1 Piɛri 4

1

2

3

4

5

¹Kirisi fɛ̃̀ṹtɛ́mu! Nyɛ̃́nɛ̀ kɛ dò ndi múnkɛ yóó fɛ̃́ṹtɛ́, kɛ yɛ̃́ wèè fɛ̃́ũ̀rì ò yóumɛ̀ mɛyɛi.

²Dɛɛ̀ te kɛ̀ ti dò nkɛ́ndɔɔri Kuyie ndɔ́mɛ̀ ti we yɛ̀ɛ̀ kpɑɑ́ yɛ miɛkɛ kɛ́yóu timɔ́mmɔmbɛ ti dɔ́mɛ̀.

³Di do í tũ̀ ndìì mɔ̀nnì Kuyie nkɛ dɔɔri di dɔ́mɛ̀ mmɛ, kɛ dɔutinɛ̀ ditɔbɛ̀, kɛ tú tinɑɑyɑ̃̀ɑ̃̀tì, kɛ ɑ̃ɑ̃̀ yɛdikɛ́tontɛ́bɑɑ kɛ feu iwũɔ̃ yɛbɔkɛ̀ dɛ̀ɛ̀ tu mɛyɛi ndiɛmɛ̀.

⁴Di mmɔ̀nnì kɛ dɛ̀ yóu, nɛ̀ bɛ̀ di do wɛ̃ nkɛ dɔɔri mɛyɛi kɛ̀ dɛ̀ bɛ̀ di, kɛ̀ bɛ̀ di sɑ̃́ɑ̃́ nkɛ di senku.

⁵Kuyie nkùù yóó bekɛ́nɛ̀ bɛfòùbɛ̀ nɛ̀ bɛcíríbɛ̀ kù yóó bɛ̀ yietímu bɛ dɔɔ̀rìmɛ̀ dòmmɛ̀.

⁶Dɛɛ̀ te kɛ̀ Kirisi nɑ̀kɛ́ Tinɑ́ɑǹsɑ̀ɑ̀tì bɛcíríbɛ̀, kɛ̀ Kuyie mbo bɛ̀ bekɛ́nɛ̀ kɛ̀ bɛ̀ɛ pɛ́tɛ́ mufòmmu kù duɔ̀ mmù.

⁷Kutenkù ɑutɛ́ kɛ bo deèmu, nciìnɛ̀, kɛ nyɛ̃́ kɛ bɑ́ɑ́ nKuyie.

⁸Dɛ̀mɑrɛ̀ ketirɛ̀ tu: Di bo ndɔ́mɛ̀ ditɔbɛ̀, kɛ yɛ̃́ mɛdɔ́kùmɛ̀ dɑɑtimɛ̀ mɛyɛi mmɛsṹkùmɛ̀.

⁹Ncɔúnɛ̀ Kirisi kɔbɛ di cɛ̃́ĩ nɛ̀ diwɛ̀ì.

¹⁰Kuyie mpɑ̃mu bɑ́ wè dipɑ̃nnì, di nyɛ̀ pĩ̀ńnɛ̀ mutɔ̃mmú kɛ̀ dɛ̀ wenni, kɛ teennɛ̀ ditɔbɛ̀.

¹¹Kuyie nduɔ́ nwè kòò bo nnɑ́ɑ́ nku nɑ́ɑǹtì, wè nti nɑ̀ɑ́ mbɛtɔbɛ̀, kɛ̀ kù duɔ́ nwè kòò bo nteennɛ̀ bɛtɔbɛ̀ wè mbɛ̀ teennɛ̀ o wɛ̃rímú mumɔu Kuyie nhò duɔ́ mmù. Kɛ̀ Kuyie nyètìrìi dɛukɛ Yesu Kirisi kpɛ́í nwèè dɛu kɛ kpeńnì sɑ̃́ɑ̃̀. Kɛ̀ dɛ̀ mmɛ ndò.

¹²N kɔbɛ n dɔ́ bɛ̀, kɛ̀ di fɛ̃́ũ̀rì mɛdiɛ̀ ndɛ̀ bɑ́ɑ́ di di, kɛ̀ di yɛ̀mmɛ̀ ndò ndɛ̀mɑrɛ̀ cɑ̀nnɛ̀.

¹³Dɛ̀ petìnkɛ ndi nɑɑti Kirisi fɛ̃̀ṹtɛ́mɛ̀ kɛ̀ di múnkɛ fɛ̃́ũ̀rì, kòò bo wɛ̃tɛní kɛ̀ di yɑ̀ ò dɛumɛ̀ kɛ̀ diwɛ̀ì di pĩ́.

¹⁴Kɛ̀ bɛ̀ di sɑ̃́ɑ̃́ ndi tú mɛ̀ɛ̀ kpɛ́í nKirisi kɔbɛ dɛ̀ ndi nɑɑti kɛ yɛ̃́ Muyɑɑ́nsɑ̀ɑ̀mù kó muwɛ̃rímú diɛmù di bonɛ̀mɛ̀.

¹⁵Nyɛ̃́nɛ̀ kɛ̀ bɛ̀ bɑ́ nfɛ̃́ũnko òmɔù kɛ tú ò kùɔ onìtì, yoo ò yùúkú, yoo ò dɔ̀ɔ̀ mɛyɛi nyoo ò tɑ otɔù kpɛti miɛkɛ.

¹⁶Kòò mɔù fɛ̃́ũ̀rì ò tu mɛ̀ɛ̀ kpɛ́í nKirisi kou, ifɛi bɑ́ nhò bo, ò petìnkɛɛ sɑ̃ntɛ Kuyie nhò tu mɛ̀ɛ̀ kpɛ́í nKirisi kou.

¹⁷Kuyie mbeéntì tùɔ̀kɛmu kɛ̀ kù ketɛ́nɛ̀ ku kɔbɛ. Kɛ̀ Kuyie nketɛ́ kɛ bekùnɛ̀ tínti ku kɔbɛ dɛ̀ nɛ́ bo ndòmmɛ̀ bɛ̀ɛ̀ kù yetɛ?

¹⁸Bɛ̀ɛ̀ dɔ̀ɔ̀ri Kuyie ndɔ́mɛ̀ kɛ̀ bɛ̀ fɛ̃̀ṹtɛ́ kɛ nɛ́ nɑ kɛ cootɛ́, bɛnitiyɛibɛ nɛ̀ bɛnitidɔnnibɛ̀ bo yĩ́mɛ kɛ́cootɛ́?

¹⁹Bɛ̀ɛ̀ dɔ̀ɔ̀ri Kuyie ndɔ́mɛ̀ kɛ fɛ̃́ũ̀rì bɛ̀ nsɔkɛ́ kɛ dɔɔri mɛsɑ̀ɑ̀ nkɛ duɔ́ mbɛmɑ́ɑ̀ Kuyie nkùù bɛ̀ dɔ̀ɔ̀, kù bɛ́i ntì í ceeri, kù bɛ́immu kɛ tú kù í yóó bɛ̀ yóu.