1Womu ɡe Dɑfidi u wom kowobun wiruɡii kuɑ. Ge wee.
2Gusunɔ, ɑ seewɑ mɑ wunɛn yibɛrɛbɑ bɑ yɑrinɑ. Wunɛn wɛrɔbu bɑ duki suɑ wunɛn wuswɑɑn di.
3A bu yɑrinɑsiɑ nɡe wiisu. Mɑ bɑ yɑndɑ nɡe ɡum minɛru te bɑ dɔ̃ɔ tĩi. Tɔn kɔ̃sobu bɑ mundɑ wunɛn wuswɑɑɔ Gusunɔ.
4Adɑmɑ ɡemɡibu bɑ rɑ n nuku dobu kɑ nɑsɑrɑ mɔwɑ wunɛn mi kpɑ bɑ n yɛ̃ɛrimɔ.
5I Gusunɔn yĩsiru wɔlle suo kɑ womusu. I nùn swɑɑ kuo, u ɡbɑburu mɔ̀, u ɡuru winu sɔni u wee. Win yĩsirɑ Yinni Gusunɔ. I nuku dobu koowo win wuswɑɑɔ.
6Yinni Gusunɔ, wunɑ ɑ sɑ̃ɑ ɡobekubɑn bɑɑbɑ kɑ ɡɔminibun kɔ̃so. A wɑ̃ɑ wunɛn wɑ̃ɑ yee dɛɛrɑrɔ.
7Wunɑ ɑ rɑ be tɔmbɑ yinɑ yɛnu wɛ̃, kpɑ ɑ yobu yɑkiɑ, ɑ bu nuku dobu wɛ̃. Adɑmɑ kɑɑ mɛm nɔɔ sɑribɑ deriwɑ mi ɡɑ̃ɑnu sɑri.
8Gusunɔ, sɑnɑm mɛ ɑ wunɛn tɔmbu swɑɑ ɡbiiye ɡbɑburɔ,
9tem mu yĩirɑ, mɑ wɔllɑ wukiɑrɑ kɑ dɑm wunɛn wuswɑɑɔ. Mɑ Sinɑin ɡuurɑ diirɑ wunɛ Isirelibɑn Yinnin wuswɑɑɔ.
10A derɑ ɡuri bɑrukɑɡiɑ yɑ nɑ, mɑ wunɛn tem sɔɔ wɑ̃ɑrɑ wurɑmɑ.
11Mɛ sɔɔrɑ wunɛn tɔmbɑ ben wɑ̃ɑ yeru kuɑ, mɛ, mɛ ɑ sɔɔru kuɑ kɑ kĩru wɔnwɔndobun sɔ̃.
12Yinni Gusunɔ, ɑ woodɑ wɛ̃, mɑ tɔn kurɔ sɔmɔ dɑbiru bɑ ye kpɑrɑ.
13Yibɛrɛbɑn tɑbu sinɑmbɑ yɑkikirɑmɔ, mɑ ben kurɔbu bɑ ben yɑ̃nu bɔnu mɔ̀ ni bɑ deri.
14N sɑ̃ɑre kpɑrukonun kɑsi yi sii ɡeesu sɔɔwɑ mɑ nin sɑnsu wurɑ mɔnsi, mɑ i sere dɑ i kpĩ yɑ̃ɑ ɡɔ̃sɔ?
15Sɑnɑm mɛ Dɑm kpuroɡii wi, u sinɑm be yɑrinɑsiɑ, tem mu bururɑ ɡuu te bɑ mɔ̀ Sɑlumɔniɔ.
16Bɑsɑnin ɡuunu nu sɑ̃ɑwɑ ɡuu bɑkɑnu. Nin ɡunɡunu mɑɑ dɑbi.
17Bɛɛ ɡuu ni i ɡunɡuu dɑbinu mɔ, mbɑn sɔ̃nɑ i kɑ Gusunɔn ɡuu te u ɡɔsɑ nisinu mɔ̀. I n yɛ̃ mɑ miyɑ u koo win wɑ̃ɑ yeru ko sere kɑ bɑɑdommɑɔ.
18Yinni Gusunɔ, ɑ tɑbu kɛkɛ dɑbinu mɔ, mɑ ɑ sĩimɔ yen nɔrɔm nɔrɔm kɑ yen nɔrɔm nɔrɔm subɑ yɛndun suunu sɔɔ. Wunɛn yiiko ye yɑ sɔ̃ɔsirɑ Sinɑiɔ yɑ wurɑ wunɛn sɑ̃ɑ yerɔ.
19Yinni Gusunɔ, ɑ yɔɔwɑ ɡuurun wɔllɔ, mɑ ɑ tɔmbu yoru mwɛɛrɑ. Mɑ bɑ nun kɛ̃nu kɑ̃, kɑ mɑm be bɑ nun seesimɔn tii.
20Gusunɔ u rɑ sun nɔɔri. Wiyɑ u sɑ̃ɑ bɛsɛn fɑɑbɑ kowo. Yen sɔ̃, sɑ ko nùn siɑrɑ tɔ̃ɔ bɑɑtere.
21Wiyɑ u rɑ tɔnu fɑɑbɑ ko. Wi turowɑ u koo kpĩ u nùn yɑkiɑ sɑɑ ɡɔɔn di.
22Wiyɑ u koo win yibɛrɛbɑn wiru kɔrɑ. Kpɑ u be bɑ wɑ̃ɑ durum sɔɔn wii suunu yɑbe.
23Wiyɑ u nɛɛ, u koo kɑ bu nɑ sɑɑ Bɑsɑnin di, kpɑ u bu yɑrɑmɑ sɑɑ nim wɔ̃ku sɔɔn di,
24kpɑ su bɛsɛn nɑɑsu kpɛ̃ɛ ben yɛm sɔɔ, kpɑ bɛsɛn bɔ̃nu nu ben ɡonu tem.
25Gusunɔ nɛn Yinni, nɛn sinɑ boko, bɑ wunɛn sɑnum wɑɑmɔ wunɛn sɑ̃ɑ yee dɛɛrɑrɔ.
26Wom kowobɑ bɑ swɑɑ ɡbiɑ, mɑ be bɑ bɑrɑnu kɑ mɔrɔkunu soomɔ bɑ bu swĩi, bɑ wɑ̃ɑ wɔndiɑ be bɑ bɑrɑnu soomɔn suunu sɔɔ.
27I Yinni Gusunɔ siɑro mi tɔmbɑ mɛnnɑ. Bɛɛ Isirelibɑn bweseru, i nùn wɔlle suo.
28Bɛnyɑmɛɛ wi u piiburu bo, win bweserɑ tɑ bu swɑɑ ɡbiiye, mɑ Yudɑn bwese kɛrɑn wiruɡibu kɑ ben tɔmbu bɑ bu swĩi. Yen biru, Sɑbulonin bwese kɛrɑ kɑ Nɛfitɑliɡiɑn wiruɡibu bɑ bu swĩi.
29Gusunɔ u woodɑ wɛ̃ bu nùn ko dɑmɡii. Gusunɔ, ɑ ye ɑ sun kuɑ dɑm sireo.
30Sinɑmbɑ koo kɑ nun kɛ̃nu nɑɑwɑ wunɛn sɑ̃ɑ yerɔ te tɑ Yerusɑlɛmun diɑ kpuro ɡunum kere.
31Yinni Gusunɔ, ɑ Eɡibiti yɑm swĩɛyɔ, ye yɑ nun sɑ̃ɑmɔ kɑ sii ɡeesu, ye, ye yɑ sɑ̃ɑ nɡe kɑrɑku ɡe ɡɑ wɑ̃ɑ dɑɑrun bɔkuɔ, ǹ kun mɛ nɡe nɑɑ kinɛ ni nu wɑ̃ɑ ɡɔ̃sɔ, ye, ye yɑ bwesenu dɑm dɔremɔ. A be bɑ rɑ n tɑbu kĩ yɑrinɑsio.
32Dɑmɡibɑ wee sɑɑ Eɡibitin di. Mɑ Etiopiɡibɑ duki mɔ̀ bɑ nɔmɑ sue Gusunɔn mi ɡiɑ.
33Hɑnduniɑn sinɑmbu, i Yinni Gusunɔ siɑro kɑ womusu. I nùn wɔlle suo.
34I nùn siɑro kɑ womusu wi, wi u sĩimɔ wɔllɔ te tɑ wɑ̃ɑ sɑɑ yellun di. Wee win nɔɔ dɑmɡuu ɡɑ nɔɔrɑ.
35I Gusunɔ bɛɛrɛ wɛ̃ɛyɔ. Win yiiko yɑ wɑ̃ɑwɑ Isirelibɑ sɔɔ. Mɑ win dɑm mu wɑ̃ɑ wɔllɔ.
36Gusunɔ, ɑ nɑnum mɔ wunɛn sɑ̃ɑ yerɔ. Wunɛ Isirelibɑn Yinni, ɑ rɑ wunɛn tɔmbu dɑm wɛ̃. Gusunɔ, sɑ nun siɑrɑ.
