1Iet me KAUN-O, Wasa Lapalap, mahsanih duwen Mohap: “Poakehla mehn Nepo— ar kahnimwo mwomwlahr! Kiriadaim lohdier, eh kelen mahwen kehlail kan rengkdier, oh towe kan sarohdier;
2lingan en Mohap sohralahr. Imwintihti kan kalowedier Espon oh wiewia koasoandi suwed en kamwomwala wehin Mohap. Kahnimw Madmen pahn nennenlahr; karis kan pahn mwekidlahng ie.
3Mehn Oronaim weriwerki, ‘Kamaramas! Mwomwla!’
4“Mohap mwomwlahr; kumwail rong ngilen seri kan ar wie sengiseng.
5Kumwail rong ngilen ar makiaki kan limwahn ahl me kodalahng Luhid, weriwer en nsensuwed ni ahl me kohdilahng Oronaim.
6Re ndinda, “Mwadang, kumwail tengen mour! Kumwail tang duwehte ahs en wel kan!’
7“Mohap, ke kin koapworopworki omw kehlail oh reken kepwe, ahpw met ke pil pahn lohdier; omw koht, Kemos, pahn kalipilipala, iangahki nah soupeidi oh samworo kan.
8Sohte kahnimw ehu pahn pitsang kamwomwmwomwlao; wahu oh sahpw patapat koaros pahn ohla. Ngehi, KAUN-O, me mahmahsen.
9Kumwail kauwada en Mohap ehu kilel en eh sousou; e pahn kereniongehr mwomwla. Eh kahnimw kan pahn ohla, oh sohla me pahn pwurehng kousoan wasao.” (
10En riahla aramas me sohte kapwaiada sapwellimen KAUN-O doadoahk ni mohngiong unsek! En riahla aramas me sohte kamwakid kedlahs oh kemehla aramas!)
11KAUN-O ketin mahsanih, “Sang mahs Mohap kin saledek sang apwal oh sohte mwahn kin kalipilipala. Mohap rasehng wain me kin mihmi nan sah ehu oh sohte kin wudekiong nan ehu sah tohrohr. Nemeneme sohte mwahn kin ohla, oh kin iou ahnsou koaros.
12“Eri met, ahnsowo leledohr me I pahn kadarodo aramas akan pwehn wudekihla Mohap rasehng wain. Re pahn wudekihsang kanengen sahn wain kan oh kauwehla sah kan.
13Mehn Mohap ahpw pahn sohla koapworopworki ar koht Kemos, duwehte mehn Israel ar sohla koapworopworki Pedel, koht me re likihala.
14“Ohlen Mohap kan, dahme kumwail kosekosehki me dene kumwail sounpei ndand kei, sounpei kommwad kei nan mahwen?
15Mohap oh eh kahnimw kan mwomwlahr; nah mwahnakapw me keieu kaselel kan kamakamalahr. Ngehi me nanmwarki, KAUN-O, Wasa Lapalap, oh ngehi me mahsenier.
16Paisuwedlahn Mohap kerendohr, eh pahn ohla pahn mwadang leledo.
17“Kumwail mwahieiki wehio, kumwail me karanih, kumwail koaros me ese duwen eh ndand. Kumwail patohwan, ‘Eh manaman en kaunda wasa ohlahr; eh lingan oh manaman sohralahr!’
18Kumwail kan me kousoan Dipon, kumwail doudihsang nan deumwail waun kan oh mwohndiong nan pwelpar; Sounkamwomwala Mohap miher wasaht oh karangkedier eh kelen mahwen kan.
19Kumwail kan me kousoan Aroer, kumwail kesihnenda limwahn ahl akan oh awiawih; kumwail idek rehn me tangatang kohwei kan, kumwail idek rehrail dahme wiewiawi.
20Re pahn sapengkin kumwail, ‘Mohap ohlahr, kumwail mwahieiki; e sarohdier. Kumwail lohkiseli limwahn Pillap Arnon me Mohap mwomwlahr!’
21“Kadeik leledohngehr kahnimw kan me mi nan patapaten: Olon, Sahsa, Mepad,
22Dipon, Nepo, Ped Dipladaim,
23Kiriadaim, Pedkamul, Pedmeon,
24Keriod, oh Posra. Kadeik leledohngehr nan kahnimw koaros en Mohap, kahnimw keren oh doh kan.
25Kehlail en Mohap ohlahr; eh manaman sohralahr. Ngehi, KAUN-O, me mahmahsen.”
26KAUN-O ketin mahsanih, “Kumwail kasakawihala Mohap, pwehki eh kahngohdiong ie. Mohap pahn tapwurseli nan pein eh mwus, oh aramas akan pahn kouruhrki.
27Mohap, ke tamanda duwen omw kouruhrki mehn Israel ko? Kumwail wiakauweirailla likamwete re lohdi pahn pwihn loallap ehu.
28Kumwail kan me kin kousoan Mohap, kumwail mweselsang nan amwail kahnimw kan! Kumwail kohwei oh kousoanla ni aul kan de kisin wasa patapat kan ni pengepengen nahna kan! Kumwail en duwehla mwuroi men me kin wiahda pese ni keilen wahu kan.
29Mohap me inenen pohnmwahso! I rongehr duwen pohnmwahso, aklapalap, oh akuh en aramas akan, duwen ar kin mwohnkihte pein irail.
30Ngehi, KAUN-O, mwahngih duwen ar aklapalap. Ar lokaiahn suwei kan sohte katepe, oh mehkan me re pahn wia sohte pahn poatopoat kohkohla.
31Eri, I pahn sengisengki aramas koaros nan Mohap oh nan Kir Eres.
32I pahn sengisengki mehn Sipma, laudsang mehn Saser. Kahnimw en Sipma, ke rasehng tuhkehn wain pwoat me rah kan daulihala Sehd Weitahtao oh pil lellahng Saser. Ahpw met omw wahnsahpw akan oh omw wahn wain kan en ahnsoun karakar ohlahr.
33Nsenamwahu oh peren pehdsangehr nan sahpw pwelmwahu en Mohap. I katokedier pwilipwilahn wain sang ni wasahn tiak wain kan; solahr me kin wiahda wain oh kadekedengki eh peren.
34“Mehn Espon oh Eleale weriwer, oh ngilen ar weriwer peipeilahng Sahas; mehn Soar pil iang rong, oh e pil lellahng Oranaim oh Eklad Silisia. Piletik en Nimrin pil madadahr.
35I pahn katokihedi en mehn Mohap ar kin wia meirong isihs ni ar wasahn kaudok oh ar meirong ong ar koht kan. Ngehi, KAUN-O, me mahmahsen.
36“Eri, mohngiongi pahtouki Mohap oh mehn Kir Eres, rasehng aramas emen eh kin kesekesengki koulen kedepwidepw, pwehki mehkoaros me re ahneki sohralahr.
37Irail koaros sehkasangehr pitenmoangarail kan oh koakoahsangehr ar alis kan. Re kalipwelipwedahr pehrail kan, oh aramas koaros pwuhriongehr nan likoun nsensuwed.
38Pohn pwelengen ihmw koaros en Mohap oh ni wasahn tuhpene en aramas akan sohte mehkot mie pwe mwahieite oh nsensuwed, pwehki ei kauwelahr Mohap rasehng sah ehu me solahr aramas anahne.
39Mohap mwerpesengier! Kumwail weriwer! Mohap sarohdier. E ohlahr, oh wehi koaros me karanih wie kokouruhrki. Ngehi, KAUN-O, me mahmahsen.”
40KAUN-O ketin inoukidahr me wehi ehu pahn kohdi pohn Mohap rasehng ikel men me eh pehnpihr kan ngampeseng,
41oh kahnimw kan oh kelen mahwen kan pahn lohdi. Ni rahno sounpei kan en Mohap pahn masepwehkada rasehng lih emen me medek en neitik lelehr.
42Mohap pahn ohla oh sohla wia wehi ehu, pwehki eh kahngohdiong ie.
43Mehkot kamasepwehk, pwoahr, oh lidip awiawiher mehn Mohap. KAUN-O me mahmahsen.
44Mehmen me song en tangasang me kamasepwehko pahn pwupwudiong nan pwoahr kan, oh mehmen pahn doudahsang nan pwoahr kan pahn lohdi nan lidip kan, pwehki KAUN-O ketin koasoanedier ahnsoun kamwomwmwomwlahn Mohap.
45Me sopohsangehr apwal akan repen mourlahngehr nan Espon, kahnimw me Nanmwarki Sihon kaundahr mahs, ahpw kahnimwo wie lullul. Kisiniei isikalahr irepen sahpw akan oh pohn kumwen nahna kan en aramas en Mohap kan me kin mouren mahwen.
46Poakehla mehn Mohap kan! Aramas akan me kin pwongih Kemos mwomwlahr, oh neirail serepein oh pwutak kan selidier oh wisiksangehr.
47Ahpw ni rahn akan me pahn kohdo KAUN-O pahn ketin pwurehng kapaiada Mohap. Iei ih mepwukat me KAUN-O ketin mahsanih me pahn wiawihong Mohap.
