1Izelayɛle nuiti ti Ɠɔoɠɔ GALAGI wanama vai ɠɛɛni mɔnɔ. Naa ti lɔɔni Madiyan nuiti zeezu, kona dɔfela laawu.
2Madiyan nuiti ti Izelayɛle wola ɓɔlɔni. Madiyan nuiti ta-vaa ɠa é kɛɛni, Izelayɛle nuiti ti lɔɔɠuzuʋɛti kpɛtɛni la gizeiti ba, ta pugiti, ta fasaiti.
3Siɛgi zu Izelayɛle nuiti ta la tii ɠɛɛna la, Madiyan nuiti ti ɠɛni lɛɛzu ta Amalɛke nuiti, siɛziɛ nuiti ti ga folo ɠulazu ʋele nuiti, ti li ti laalɔɠɔma.
4Ti ʋuuzuʋɛ ɓɛtɛni zooi zu, ti ɗa zooi zu ɠulanumai kpein koloɠolo, Gaza maaɠoolii zu. Ti la ɠɛni daamiani nɔpɛ zɛsu Izelayɛle nuiti zea, anɛɛ baalagiti, ɓaa nikɛiti, anɛɛ soovalegiti.
5Ti ɠɛni ʋaazu ga ta-loganiiti, ta ta-zeɠe ɠotaiti, eɠɛ koto kpulugiti, nu la ɠɛni zooga, é ʋa ti ɠaalu, tiya-o, ta-ɲɔmɛiti-yo, ti ɠɛni ʋaazu zooi zu, zooi ɠoloɠolo fai ma.
6Izelayɛle wola ʋalani, tɔɔzei Madiyan nuiti ba, Izelayɛle nuiti ti kpeei looni Ɠɔoɠɔ GALAGI woizu.
7Siɛgi zu ti kpeei looni la Ɠɔoɠɔ GALAGI woizu, Madiyan ná-faa zu,
8é GALA goo wo nui leʋeni ti ma, naa ɠɛni ti ma: «Ɠɔoɠɔ GALAGI, Izelayɛle ná-GALAGI wooi ɠaa: ‹Gè lɛɛni ga woye, gè wo ɠula Ezipete yooi ʋa, gè wo ɠulani duɔlai ma ʋɛlɛi wu.
9Gè wo ɠizoni, gè wo ɠula Ezipete nuiti zea, ta niiti kpein ti ɠɛni wo maanɔɠɔzu, gè ti ɓɛ wo luɠɔ, gè ta-yooi ve wo ya.
10Gè ɠɛni wo ma: Nà ga Ɠɔoɠɔ GALAGI, wa-ƓALAGI, à mina nɔkɔ Amɔɔl nuiti ta-ɠalagiti bu, niiti wo zeini ta-yooi zu. Kɛlɛ wo la woiloni gòoi ma.› »
11Ɠɔoɠɔ GALAGI ná-geezuɠeelai ʋaani Wɔfela taazuʋɛ. É zeini sɛne gului wu, nii é ɠɛni loni Zoase ná-zooi zu, Aɓiyezɛɛl ná-pɛlɛyeɠei wu nui. Ná-doun zunui Zeedeyɔn ɠɛni moloi loɠazu, dɔɔ ɓɔigi ɓɛtɛzuʋɛ, é ɗa dɔɔɠu Madiyan nuiti ba.
12Ɠɔoɠɔ GALAGI ná-geezuɠeelai ɠulani kɛlɛma bɛ, é ɠɛni ma: «Ɠɔoɠɔ GALAGI ɠa è ʋa, kɔɔɠɔ nu wolai!»
13Zeedeyɔn gooɠaaʋoteni, é ɠɛ ma: «Ee, màliɠii, ni Ɠɔoɠɔ GALAGI ɠa gi ʋa, lee vaa zu niima maanɔɠɔ vaiti kpein ti zeizu gi ma? Poo golai naati ta mini, niiti gi-mɛmɛwolani ti-ma vaiti boni gi ma, siɛgi zu ti ɠɛni la gi ma: ‹Ɠɔoɠɔ GALAGI ɠa é gi ɠulani Ezipete yooi zu?› Niizu é ɠɛlɛa gi ʋa, é gi lɔ Madiyan nuiti zeezu.»
14Ɠɔoɠɔ GALAGI ɠaaʋoteni ma, é ɠɛ ma: «Li ga naama zɛbɛi, nii é è ʋa, ɗa Izelayɛle nuiti unmɔɔ, è ti ɠula Madiyan nuiti zeezu. Nà laade ɓaa, gè ʋa ɠɛ è leʋesu?»
15Kɛlɛ Zeedeyɔn ɠɛni ma: «Ee, màliɠii, leeni ɠa nà Izelayɛle nuiti kizo da? Nà-pɛlɛyeɠei ɠa gaalɔiɗai Manasee ná-bolodai zu, nà ɠa gè ga doungoi kɛ̀ɛ ná-doun zunuiti saama.»
16Ɠɔoɠɔ GALAGI ɠɛni ma: «Kɛlɛ nà ɠɛ è ʋa, ɗa zobo sɔlɔɔ Madiyan nuiti ma, eɠɛ zunu ɠila nɔ.»
17Zeedeyɔn ɠɛni ma: «Ni è zaalai laa mà, poo fe zèa, nii nà kwɛɛ da, ga Màliɠii, ɗa ɠa è ɓɔɛzu pɔ̀.
18Nà è maanɛɛnɛzu, mina maaɠooza ʋɛ ʋa, eyɛsu gè ʋa ga nà-vebɛanii, gè da è ɠɔɠɔwu.» Naa ɠɛni ma: «Nà yɛsu ʋɛ, eyɛsu è ɠale ma, è ʋa ʋɛ.»
19Zeedeyɔn liini é boli ɓokpagi ɓɛtɛ, é ɓɔ ɓulu vukɔi kilo ʋuusaʋagɔ (30) ʋa, é naa ɓɛtɛni ga ɓului, nii lɛʋɛ la su. É suai ʋuuni kpɔlɔgi zu, é sua ɗɛi ʋu pɔlɔ liɠii zu, é li ga tiye pɔ sɛne gului wu, é sei kakala.
20GALA ná-geezuɠeelai ɠɛni ma: «Suai zeɠe ta ɓului nii lɛʋɛ la su, ti la kɔtu wolai tɛi maazu, è sua ɗɛi ʋu ti ma.» Zeedeyɔn gooi zoni.
21Tukpɔi é ɠɛni Ɠɔoɠɔ GALAGI ná-geezuɠeelai ya, é naa zokpai loni suai ʋa, ta ɓului nii lɛʋɛ la su. Abui soni kɔtu wolai ʋa, é suai ɠala, ta ɓului nii lɛʋɛ la su. Naa ʋolu, Ɠɔoɠɔ GALAGI ná-geezuɠeelai ɲɛɛlɛni gaazu.
22Zeedeyɔn kwɛɛni ga Ɠɔoɠɔ GALAGI ná-geezuɠeelai ʋe. É kpeei looni, é ɠɛ: «Màanɔɠɔa, Màliɠii, Ɠɔoɠɔ GALAGI! Mazɔlɔɔ gè Ɠɔoɠɔ GALAGI ná-geezuɠeelai ɠaa, ga gàazuʋɛ.»
23Kɛlɛ Ɠɔoɠɔ GALAGI ɠɛni ma: «Yiilɛi, mina lua, è la zaazu.»
24Zeedeyɔn zalaɠa ɠulazuʋɛ loni náʋɛ Ɠɔoɠɔ GALAGI ʋɛ, é daasei pɛɛni ga: «Ziilɛi GALAGI.» Toɠa dɛ ná, zaaɠaza Wɔfela taazuʋɛ, Aɓiyezɛɛl ná-pɛlɛyeɠei zaama.
25Ma ɓɔkɔi nɔ, Ɠɔoɠɔ GALAGI ɠɛni Zeedeyɔn ma: «È-ɠɛɛ ná-nikɛ zinɛi zo, kona dɔfela gelei. Ɓaale ná-zalaɠa ɠulazuʋɛ ɠoloɠolo, nii é ga è-ɠɛɛ nɔnɔi, sale ɠɔɔ wului é loni koba, naa ɓalaa ɠoloɠolo.
26Naama ɠizei maazuʋɛ ɠa è zalaɠa ɠulazuʋɛ ɓɛtɛzu ná, ga pagɔ, Ɠɔoɠɔ GALAGI, ɗa-ƓALAGI ʋɛ. Ɗa nikɛ zinɛi velesiɛi zo, è kula ga gala zalaɠai, sale ɠɔɔ wului nii è koloɠolosu, naa ɠa ɗa seɠe, è kɛ ga koʋii.»
27Zeedeyɔn zunu puugɔ zeɠeni ná-botiɠɛ nuiti saama, é naa ɠɛɛni nii kpein Ɠɔoɠɔ GALAGI boni ma. Kɛlɛ é la ɠɛni zooni, é ʋa naa ɠɛ ga foloi, kɛni kpidii, tɔɔzei é ɠɛni luazu kɛɛɠɛ ná-pɛlɛyeɠei ʋa, ta taaʋeaiti.
28Siɛgi zu taaʋeaiti ti wuzeɠeni la ga sobuzobui, ti pɛtɛni ga Ɓaale ná-zalaɠa ɠulazuʋɛ ɠoloɠoloni, sale ɠɔɔ wului ɠoloɠoloni, nikɛ zinɛi ɠilagi ɠulani ga gala zalaɠai zalaɠa ɠulazuʋɛ, naa ɓɛtɛa niinɛi.
29Ti ɠɛni ɓɔɠɔ ɠaazaɠasu, ti ɗa ɠɛ: «Ɓɛ ɠa é naa ɠɛai?» Siɛgi zu ti ɠɛni gaazaɠagi wosu da, ti ɠɛni ti ma: «Zeedeyɔn ʋe, Zoase ná-doun zunui, naa ɠa é naa ɠɛɛni.»
30Gaamanɔ, taaʋeaiti ti ɠɛni Zoase ma: «È-loun zunui ɠula, kɛni é za, mazɔlɔɔ é Ɓaale ná-zalaɠa ɠulazuʋɛ ɠoloɠologa, ta sale ɠɔɔ wului é ɠɛni ná ɠobaʋɛ.»
31Zoase maaɠoolii zu nuɓusɛiti gooɠaaʋoteni, é ɠɛ ti ma: «Wa ɠa wa Ɓaale maalogi wo bɛ ɓaa? Wa ɠa wa ɓɔ ba, wo kizo? Nu-o-nu a Ɓaale maalobona, ta naama nui ʋaa, aisa lina sobu. Ni Ɓaale ɠa ga gala, é ɓɔɠɔ maalogi wo ɓɔɠɔ ʋɛ, tɔɔzei ti ná-zalaɠa ɠulazuʋɛ ɓezeɠelega.»
32É zo naama voloi ma, ti Zeedeyɔn laasei pɛɛni ga Yeluɓaale (nii poluʋɛ ga «ɓaale ɓɔɠɔ maalobo»), tɔɔzei ti ɠɛ ma: «Ɓaale ɓɔɠɔ maalobo tɔun daalɔɠɔma, tɔɔzei é ná-zalaɠa ɠulazuʋɛ ɠoloɠoloni.»
33Madiyan nuiti ta Amalɛke nuiti, siɛziɛ nuiti ti ga folo ɠulazu ʋele nuɓusɛiti, ti ɠaalɛɛni ba, ti Zuludɛn ɓudɛ, ti li ti ʋu Zizeleyɛle nɛmɛi zu.
34Ɠɔoɠɔ GALAGI ná-Zɛnvui yeini Zeedeyɔn ma, é lɔ su. É puʋugi vɛɛni, é Aɓiyezɛɛl ná-pɛlɛyeɠei lolini, ti ʋilɛ polu.
35É keelaiti teʋeni Manasee ná-zooi zu, ti naati tolini ti ʋilɛ polu. É keelaiti teʋeni Asɛɛl ná pɛ, ta Zaɓulɔn, ta Nɛfetali, naati ti lɛɛni ti ti laaɠomi.
36Zeedeyɔn ɠɛni GALA ma: «Ni ɗa pɔ, è Izelayɛle ɠizo ga ze, eɠɛʋelei è bogai la,
37wɛlɛ, nii ɠa gè falizu è ma, nà baala kɔlɔi ʋɛɛzu zooi ma, molo loɠazuʋɛ. Ni nɔɗai a ʋuuna baala kɔlɔi nɔ ma, zooi nii é maaɠoolii zu, ná pɛ maavɔai yɛ de, nà kwɛɛ gè ɠɛ ɗa pɔ è Izelayɛle ɠizo ga ze, eɠɛʋelei è bogai la.»
38Ʋele nɔ ɠana é ɠɛɛni la. Poluma zobui, é wuzeɠeni ga sobuzobui, é li é baala kɔlɔi luɓa, ma nɔɗai kokoi laaveni.
39Zeedeyɔn ɠɛni GALA ma: «Mina yiiɠaawana mà, gaazaɠa gila kpe nɔ ɠa gè bosu ga ɗe, poo gaaɓelagi é ʋilɛ baala kɔlɔi ʋa, tɔ ɠila kpe nɔ vɔai yɛ de, kɛlɛ nɔɗai zooi maaʋɛ kpein zɛɓɛ maaɠoolii zu.»
40GALA ge naa nɔ ɠɛɛni mɔnɔ kpidii naa. Baala kɔlɔi ɠila kpe nɔ ɠa fɔai yɛni de, nɔɗai ʋuuni zooi ma ná pɛ.
