Tutui Masososaꞌ 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Ia nana Esau tititi-nonosi nara. Ria boe nanuu nade fekeꞌ, Edom.

²Esau sao ana feto Kanaꞌan dua. Esa, lahenda Het, Elon ana feto na, nade Ada. Kadua na lahenda Hewi, nade Oholibama, papa na nade Anah, ma baꞌi na, nade Sibeon.

³Esau boe sao Ismael ana feto na, nade Basmat. Basmat aꞌa tou na, nade Nebayot.

⁴Esau sao ulun, Ada boki na Elifas. Basmat boki na Rehuel.

⁵Boe ma Oholibama boki na Yeus, Yalam, ma Kora. Esau ana nara boki si rai nusa Kanaꞌan.

⁶Laiꞌ esa de, Esau lali leo nusa fekeꞌ esa neu, dooꞌ a neme Yakob mai. Ana noo sao-anan, lahenda mana noi ra, banda-manuꞌ, ma basa hata-heton.

⁷Esau no Yakob esaꞌko matan, nana huu banda-manu ma hata-heto nara dodouꞌ raan seli. De rasetiꞌ nusaꞌ ria.

⁸Boe ma Esau (riꞌ Edom), neu leo nai nusa lete marerebiꞌ ara nai Seir.

⁹Ia nana, Esau tititi-nonosin, fo rae ‘lahenda Edom’. Ara leo rai nusa lete marerebiꞌ ara rai Seir.

¹⁰Esau saon Ada, boki ana touꞌ esa, nade Elifas. Elifas ana toun lima. Siꞌ, Teman, Omar, Sefo, Gatam ma Kenas. Elifas sao nafufuni na, nade Timna. Ria boki ana touꞌ esa, nade Amalek. Esau saon Basmat boki ana touꞌ esa, nade Rehuel. Rehuel hapu ana touꞌ haa, siꞌ: Nahat, Sera, Syama ma Misa.

¹⁴Esau saon Oholibama, riꞌ Anah ana na, fo Sibeon upu na, boki ana touꞌ telu, siꞌ: Yeus, Yalam, ma Kora.

¹⁵Esau upu-ana nara kofela dadi reuꞌ leo dodouꞌ. Esaꞌko noꞌ mane leo na. Esau ana ulun Elifas ana nara, dadi mane leo Teman, mane leo Omar, mane leo Sefo, mane leo Kenas, mane leo Kora, mane leo Gatam, ma mane leo Amalek. Sira basa, nana Esau no saon Ada tititi-nonosin.

¹⁷Esau anan Rehuel ana nara, dadi mane leo Nahat, mane leo Sera, mane leo Syema, ma mane leo Misa. Sira basa, nana Esau no saon Basmat tititi-nonosin.

¹⁸Esau no saon Oholibama ana nara, dadi mane leo Yeus, mane leo Yalam, ma mane leo Kora.

¹⁹Leo sira basa, nana Esau tititi-nonosin.

²⁰Nai mamanaꞌ ria, boe hapu lahenda Hori esa, nade Seir. Ria ana nara kofela, dadi reuꞌ leo dodouꞌ. Esaꞌko noꞌ mane leon. Basa de, ana nara dadi mane leo Lotan, mane leo Sobal, mane lao Sibeon, mane leo Anah, mane leo Dison, mane leo Eser, ma mane leo Disan.

²²Lotan ana nara, siꞌ Hori ma Heman. (Lotan feto na, riꞌ Timna).

²³Sobal ana nara, siꞌ: Alwan, Manahat, Ebal, Sefo, ma Onam.

²⁴Sibeon ana nara, siꞌ Aya, ma Anah. Anah riꞌ hapu oe mata hanas nai mo soroaeꞌ, tepoꞌ fo ana foo papa na keledei nara.

²⁵Anah ana feto na, riꞌ, Oholibama. Ma ana tou na, riꞌ, Dison. Dison ana nara, siꞌ, Hemdan, Esban, Yitran, ma Keran.

²⁷Eser ana nara, siꞌ, Bilham, Saꞌawan, ma Akan.

²⁸Disan ana nara, siꞌ, Us, ma Aran.

²⁹De mane leo lahenda Hori ra, siꞌ, Lotan, Sobal, Sibeon, Anah, Dison, Eser, ma Disan. Sira basa leo rai nusa Seir.

³¹Tepoꞌ fo nusa Israꞌel bei ta nanuu maneꞌ fa, te nai dae Edom nanuu maneꞌ so. Sira nade nara ratutuka ao siꞌ:

³²Ara soꞌu ra Beor ana na, nade Bela, dadi mane nai kota Dinhaba.

³³Tepoꞌ fo Bela maten, Yobab dadi mane, kati ni. Ria papa na, nade Sera, neme koro Bosra mai.

³⁴Tepoꞌ fo Yobab maten, Husam dadi mane, kati ni. Husam, nana neme lahenda Teman nara nusan mai.

³⁵Tepoꞌ fo Husam maten, Hadad dadi mane kati ni. Ria papa na, nade Bedad neme koro Awit mai. (Ria riꞌ naseki lahenda Midian ara, tepoꞌ fo ratati nai Moab.)

³⁶Tepoꞌ fo Hadad maten, Samla dadi mane kati ni. Samla nana, neme koro Masreka mai.

³⁷Tepoꞌ fo Samla maten, Saul dadi mane kati ni. Saul nana, neme koro Rehobot nai lee suuꞌ.

³⁸Tepoꞌ fo Saul maten, Baꞌal-Hanan dadi mane kati ni. Ria papa na, nade Akbor.

³⁹Tepoꞌ fo Baꞌal-Hanan maten, Hadar dadi mane kati ni. Hadar nana, neme koro Pau. Sao na nade Mehetabel. Mehetabel papa na, nade Matret. Ma baꞌi na, riꞌ Mesahab.

⁴⁰De, mane leo fo dadi remeꞌ Esau sara mai, nana siꞌ: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, ma Iram. Ara fee nusa nara ranade tuka sira esa-esa naden. De, sira basa, nana Esau tititi-nonosin, fo tuka lahenda Edom ara tutuin.