1 ጴፂሮሳ 4

1

2

3

4

5

¹ሄሳ ጊሾ፥ ኪሪስቶሲ ባ ኣሹዋን ኑስ ዋዬቲዳ ጊሾ ሂንቴካ ሄ ቆፋን ሂንቴና ዳንጪሲዲ ሚኒዲ ኤቂቴ። ኪሪስቶሳ ጊሾ ጊዲ ባ ኣሹዋን ዋዬ ኤኪዳ ኡራይ ናጋራ ኦꬂኬ ጊዲ ቃንፂዳ ኣሲ።

²ሄ ኡራይ ባ ኣቲዳ ላይꬃን ፆሳ ሼኔ ኦꬃናው ኮዬሲፔ ኣቲን ኢታ ኣሾ ኣሞን ዴና።

³ካሴ ሂንቴ ኣማኖና ኣሳይ ዴዒዳይሳዳ ዴዒዴታ። ሂንቴ ኢታ ኣሞን፥ ላይማቴꬃን፥ ማꬆን፥ ቱናቴꬂ ዴንꬄꬂያ ዬꬃን፥ ፖኪያ ኤቃ ጎይኖን ካሴ ዴዒዳ ዱሳይ ጊዳና።

⁴ኣማኖና ኣሳራ ሂንቴ ሾሪ ባይና ኦሱዋ ኦꬆና ጊሾ ማላሌቲዲ ሂንቴና ጫዮሶና።

⁵ሺን ኤንቲ ፓፃታ ቦላኔ ሃይቂዳ ኣሳ ቦላ ፒርዳናው ዴዒያ ፆሳስ ዛሮ ኢማና።

⁶ሃይቂዳ ኣሳስ ዎንጌላይ ሳባኬቲዳይ ሃይሳ ጊሾሳ። ኤንቲ ኣሳꬆ ባንታ ኣሹዋን ፒርዴታና ቃሲ ባንታ ኣያናን ፆሳꬆ ዴዖን ዳና።

⁷ሂዛ፥ ኡባባስ ዉርሴꬃይ ማታቲስ። ሄሳ ጊሾ፥ ዎሳናው ዳንዳዔታና ሜላ ዎፑ ጊዳ ዎዛኒ ዴዖ፤ ማራራ ዴዒቴ።

⁸ሲቆይ ዳሮ ናጋራ ካሚያ ጊሾ ኡባፌ ኣꬂዲ ኢሶይ ኢሱዋራ ዎዛናፔ ሲቄቲቴ።

⁹ዙዙሞና ኢሶይ ኢሱዋ ኢማꬃቴꬃን ሞኪቴ።

¹⁰ሂንቴ ፆሳፌ ዱማ ዱማ ኣꬎ ኬሃቴꬃ ኢሞታ ኤኪዳይሳዳ ሂንቴ ኢሶይ ኢሶይ ሄ ኢሙዋ ቤሲያዳ ኦይኪዲ ኢሶይ ኢሱዋ ሃጋዚቴ።

¹¹ዬሱስ ኪሪስቶሳ ባጋራ ኡባባን ፆሳይ ጋላቴታና ሜላ ኦኒካ ኦዲያባ ጊዲኮ ፆሳፌ ቃላ ኤኪዳዳ ኦዶ። ቃሲ ኦኒካ ማዲያባ ጊዲኮ ፆሳይ ኢያው ኢሚያ ዎልቃዳ ማዶ። ቦንቾይኔ ዎልቃይ ሜሪናፔ ሜሪና ጋካናው ኢያው ጊዶ። ኣሚንዒ።

¹²ታ ባጋቶ፥ ሂንቴ ታማዳ ፁጊያ ዋዬ ፓጪያ ጊዶራ ኣꬊያ ዎዴ ኦራꬃባይ ሃኒዳዳ ማላሌቶፊቴ።

¹³ሺን ኢያ ቦንቾይ ቆንጪያ ዎዴ ሂንቴ ኡፋይሳይ ጊታ ጊዳና ሜላ ኪሪስቶሳ ዋያ ሂንቴ ኤኬይሳን ኡፋይቲቴ።

¹⁴ኪሪስቶሳ ሱንꬃ ጊሾ ኣሲ ሂንቴና ጫያ ዎዴ ፆሳ ቦንቾ ኣያናይ ሂንቴ ቦላ ሼምፒያ ጊሾ ሂንቴ ኣንጄቲዳይሳታ።

¹⁵ሂንቴፌ ዋዬ ኤኪያ ኦኒካ ሼምፖ ዎꬊዳዳ ዎይኮ ካይሶቲዳዳ ዎይኮ ኢታ ኦꬂዳዳ ዎይኮ ጌልሶናባን ጌሊዳዳ ሃኒዲ ዋዬቶፎ።

¹⁶ጊዶሺን፥ ኣማኖ ጊሾ ዋዬቲኮ ኪሪስቶሳ ሱንꬃ ጊሾ ፆሳ ጋላቶፔ ኣቲን ዬላቶፖ።

¹⁷ፒርዲ ፆሳ ኣሳ ቦላ ዶሚያ ዎዴይ ጋኪስ። ሂዛ፥ ሄ ፒርዳይ ኮይሮ ኑ ቦላ ዶሚያባ ጊዲኮ፥ ፆሳ ዎንጌላስ ኪቴቶና ኣሳ ዉርሴꬃይ ኣይ ጊዳኔ?

¹⁸ፂሎይ ኡንዓን ኣቲያባ ጊዲኮ፥ ማካላንቾይኔ ናጋራንቾይ ያቲን ዋናኔ?

¹⁹ሄሳ ጊሾ፥ ፆሳ ሼኔዳ ዋዬ ኤኬይሳቲ ባንታ ሼምፑዋ ሃዳራ ባንታና ሜꬊዳ፥ ኣማንꬂያ ፆሳስ ኢሚሼ ሎዖባ ኦꬆ።