San Lujc 18:25-35

²⁵Adli nawëëgt tëd tijb camell xan gagux, guial chuꞌ tijb bén rijcw loj xguialrniabee Dios.

²⁶Abiꞌ ree bén biguiejn ni rëb Jesús, rëb reeman: ―¿Chu za zajc laa loj xcasti Dios?

²⁷Dxel rëbaman loj reeman: ―Yuꞌ ni ad zajct güün bénguidxliuj, per Dios graczan zajc güünman.

²⁸Dxel rëb Bëd lojman: ―Dad, ma basaꞌnan graczi ni rayaꞌpan persi zudnaalan lüj.

²⁹Zianz rëb Jesús: ―Diidxliczi rnin lojdi, chutëëz bén rusaꞌn lidx, lacheel, bijch, o xdad, o xniaa, o xiꞌn guial rüjnman ziꞌc rniabee Dios,

³⁰mazri zien ni tiaꞌman loj guidxliuj guie. Abiꞌ zajpaman guialnaban tiblayaa con Dios.

³¹Gurejdx Jesús guidxiptioꞌp ree xbejnman tiblad, abiꞌ rëbaman loj reeman: ―Yan, ziyoꞌ ree Jerusalén lod gac ziꞌc bacaa ree bén badëë xtiidx Dios loj ree bejn xcwent Bén guxhaal Dios.

³²Yayü reeman laaman loj ree benzit, guzeꞌ reeman laaman, guiniee reeman laaman ni rëntzi reeman, abiꞌ gucojp xhiejn reeman lojman.

³³Quin reeman laaman dxel gugüjt reeman laaman, per ni yayon dxej yabanman.

³⁴Per laa reeman ad bigniaꞌtczi reeman ni rëbaman, ad ragbee tëët reeman chexc zeel rëbaman zian din ad bileꞌt nigniaꞌ reeman xhie rën guiëb ni guneeman.

³⁵Chi ma cadxin Jesús gajxh guiedx Jericó, tijb bénlutiaꞌp, zojbaman cwëꞌ nejz rniabaman carda.