1Kataisa baa tanda nyiamo doko lao masetala baame masiamoli pyoo nyakamame apata masoo depa depa latae kalyepape. Endakali mendeme baanya yonge dokonya tanda nyepelyamo dokome koo pingi mana doko yakinatelyamo.
2Dopana nyakama isa yuu dakenya kalyamino gii dakepa endakalimi nyipu laka lao masingimali pyoo pyaa naenya Goteme pipimi laka lao masilyamoli pyoo pipenge.
3Doko, netesa endakali dupame pipuma laka lao masilyaminoli pyoo nyakamame kapa pao peteami. Gii dokopa nyakamame nyipu laka lao masoo luiyawaka payao, waene longo napala kyakao, nee andake pyoo yangelyami dupanya tuu lao nawaka pao, bia akipi longo lao nao, sambo gote naminalapape latae dupa minawaka pyoo payateami.
4Indupa netesa endakali dupame mana koo longo paka dupa nyakama-pipa awapa minamana naepelyamino lao mona andapala, nyakama kandao pii koo lelyamino.
5Dopa pilyaminoaka doko, endakali sakapi kumapaepi dupa yapala ipanya depa latae kalyamo Gote dokonya enombanya dupame pingima dupa lao panatami.
6Endakali kumiamino dupa-kisa Wai Pii Epe doko peamopa sepeami. Goteme endakali yapengeli pyoo kumapae dupa yapatana lawapi, Gote lete katengeli pyoo dupanya imambu dupa lete katatamina lawapi Wai Pii Epe doko dupa-kisa pea-pyaa.
7Dupa pitaka etatamo gii doko tengesa petelyamo. Dopana, nyakamame loma salanya mona palipala tangeme tange isoo kalyepape.
8Nyakamame mupa joo dapa pipenge: nyakamame kyoto joo mende auu kaya kaya pyepape. Doko, auu kaenge dokome koo pingi etete longo sanga pingi.
9Nyakamame mumu laa naenya opone minaloo pyoo kalyepape.
10Goteme mona epe paliuu epe nyakama mendai mendai lao mee diamopa nyiaminoli pyoo nyakamame mende nisa nisa pyoo kalyepape. Goteme mona epe paliuu wakale mee dilyamo dupa auu pyoo isoo katakamaingi endakali joo dopa pyoo kalyepape.
11Endakali mendeme pii mende latamo kandao doko, Gotenya pii doko lena. Endakali mendeme mende nisoo katatamo kandao doko, Goteme pupu lapae baa maitamo dokome nisoo katena. Dopa pitamopa dupa pitakame Jisasa Kataisa-kisa Gote tama pita. Tii pipaepa pupu lapaepa dolapo koteaka lao baa-kisaka singi. Kiniaka.
12Mona setenge paluma, makande pingi koo itaita pipae dupa minao nyakama-kisa pitaminopa mana enenge waka mendeme nyakama-kisa andinyala epelyamona lao mona andala nayalapape.
13Daa, makande pingi dupanya nyakama tanda nyilyamino doko Kataisame tanda nyiamoli pyoo nyilyaminona mona yaepalapape. Doko, tanga baanya tii pipae doko panatamo gii dokopa nyakama eteke pyao etete mona yaepatami.
14Nyakamame Kataisanya kenge doko minao payatamino dokonya endakali dupame nyakama kandao pii koo dupa lataminopa, nyakama mona yaepapenge. Doko, Gotenya Oli Sipitisa tii pipae doko nyakama-kisa ipao katapelyamo.
15Dopaka doko, aopyoo latala nyakamanya mendeme endakali pyao kumasowapi, waa nawapi, koo pyowapi, pyakane katawapi mende petala tanda nyetami.
16Dopaka doko, nyakamanya mendeme Kitisene katapala tanda nyetamo kandao doko, elya nakaena. Baanya kenge doko Kitisenena latamino dokonya Gote lao tama pina.
17Indupa Goteme baanya tata dupa tee pyao yapapenge gii doko epelyamo. Baame naima tee pyao yapatamo kandao doko, Gotenya Wai Pii Epe doko tanga lenge endakali dupa aipa petala yapao etatape?
18“Goteme endakali tolatae doko etete lekeleke tao pyoo nyetamo kandao doko, baa minao payala nayao koo pingi endakali doko kandao aipa pitape?”
19Goteme endakali mende tanda nyina lao masilyamoli pyoo mana epe dupa minao katao pituu, dupanya imambu dupa baame setao katekena lao maipenge. Wapuingi Gote dokome mende pitoo latala kini pingiaka.
