Text copied!
CopyCompare
GALA Sɛʋɛi - Tukpɔɠaaleʋe Nuiti

Tukpɔɠaaleʋe Nuiti 21

Help us?
Click on verse(s) to share them!
1Zunuiti ti ɠonani Misepa ga ti la mɔ ti-loun anzanu vea Ɓɛnzamɛn nu ʋɛ ga vulu.
2Nuɓusɛiti ti ʋaani Ɓeetɛle, ti yɛni zeini ná GALA kakala eyɛsu kpɔkɔi. Ti yɛni zɔngɔzu, ti ɗa wɔlɔ gola,
3ti ɗa ɠɛ ma: «Leeni vaa zu, Ɠɔoɠɔ GALAGI, Izelayɛle ná-GALAGI, niima vaa ɲɔu zii ɠɛai Izelayɛle? Leeni vaa zu Izelayɛle ʋalagai za ná-bolodai gila ma?»
4Poluma zobui, nuɓusɛiti kpein ti wuzeɠeni ga sobuzobui, ti zalaɠa ɠulazuʋɛ loni náʋɛ. Ti gala zalaɠaiti kulani ta ziilɛi zalaɠaiti.
5Naa ʋolu, Izelayɛle nuiti ti ɠɛni ɓɔɠɔ ma: «Izelayɛle wolodai kpein su, ma ɓɛgele ɠa é laade zaama, gaalɛbai zu, Ɠɔoɠɔ GALAGI ɠaazu?» Mazɔlɔɔ ti konai woni naama nui laalɔɠɔma, nii é la ʋaani Ɠɔoɠɔ GALAGI ɠakala Misepa, é woni ga ta naama nui ʋaa.
6Izelayɛle nuiti ti-ɠɛɛloin Ɓɛnzamɛn ná-fai ma maawɔin ti zoni, ti ɗa ɠɛ ma: «Za, bolodai gila kpeteʋea Izelayɛle ʋa.
7Leeni ɠa ada kɛ ti ʋɛ, nii a kɛ niiti ti yɛgai vulua, naati ti anza zɔlɔɔ? Tɔɔzei de ɠonani Ɠɔoɠɔ GALAGI ʋɛ, ga de la de-loun anzanuiti ta vea ti ya ga anza.»
8Ti ɠɛni ma: «Nui ta ɠa ná nɛi ɓaa, Izelayɛle ná-bolodaiti saama, nii é la lɛɛni Misepa, Ɠɔoɠɔ GALAGI ɠakala?» Ti kaani ga Yaɓeese nii é Galaade, naa ná-nu ɠila kpalaa ge la ɠɛni ʋaani kɔɔlaɠai zu, ta maaɓɔgi zu.
9Ti nuɓusɛiti gaalugai ma, Yaɓeese nii é Galaade, ti la ɠɛni naa ná-nu ɠila kpalaa kaani.
10Nuɓusɛiti ti kɔɔɠɔ nu waapuugɔ maazu felegɔ (12 000) leʋeni, ti devei ve ti ya, ti ɠɛ ti ma: «À li Galaade yooi zu, wo Yaɓeese laaʋeaiti pɛ paa, anzanuiti pɛ ta doungoiti.
11Wɛlɛ ʋelei wa kɛ la, à zunuiti kpein suwuɠaaleʋe, ta anzanui kpein niiti ti zunu vaa ɠwɛɛ.»
12Kɔɔɠɔ nui naati ti anzalopo ɓea unnaanigɔ (400) ɠaani Yaɓeese taaʋeaiti saama, Galaade yooi zu, niiti zunu la ɠɛni dɛ vɔɔɠuni ti ʋa. Ti liini ga tiye, Silo kɔɔlaɠai zu, Kanaan yooi zu.
13Nuɓusɛiti kpein ti keelaiti teʋeni Ɓɛnzamɛn nuiti ma, niiti ti lɔɔɠuni Limon fasai ma, nii a kɛ ti yɔɠɔzuɓɛtɛ, ziilɛigi ɠɛ ti zaama.
14Ɓɛnzamɛn nuiti ti ɠaleni ma. Ti anzanuiti feeni ti ya, niiti ti la ɠɛni ti ʋaani Yaɓeese, Galaade yooi zu, kɛlɛ é la ɠɛni kula ɠɛɛni ti ʋa.
15Ɓɛnzamɛn nuiti maawɔin nuɓusɛiti soni, tɔɔzei Ɠɔoɠɔ GALAGI zeɠe ɲaka wɔɔni Izelayɛle wolodamaiti saama.
16Bɛbɛi ma ɠundiɠiiti ti ɠɛni ma: «Ada kɛ ɠale, de ʋa anzanu zɔlɔɔ zɔiti bɛ, ti yɛgai vulua, tɔɔzei Ɓɛnzamɛn anzanuiti kpein undaaʋiligɛ?»
17Ti ɠɛni ma mɔnɔ: «Niiti ti yɛgai vulua Ɓɛnzamɛn nuiti saama, naati ti ta-ʋoganiiti makɛ, naa ɠa a kɛ bolodai ta ɠaa mina ʋala ba Izelayɛle zu.
18Kɛlɛ ade la zooga de ʋa de-loun anzanui ta ve ti ʋɛ ga anza.» Mazɔlɔɔ Izelayɛle nuiti ti konai woni, ti ɠɛ ma: «Naama nui ɠotoʋɛ, nii a anza ve Ɓɛnzamɛn nui ta ya!»

19Ti ɠɛni ma: «Wɛlɛ kona-o-kona Ɠɔoɠɔ GALAGI ná-fɛtii ɠa ɗa ɠula Silo, nii é Ɓeetɛle lɛkpɛmaʋɛ nu ɠɔʋɛzuʋɛ, é lo pelei naa ʋa folo ɠulazu ʋelei, nii é zeɠezu Ɓeetɛle é ɗa li Sikɛme, ta Leɓɔna lɛkpɛmaʋɛ nu yeezazuʋɛ.»
20Naa ʋolu, ti niima levei veeni Ɓɛnzamɛn nuiti zea, ti ɠɛ ti ma: «À li wo lɔɔɠu ná, leezɛn ɓeleiti su.
21Siɛgi zu wo Silo anzalopoiti kaazu la, ti ɗa kuai wo, ti ɗa lati, wa ɠula leezɛn ɓelei zu, wo ɠilagilagi ɠa anzalopo ɠila so ɓɔɠɔ ʋɛ ga anza, wo li ga tiye Ɓɛnzamɛn yooi zu.
22Ni ti-ɠɛɛni, ɓaa ti-ɠɛɛleaiti, ta ʋaana ti ɓaazaɠa gi ʋɔ bɛ, gá ɠɛ ti ma: ‹À gi maawɔinɠa, mazɔlɔɔ gi la anzanu zɔlɔɔni ti ʋɛ kɔɔi zu. Wa laade wo ʋa fe ti ya, ni wa ɠɛni de, wa la ɠɛ ga sɔba nu.› »
23Zekana Ɓɛnzamɛn zunuiti ti kɛɛni la, ti anzanuiti seɠeni ga ti-liegɔi, é ɠula anzalopoiti saama, niiti ti ɠɛni kuai wosu Silo, naa ʋolu ti li ga tiye. Ti ta-laaiti to ʋolu, ti zei ná, ta-ʋoganiiti saama ti ɠilagilagi pɛ.
24Naama ziɛgi nɔ zu, Izelayɛle nui zɔiti ti liini ta-wolodaiti su, ta-ʋɛlɛyeɠeiti bu, ti ɠilagilagi ti zei ta-ʋoganii unda.
25Naama ziɛgi zu, masa ge la ɠɛni Izelayɛle unda. Ɛsɛ ge ɠɛni naa nɔ ɠɛɛzu, nii pagai gaazu.