Tutui Masososaꞌ 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Basa ria boe ma, MANETUALAIN dedea no Noh nae, “Au mete basa mamanaꞌ lalaꞌen, tehuu Au hapu adaꞌ noi o riꞌ dale ma roos a. Huu ria na, mo sao-ana mara masoꞌ ofaꞌ daleꞌ meu leo.

²Neme basa banda rupaꞌ fo emi bole mia paa nara, ma bole meni soaneuꞌ Au, sona muni pasang behituꞌ leo ofaꞌ a daleꞌ neu. Neme basa manupui rupaꞌ ara boe, muni pasang behituꞌ. Tehuu neme banda fekeꞌ ara mai, muni adaꞌ noi pasang beesaꞌ. No ria na, banda ma manupuiꞌ sira dadi bini-kee, ela bosoꞌ ramaetu si.

⁴Mafarereneꞌ matalolole! Seluꞌ faiꞌ hitu, Au aꞌonda uda ta pake hahaeꞌ fa losaꞌ leledoꞌ haa hulu, ma hatuꞌ haa hulu. No ria na, Au amate katemaꞌ basa-basan riꞌ Au adu a si so, fo rasoda rai madaꞌ lain.”

⁵Basa boe ma Noh tao tuka matetuꞌ MANETUALAIN pareta na katemaꞌ.

⁶Tepoꞌ fo faa inaꞌ a, nana Noh teun natun nee.

⁷Noh no sao na, ma ana-manafeu nara masoꞌ leo ofaꞌ a daleꞌ reu, fo soi ra ao nara remeꞌ faa ina a mai.

⁸Noh tuka MANETUALAIN pareta na, boe ma ana neni manupui rupaꞌ, ma banda fekeꞌ ara, esaꞌko noꞌ pasang na, leo mae banda fo lahenda bole naa paa na, ma lahenda raluli a.

¹⁰Basa faiꞌ hitu, boe ma faa ina sikilapa mai de napoti na dae-bafoꞌ ia.

¹¹Naraa no Noh teun natun nee, bulaꞌ dua ma faiꞌ sanahulu hitu, boe ma fa ina a mai. Faiꞌ ria nonooꞌ leo, lalai natahuꞌa, de oe a noi sikilapaꞌa mai. Ma basa oe mataꞌ ara adi si, de oe a nasapura deaꞌ mai.

¹²Boe ma uda a ta pake hahaeꞌ fa hatu-leledon, losaꞌ faiꞌ haa hulu.

¹³Tehuu faiꞌ ria boe, Noh sao na, anan telus, siꞌ Sem, Yafet no Ham, ma manafeu nara, basa si masoꞌ leo ofaꞌ daleꞌ reu.

¹⁴Ara masoꞌ sama-sama roo basa banda ra, riꞌ banda aeꞌ, banda fuiꞌ, manlodo-manraeꞌ, manupuiꞌ, ma banda feke madilaꞌ ara.

¹⁵Basa masodaꞌ ara pasang beesaꞌ, masoꞌ leo ofaꞌ daleꞌ reu sama-sama ro Noh, sama leoꞌ Manetualain pareta ni a. Basa si masoꞌ rala ofaꞌ daleꞌ, boe ma MANETUALAIN koe ofaꞌ a lelesu na.

¹⁷Uda bau-inaꞌ a mai naroo, losa faiꞌ haa hulu, ma faa a boe-boe namadema losaꞌ ofaꞌ a bonu. Oe a ae naroo losaꞌ seli basa lete madema ra.

²⁰Oe a ae ta pake hahaeꞌ fa, losaꞌ dedema na meter hitu neme leteꞌ ara poi na mai.

²¹No ria na, basa masodaꞌ fo rai madaꞌ lain mate katemaꞌ asa. Riꞌ lahenda, banda aeꞌ, banda fuiꞌ, manlodo-manraeꞌ, ma manupuiꞌ ara. Adaꞌ noi Noh ma basa si rai ofaꞌ a daleꞌ, soi ra ao nara.

²⁴Oe a ta reꞌe fa losa faiꞌ natun esa lima hulu.