Text copied!
CopyCompare
Godigo dwagi yai po buku - Te Israel Tobolu Bidi Dabe

Te Israel Tobolu Bidi Dabe 21

Help us?
Click on verse(s) to share them!
1Te Israel bidi dabego te Genuai Bidiba te bomai dąų wabo po te Mispa bulude wali. Augwaligo te tama tiwai po wali, “Dago te dena wegi mani te Benjamingo hani dabeba munu me bidi pomainu magobeo,” wai.
2Tama te bage dabe te Betelba aselama, tama augwali te God gedude dualalubadi te giliga degegi palio. Tama augwa dwai gela mu wali.
3Tama augwaligo tama po wali, “God, te da Israel hanigo Genuai Bidi, magi baso te sę daba pedalubawe? Tama magi baso dago hani me deli hagawainu ebowe?” Augwaligo te po hanalu wali.
4Tama do te kigamu mu te we bidi hogodama, tama te pesagede te alta me deli nigai. Tama augwa te tigidali ulama siago domainu ebo ofa me te homu deliba mubo ofa yali.
5Tama augwa te po wai, “Te da tomode mena we bidi hani te Genuai Bidi geduba eba me sisinagasobewe?” Augwaligo hanalu wali, magi baso meni, augwa bomai pode dąų walu, te tiwai po wai, “Te bidi me hani deli te Genuai Bidiba te Mispa te buluba asisąbaso da, te augwali isimainao,” wai dao, polobadu.
6Tiali goli, augwaligo te augwa ama dabede homu dene mu yali, te Benjamingo hani. Tama augwa te po wali, “Te megi e sogode te Israel hani me deli hagawainu ebao,” po wai.
7“Te dago magi elama te bidalubo bidi hani dabe we magowe? Magi baso meni, te dago bomai po te Genuai Bidiba dąų walu wai, te dago dena wegi dabe te augwaliba me magobe po wai dao.” Te po wai.
8Tialima augwaligo hanalu wali, “Te dago hani mena bage, te Genuai Bidiba te Mispa buluba asobewe?” Tama augwaligo gegali te tiwai, te Jabes Gileat ami hwįbo bidi dabe te sisinani madiba me asisąwai.
9Te polobadu hasia augwaligo te tigidali we bidi dabe sisinibo po weyu i wali, tiali goli te Jabes Gileat bulu ami bidi dabe me asisąwai.
10Tama tibaso, te sisinani bidi hani dabego te bomai bidi naga dagalama, te 12,000 bomai bidi te Jabes hanu buluba tagala pali. Tama augwaligo bomai po augwaliba weyu, te tiwai po wali, “Dage te Jabes hanuba pelama, te tigidali bidi elibadi, te tigidali bidigo sali we me te tigidali wai dali ela muao,” wali.
12Tialima augwali pelama, te tiwai elama, tama augwaligo te Jabes hanu tomode te gesi wegi ogwa we te bidi sese hauwa te 400 gegalio. Te wegi ogwa we dabe te bidi dali pagela pisiąwai wegi dabe dao. Tama augwaligo te wegi ogwa we dabe sela asu, te bidibo pesage Silo te Kenan tǫ pedaiba ma asai.
13Te bidi dabe sisinagaselama, tama te Benjamingo hani me badu pedai te Rimon ola be masigide bidalubo madiba po ola tolu, tama augwaligo te tiwai po wali, “Megi da, te dago dage dali ma hwįabo homu ebeo. Tama dago homugo te boi pimainao,” wali.
14Tialima, te Benjamingo hani te ma aselawali. Tama te gasa Israel hanigo te wegi ogwa we augwaliba menama, tama augwaligo sali. Augwaligo te wegi ogwa we dabe augwali te Jabes Gileat hanuba hwįgi pali sogo sai. Tiali goli te gesi we dabego te Benjamingo hani me badu te usu isiąwai.
15Te Israel dabego homugo te Genuai Bidigo te Israel hani me deli pedelali homu elama, tama augwaligo te Benjamin dabede homu dene mu iduali.
16Tama tiyu, te Israel polalubo bidi dabego te po wali, “Te Benjamingo hanide te we dabe me bidisiąma elalubao. Te dago mena tama tilama, te gasa bidalubo bidi dabego sabo we gegegowe?
17Te Benjamin hani bidi dabego we elalusiąbaso, wai ame nogobeo, tama te hani sia saibao. Te dago te augwaligo we sabo sunumi gegemainao.” Te homu yai.
18“Tiali goli dago te bidi dabe me deligo te dago wegi mani somainu me elamuo.” Augwaligo te tiwai po wali, magi baso meni, te po augwa polobadu wai, “Te bidi me deligo aga wegi te Benjamin hani bidi me delibolo mobaso da, te aga dolomainao,” wai dao.
19Tama teyu, te polalubo bidi dabego te po wali, “Te Godiba genuai nai ulubo nai daa tubo sogo te megi da pąba yagasalio. Te ulubo nai daa tubo sę te tigidali kibu bede pedalubo, te megi te Silo hanude pedalubao,” wali. Silo te Betel pedai badu te notde elaluali, te Lebona bulu pąde te saut badu, tama te giliga pedalubo badu te bulu Betel me Sekem si pabo sunumi tomode dao.

20Tama augwaligo te Benjamingo hani dabebolo weyu, te po wali, “Dage pelama, tama te wain gi tomoba geme duala sigi pelama,
21tama tonaludu yao. Te genuai nai daa tubosi pedalubo sogo tama te Silo hanu gesi wegi ogwa we dabe sabolama, te tęąbi ebaso da, teda dage pedelama, tama dage deli deligo te wegi mani deli deli pageabi yao. Tama duga te we dabe selama, tama duga bulu tǫba ma piagameo.
22Nosali augwa aya dabe me, ma te augwa abe dabe asu, tama dageba wado po wagasobaso da, teda dagego augwaliba te po waiąo, ‘Te augwali da dali bidimainu yao, magi baso meni, te da deli deligo te hwįani sogo te we me sisąwai. Tama duga digi dabolo me mabe, tama tibaso te duga dąų wali po te me dagego togobeo,’ te tiwai po augwalibolo waiąo.” Te polalubo bidi dabego te po wai.
23Tama te Benjamingo hani dabego te tama tiali, tigidali deli deligo te danis yagasali wegi dabe selama, tama augwali palio. Tialima, augwali te augwa tǫba ma pelama, tama augwa hanu ma nigilama, tama augwa tede bidaluali.
24Tama tigidali Israel dabe me te augwa haniba me te augwa deli hani sibiba ma pelama, te augwa tǫ pedai tigidaliba pelama bidada palio.
25Tama te sogo te Israel dabe augwa king bidi meni yai. Tama tiyu, tigidali we bidi deli deligo te augwa homugo digi te mena mena sę ela peyu bidaluali.