃.
11Yinni Gusunɔ u Dɑfidi ɡem sɔ̃ɔwɑ kɑ bɔ̃ri u nɛɛ, u koo win nɔɔ mwɛɛru yibiɑwɑ kɑm kɑm te u nɛɛ, Dɑfidin bibun turowɑ u koo nùn kɔsire ko win bɑndu sɔɔ.
12Bii be, bɑ̀ n win ɑrukɑwɑni yibiɑ, mɑ bɑ win woodɑbɑ mɛm nɔɔwɑ be u bu wɛ̃, ben bibun bweserɑ tɑ ko n bɑndu dii sere kɑ bɑɑdommɑɔ.
13Yinni Gusunɔ u Siɔni ɡɔsɑ. U ye ɡɔsɑ yɑ n kɑ sɑ̃ɑ win wɑ̃ɑ yeru.
14Mɑ u nɛɛ, yɑ ko n sɑ̃ɑ win wɛ̃rɑ yeru sere kɑ bɑɑdommɑɔ. U koo sinɑ mi, domi wiyɑ u ye ɡɔsɑ.
15U koo ye domɑru kuɑ, kpɑ u ye dĩɑnu wɛ̃.
16U koo yen yɑ̃ku kowobu fɑɑbɑ ko. Kpɑ be bɑ nùn nɑɑnɛ sɑ̃ɑ bu nuku dobun kuuki ko.
17Miyɑ u koo Dɑfidi wi u ɡɔsɑn dɑm sosi, kpɑ u win bweserun ɡoo swĩi, u n sɑ̃ɑ nɡe fitilɑ.
18U koo de win yibɛrɛbɑ bu sekuru wɑ. Adɑmɑ wi, win sinɑ furɔ ɡɑ ko n bɑllimɔwɑ win wiru wɔllɔ.